Postkoatnraiba
| Der Artikl is im Dialekt Obaboarisch gschriem worn. |
Postkoatnraiba (breißisch Postkartenräuber) homs on Unbekannten ghoaßn, der wo vo 2008 bis 2017 in Vorarlberg und Bayern zammad 14 Bank- und Postfilialen ibafoin hod.
An Noman „Postkoatnraiba“ hoda kriagt, nochdem er der Polizei zwoamoi a Postkoatn mit dem Text „Das war noch nicht alles. Komme wieder“ gschickt hod. Bei sein letztn Ibafoi am 4. Septemba 2017 z Heimenkirch im Allgai hod a ondana Bankkunde eam gschnoppt und da Polizei ibagem.[1] An Raiba homs ois Peter K. identifiziat, a 54 Joahr oida Tirola ausm Bezirk Londeck. Bei da ganzn Raubserie is de Polizei vo on Vorarlberga ois Teta ausgonga, wei der bei de Ibafäi Vorarlberga Wearta hergnumma und de Postkoatn in Lustenau on da Schweiza Grenz afgem hod.[2]
Chronologie vo de Ibafäi
[Werkeln | Am Gwëntext werkeln]Da Bankraiba hod in Vorarlberg ejfmoi zuagschlong,[3] in Deitschland dreimoi:[4][5]
- 11. August 2008: Sparkassen-Filiale in Feldkirch-Altenstadt
- 9. Meaz 2009: Post-Geschäftsstelle in Feldkirch-Altenstadt
- 4. Mai 2009: Post in Dornbirn-Haselstauden
- 16. Juli 2009: Sparkasse in Bregenz-Weidach
- 14. Jenna 2010: Post in Feldkirch-Tisis
- 2. August 2010: Post in Feldkirch-Tisis
- 9. Juli 2012: Volksbank-Filiale in Bregenz-Vorkloster
- 28. Mai 2014: Sparkassen-Filiale in Dornbirn-Hatlerdorf
- 22. Dezemba 2014: Postpartner in Schwarzach
- 3. Meaz 2015: Sparkasse in Lochau
- 28. Jenna 2016: Sparkasse in Feldkirch-Tisis
- 14. Juli 2016: Sparkasse in Opfenbach (Deitschland)
- 10. Novemba 2016: Volksbank in Opfenbach (Deitschland)
- 4. Septemba 2017: Raiffeisenbank in Heimenkirch (Deitschland)
Prozess
[Werkeln | Am Gwëntext werkeln]Noch da Vahoftung am 4. Septemba 2017 is da Peter K. in der Justizvoizugsanstoit Kempten in Untasuachungshoft gsessn und hod am Ofang bloß de drei Ibafäi in Deitschland zuagem. Wega da Beweislast hoda donn oba ra de ejf Ibafäi in Vorarlberg zuagem. Aft hod de Stootsanwoitschoft Feldkirch on Ausliefarungsantrog gstejd.[6] Im Dezemba 2017 hod de Generalstootsanwoitschoft Minga am Antrog zuagstimmt und entschiedn, dass in Deitschland koa oagna Prozess gfiaht werd, sondan olle 14 Raubibafäi am Landesgricht Feldkirch vahandlt wern soin.[7]
Vor da Grichtsvahandlung hod de Psychiatarin Adelheid Kastner – unta ondan bekannt van Foi Fritzl – a Guatachtn gschriem, wo s’an Peter K. trotz seinem Drogenkonsum fia zuarechnungsfähig hoit.[2]
Am 18. Dezemba 2018 hod da Prozess am Landesgricht Feldkirch stattgfundn. Da Beschuidigte hod no amoi olle 14 Raubibafäi mit ara Beite vo zammad rund 190.000 Euro zuagem.
As Gricht hod an Peter K. wega teilweise schwarem Raub und vasuachta schwara Nedigung zu ara Hoftstrof vo 12 Joahr und zum Schodnasotz vo 200.000 Euro an Bankn, Vasicharungen und Ibafoisopfa varurteit. De Unbescholtenheit und as Gständnis homs ois mildernd gwertet, as Problem woarn de große Zoi vo Ibafäi und de Heh vo da Beite. Da Peter K. hod Beruafung gega de Heh vo da Strof ogmejdt.[1] Im Friajoar 2019 hod as Obalandesgricht Innschbruck d’Beruafung obglahnt; mehra Rechtsmittl hods ned gem.[8]
Nochweis
[Werkeln | Am Gwëntext werkeln]- ↑ 1,0 1,1 Zwölf Jahre Haft für „Postkartenräuber“ – vorarlberg.orf.at, abgerufen am 28. Juli 2025
- ↑ 2,0 2,1 Postkartenräuber kokste und lebte gut – vol.at, abgerufen am 28. Juli 2025
- ↑ Elf Überfälle, Elf Fakten | thema vorarlberg, abgerufen am 25. Juli 2025
- ↑ Der „Postkartenräuber“ erfindet sich neu | thema vorarlberg, abgerufen am 25. Juli 2025
- ↑ Dorfverbrechen, Staffel 1 Folge 1: Der Postkartenräuber im Ländle – Joyn, abgerufen am 26. Juli 2025
- ↑ Vorarlberger beantragen Auslieferung des “Postkartenräubers” – vol.at, abgerufen am 29. Juli 2025
- ↑ “Postkartenräuber” steht vor Auslieferung – vol.at, abgerufen am 29. Juli 2025
- ↑ Es bleibt bei zwölf Jahren Haft – allgaeuer-zeitung.de, abgerufen am 29. Juli 2025