Pukira

Aus Wikipedia
Zur Navigation springen Zur Suche springen
Der Artikl is im Dialekt Owaöstareichisch gschrim worn.
Puchkirchen am Trattberg
Wappen von Puchkirchen am Trattberg
Pukira (Österreich)
Pukira
Basisdatn
Stoot: Östareich
Bundesland: Oberösterreich
Beziak: Vöcklabruck
Kfz-Kennzeichn: VB
Fläch: 0007.72 7,72 km²
Koordinaten: 48° 4′ N, 13° 34′ O48.06138888888913.574166666667558Koordinaten: 48° 3′ 41″ N, 13° 34′ 27″ O
Hächn: 558 m i. A.
Eihwohna: 1.080 (1. Jen. 2019)
Dichtn: 140 Einw. pro km²
Postleitzoi: 4849
Vuawoi: 07682
Gmoakennziffa: 4 17 27
Adress vo da
Gmoavawoitung:
Puchkirchen 3
4849 Puchkirchen am Trattberg
Netzseitn: www.puchkirchen.at
Politik
Buagamoasta: Anton Hüttmayr (ÖVP)
Gmoarod: (2015)
(13 Mitglieder)
9
4
Von 13 Sitzen entfallen auf:
Da Ortskern mit da Pfarrkirche
Da Ortskern mit da Pfarrkirche
Quelle: Gemeindedaten bei Statistik Austria

Pukira ban Trattbeag (amtl: Puchkirchen am Trattberg) is a ländliche Gmoa im Beziak Feklabruk in Owaöstareich. In Pukira wohnan eppan 1050 Leit auf 7,72 km² (2017). Vo Pukira siagst sche zan Hausruck, zan Kobanaußawoid und zu de Oipnbeag vo Niedaöstareich bis Boan.

Geografi[VE | Weakln]

Da Oat söwa is auf 558 m Seehechn und liegt aufm Trattbeag. De Nochbagmoana san Ompfewong im Hausruckwoid im Noan, Zöi am Pettnfiast und Ungenoch im Ostn, Timäkom im Sün und Neikira on da Vöckla im Westn. Vo de 7,7 km² san 22,1 % Woid, 67,5 % san Wiesn und Acka, da Rest san Stroßn, Heisa, Wossa und wos aundas.

Gschicht[VE | Weakln]

D'Inschrift afm Doafbrunn

Zan easchtn Moi wiad da Naum "Strattberg" in ana Uakundn gnennt, de wos spadestens 1139 gschriem woan sa muaß. Ob do oba des iatige Pukira gmoant is, woaß ma ned gaunz gwiß. Gaunz gwiß woaß mas eascht vo an Schrieb ausm Joar 1480, wia da Pukiringa Michel Prenner vo da Heaschoft Fraungabuag andn Soizbuaga Dompropst valicha woan is. Im 16. Jhdt. hot Pukira an soizbuaga Domkapitl gheat und 1581 hots da Weikhard vo Pollheim kauft. Mit de Grenzn woas damois nu ned so genau, drum hom se de Pukiringa Heisa daun meahrane Heaschoftn teit, zan Beispü de Woatnbuaga, Puachhauma, d'Heaschoft Pfaffing oda d'Heaschoft Scharnstoa. 1848/1849 san de Grundheaschoftn ogschafft woan und Gmoana hobn se büd. Pukira is oba eascht 1864 söbstendi woan und hot a a Zeidl um des Kämpfn miaßn. 1956 hot d`RAG an da Pukiringa-Neikiringa Grenz Ö gfundn, des woa de easchte fündige Bohrung in Owaöstareich.

Woppn[VE | Weakln]

Iwasetzt vo da offiziön Woppnbeschreibung:

Schräggviatlt vo Rod und Goid, omad a goidas, wochsads, am oban Schüdraund austessads lateinisch' Endrautnkreiz; untn a süwana aufrechta Boameißlkopf; rechts und links a greans noch außn gstöds Buachabladl. De Foabn vo da Gmoa san göb-grea-göb.

Politik und Eihwohna[VE | Weakln]

Seid da letztn Woi 2015 sitzn 9 vo da ÖVP und 4 vo da FPÖ im Gemeinderot. Buagamoasta is da Hüttmayr Toni vo da ÖVP. In da Voixzählung im 1991a Joar hot Pukira 868 Eihwohna ghobt, 2001 scho 948. Mit Ende 2009 haum 981 Leit in Pukira gwohnt.

Es gibt 18 Oatschoftn in Pukira:

Pukira, Gewerbepark, Sunnhaung, Braundstod, Staudoch, Oh, Roid, Wollern, Hedoaf, Mühbeag, Bühi, Sunnbühi, Schofedt, Beag, Gschwaundt, Huab, Moarigan und Gruabhoiz

Wiatschoft[VE | Weakln]

Joahundatelong woa Pukira a reins Bauandöafi. Do hots hoit zan Beispü an Becka, a poa Weba, Schuasta, Mühna und Binda gebn. A Sagla und Kaufgschäfta woan in Pukira z'findn. De Industrialisierung, da Aufschwung nochn zweitn Wödkriag und des Computazeitoita hom dazua beitrong, dass vü vo deana zuadrahn hom miaßn. Seit 1956, da easchtn Eadöboahrung, hat de RAG de Anlagn fia d'Ö- und Gasföadarung ausbaut, iatzat is aus dem a Gasspeicha woan.

In Pukira gibts iatzt eppan 25 Fiamen, vaschiednsta Oat, de zumindest an kloan Tei vo de Pukiringa a Oabat gem kinnan.

D'Kira[VE | Weakln]

Da Kiraplotz

D'Kira is an Jakobi an Ödan gweicht und is im 1480a Joar zan easchtn Moi gsichat eawähnt woan. Fria woa des de Kapön vo de 14 Nothöfa und aufgrund vo an oidn Nothöfa-Fensta gibts a Vamutung, dass de Kapön schau ausm 13. Jhdt. stomma kinnt. Bis 1784 woa Pukira a Filiale vo Neikira, 1784 is daun zua Lokalie erhom woan. Am End vom 18. Jhdt. woa d'Kira oba oamselig beinond. Nua da Osttei, s'Presbyterium, woa gmauat, s'Kiachnschiff woa hüzan. Da domolige Pfora Krötz hot se beschweat, dass koan Taufstoa, koa Oage, koa Tuamua und a koane Seitnoitär gem hod. D'Oage is nämli noch an großn Feia 1780 in Neikira zu da duatign Muatakira kema. 1806 is de Lokalie aufglöst woan, scho 1803 hot da Pfora Krötz zruck noch Neikira miaßn. In de foigendn Joazehntn hom se de Pukiringa solang auf d'Fiaß gstöt, bis das 1847 wieda zua Lokalie eahom woan is. Unta da Patronanz vom Eazheazog Maximilian d'Este is de Kira 1854 gewaltig umbaut woan. Des hüzane Kiachnschiff is gmauat woan und da 31metrige Kiratuam in seine iatign Foam is kuma. An Eazheazog sei Vawoita, da Konvallin hot oba deamoßn gspoat, dass 1879-1888 schowieda zan renoviern woa. Im easchtn und zweitn Wödkriag san de Glockn eigschmoizn woan, nua des Steabegleckal vom 1615a Joa hot de Zeit übalebt. 1974 san daun de Freskn übamoit woan, weis scho schiach woan han. 2000/2001 is wieda groß umbaut woan, s'Kiachnschiff is breada woan, a neiche Sakristei is draubaut woan. Innen is schlicht, oba a gaunz liacht woan. De Oitäre ham wieda ia uaspringliche, helle Foab kriagt. Kiachnschiff und Presbyterium han iat zu ana liturgischn Einheit vaschmoizn.

Vareinswesn und aundare Oaganisationen[VE | Weakln]

S'Doafmuseum wiad vom Museums,- Hoamat- und Brauchtumsvarein betriebn

In Pukira gibts an Haufn aktive Vareine. De bekauntastn san:

  • da Beagknoppnvarein
  • d'Feiawea Bühi
  • d'Feiawea Pukira
  • da Goidhaubnvarein vo Pukira
  • d'Jogdgenossnschoft Pukira
  • da Kaumarodschoftsbund
  • da Museums- Hoamat- und Brauchtumsvarein
  • da Musivarein Pukira
  • d'Spoatla vom UFC Pukira
  • da Vaschenarungsvarein

Natirli gibts a an gnuag Gruppn vo da Pfoa und vo de Patein.

Im Netz[VE | Weakln]