Nutza:Knappe487

Uhu-hertzliches Lulu !

Normalaweis miassad I als Schlaraff R.G.u.H.z. (Ritterlicher Gruß und Handschlag zuvor) schreibm, I bi owa no koa Ritter ned, deswegn deaf I des no ned :-).

Wenns rechdt is, na dadad I gern a weng im Artikl Schlaraffia ummananda weakln.

Lulu !

Wos soidat ma driwa wissn ?

De Schlaraffia is a wöötweite deitschsprochige Vaeinigung zua Pflege vo Freindschoft, Kunst und Hamua, de wos am 10. Oktoba 1859 in Prag grindt wuan is. Des Wuat „Schlaraffe“ kummt aungeblich vo dem middlhochdeitschn Wuat „Slur-Affe“, wos domois sowos wia „sorgloser Genießer“ ghaaßn hod (do kummt a des Schlaraffenland hea).

Da Woispruch von da Vaeinigung is „In arte voluptas“ (des is Lateinisch und bedeit sowos wia: in da Kunst liegt des Vagniegn).

Da Begriff „Schlaraffia“ is duachn „Allschlaraffenrat“ (des is da Vuastaund vo dem wöötweitn Vabaund „Allschlaraffia“) ois Markn gesetzlich gschitzt wuan und deaf wegn dem aa midn Marknzeichn „®“ (=copyright) bei oin Vaeffentlichungan vom Varein gfiaht wean.

Mid aundare Marknnaumen, in de da Begriff Schlaraffia vuakummt (es gibt zum Beispüü Schlaraffia-Matrozzn) gibz kaan Zusaummanhaung.

A Schlaraffenvarein hoaßt se "Reych" und hod im Nam normalerweis a latinisierte Transkribierung vom Ortsnam. As Vereinsheim hoaßt oiwei Burg, oftmals ham de Burgen recht scheene Namma.

Es gibt aa ka Vabindung zu de Freimaura,Rosngreiza, Illuminatn, zum Lions-Club oda zu Rotary International. Emso grenzt ma si vo iagnwööche Karnevalsvarein oda sowos in dera Oat o. De Schlaraffia is aa koa Geheimbund, und wers ned glaubt, der gähd oafach amoi hi und schaugt se dees o.

Wia is na dazua kemma ?

Grindt woan is de Schlaraffia seinerzeit in Prag vom Thomé Franz. Wia der da Schef vom Deitschn Theater durtn gwen is, woita sein Schbäze Eilers Albert in de Kinstlavereinichung "Arcadia" einebringa, scheinst hod owa dene sei Nosn ned basst oda er werd zweng Gerschtl ghabt hom. Na hamms eahna de Dia vua da Nosn zuaghaut. Nachad han da Thomé und da Eilers a weng hantich woan und hamm an Schdammdisch aafgmocht, der hod se "Proletarierclub" ghoaßn. Es hod na scho a weng dauert bis na endlich da Nam "Schlaraffia" gfuna woan is.

Wia na de Sach in Prag gscheid oglaffa is, hod se dees fraale grod bei de Schauschbülla und Musiker vabreidt und es hod ned lang dauat, bis se in andane Schdädt aa Reyche gründet habm. Ogfanga hods in Berlin 1865, na in Leipzig und so weida.

Seit 1874 hod de Schlaraffia aa a eigane Zeidung, und de hoaßt imma no "Der Schlaraffia Zeyttungen", werd reglmäßig an olle Schlaraffn ausgliefert. In dera Zeidung schdenna "Ambtliche Personalien" (ja, dees schreibt ma a so!) drinnad, dees hoaßt, wer eidredn is, wer ausdredn is, wer aafgnumma woan is, wer an Ordn griagt hod, owa aa, wer leida gschdorm is. Noch de Personalien kemma Nachrichdn aus olle Reyche.

De ältasdn Reyche, dees no gibt sann in Berlin (Berolina 2), Leipzig (Lipsia3), Köln (Colonia Agrippina 8), Stuttgart (Stutgardia 11), Rengschbuach (Ratisbona 12) und Minga (Monachia 15).

In da Hitlazeit is de Schlaraffia zwangsweis aufglest woan, zerscht hods olle Reyche in Deitschland dawischt (1937), as Joa draaf aa in Österreich. Wias na aaf Böhmen und Mähren ummeganga is, hamm se aa de Reyche durtn aafläisn miassn. Deszweng is na aa da Sitz vo da Schlaraffia vo Prag aaf Bern valegt woan, und do is a heid no. De Schlaraffn hoaßn dees greisliche Kapitl in unsana Gschicht de "uhufinstere Zeit" und da "Weltenbrand". De Schlaraffn homs si owa um des Vabot recht weng gschissn und hamm se meistns ois Stommtisch oda haamlich in privatn Wonungan, de wo sicha woan, weida trofa. En da Bundesrepublik und aa in Österreich san nochn II. Wöjtkriag de meistn Reyche wieda aufastondn, owa de Reyche ostwaats vo Oder und Neiße sann nimma woan, genauso wia in da Tschechei - drunta aa de "Allmutter Praga". Vo dera gitts schäd mehr a Plakettn und hoid de Sachan aus da Burg. En da DDR hods koana Wiedagrindunga gebm. Owa aa durt hom in a boa Städte de Schlaraffn im Untagrund bis zua da Wende weidato und san hiaz wieda lebendige Reyche. Es homt si a wieda Reyche nei gegründet. In da zweitn Hööftn von de 40a-Joah, hoz wegn da Vatreibung von de Deitschn aus Mittl- und Osteiropa in Westdeitschlaund (BRD) vüü Neigrindungan gem.

Wos macht na de Schlaraffia ?

Schlaraffia is a Mannabund, dens aaf da ganzn Wööt gibt und läbt vo da Persiflasch, vom Hamua, vo da Musi und aa vo da Kunst. Ma sogdt, dass de Schlaraffn a Schbui schbuin. Und dees danns aa. Ma drifft se imma in da sogenanntn Winterung, dees is driwahool am Äquator vo Oktowa bis Abrui, und druntahool am Äquator vo Mai bis Sebdemba. A Schlaraffndreffn hoaßt se "Sippung", und des is jede Woch am gleichn Dooch (Uhutag). Des Reglweak fira Dreffn hoaßt se "Schlaraffenspiegel und Ceremoniale". Dreffa se Schlaraffn aus Schbass an da Freid ohne Reglemang, na is a "Krystalline".

De Schlaraffnburg ist oft schee ausschdaffiert. Ganz wichtich is da Uhu. Ohne den lafft bei de Schlaraffn goa nixe. Wenn ma in de Burg einegeht, nachad muass ma voam Uhu a Gnouperl macha. Oziang muass ma se fäi aa schee, a Anzuch und Krawattn oda Schmieserl is Bflicht. Wenn de Sippung ogeht, na muaß ma se an Huad aafsetzn. De Ritter ham an Helm aus Schdoff, de Knappn und Junker a weng a oafachane Haubm. Wer a Sippung bsuacht und koa Schlaraff is, der griagt a Pilgerhaubm vom Reych und de muaß ma se aafsetzn.

Wann ma etz in a so a Burg eineschaugt, na siecht ma voanad an Thron, durtn hockat de ganz wichtichn Owaschlaraffn, dees hand da Reychsmarschall (der wo oisse midschreibt undsoweida), na de drei Herrlichkeitn (de drei fungieren, dees hoaßst dees sann de Schefs vo da Sippung) und danebm hockt da Marschall.

A Sippung lafft imma in zwoa Daal ob, an "ambtlichn" und an "nichtambtlichn". Im ambtlichn Daal werd zerscht a mool de fungierende Herrlichkeit eigsetzt, dees hoaßt, dass oana an "Aha" unghenkt griagt. Dees is a holzana Uhu-Kobf zum Zeichn vo da Unfehlbarkeit im Reych. Nachad werd zum Hawedehre a Liadl midanand gsunga. Danooch wern olle vom Thron herzlich wilkumma ghoaßn, wenn Gäst do handt, na wern de extrich gnennt. Bsundas gfreid ma se, wenn Schlaraffn vo andane Reyche do hand, de griang na an feialichn Einritt. Do schdälln se olle aaf und machan a Schbalier aus Partisana (Hellebardn als Waff) vo de Knappn, aus Dolch (Waff vo de Junker) und Schwerter (Waff vo de Ritta). Iwa de Sippung werd a Brotokoi gschriebm, a ambtlichs und a nichtambtlichs. Zum Schreibm vom nichtambtlichn Brotokoi (NAP) werd oiwei oana vadonnat - des NAP soidad lustich und hamurvoi sei.

Im nichtambtliche Daal hoidn de Schlaraffn gloane Vorträch, de hoaßn se Fechsunga.Wer a Fechsung hoid, der griagt danooch ebbse gschenkt, Schlaraffn griang na an "Ahnen", dees is iachand a glänzads Blecherl oda so a Zeigl. Fechst a Besucha, der wo koa Schlaraffe ist, der griagt a boa Guazl als Dankschön. De fungierende Herrlichkeit gibt na danooch no sein Senf zua da Fechsung, vadaalt an Ahnen und Guazl und foadat as Reych zu oam oda mehrane "Lulus" aaf, kimmt hoid draaf o wia eahm de Fechsung gfoin hod. Gfechst wern deaf iwa oisse, bloss ned iwa Religion, Politik und anzigliche Sachan - dees is vabotn und werd gstraft !

Wann olle Fechsunga umme hand, na werd wieda midanand gsunga und na is goa.

Sprooch, Schreibweis und andane wichtiche Sachan

De Schlaraffn hamm a weng a eichane Schrooch, de wos se Schlaraffenlatein hoaßt. Zum Beischbui is as Bier a Quell, Wein hoaßt Lethe, as Essn is a Atzung, de Ehefrau is de Burgfrau, de Muada vo da Frau is da Burgschreck und so weida und so weida.

Ma redt se in da Burg ned mitm Nam o, sondern mitm Ritternam (oda Junker oda Knappe), ma sogt ned "Du" oda "Sie", sondern oiwei "Ihr" und "Euch".

Wer in da Sippung ebbse song mecht, der muaß imma ofanga mid "Schlaraffen hört!" und wann ma firte is sogt ma "Lulu".

"Lulu" ist fäi koa Kommando zum Biesln, sondan is de Abkiazung vo "Ludum Ludite" - "Lasst das Spiel beginnen", mid Lulu begriaßn se Schlaraffn.

De Schreibweis vo manche Sachan is a weng oidbacha und erinnat a weng ans Middloida, genau a so wead a in ana Sippung gredt.

Wia dakennt ma an Schlaraffn ?

An Schlaraffn dakennst do dro, dass a am Rewea vom Schackettl a Rolandnodl hod. De Rolandnodl is a kloane weiße Perle, manchmoi mid am gloana Uhu dro. A Schlaraff macht aa koa Geheimnis draus, dass a oana is. Desweng deaf aa driwa gredt wean, wos in ana Sippung bassiert. Do is aa koa Geheimnis dabei.