Todtenau

De Todtenau is a Hochmoor in de Gmoa Kiabeag im Woid in Baiern. Mit de benachbortn kloana Aun Reischau, Dorna Au, Muckenau und Höllenau boidt's des Natuaschutzgebiet "Todtenau und umgebande Aun". De Todtenau liegt aaf ana Heah vo etwa iba 700 m ü. NN.

Gschicht

Seit da letztn Eiszeit voa rund 13500 Joahr hot se in da Todtenau a 8,50 Meta dicke Torfschicht buidt. In de letztn Joahrhundart san de natialichn Moorlandschoftn beeiträchtigt duach Landwirtschoft mit eihergehanda Entwässarung sowia da Aafforstung mit standortfremde Fichtn. Ferna hot's bis Ende vo de siebzga Joahr Planunga gebn, den Torf in großm Stui obzumbaun, wos zu ana Zerstearung vo dem Moor gfiaht hät. Deshoib is 1983 des Natuaschutzgebiet bit ana Greaß vo 148 Hekta ausgwiesn worn. In dera Zeit hot's aa no an Restbestan vo Birkwuid gebn, wejcha boid erloschn is. Mittlaweil gibt's an Entwicklungsplan fia des Natuaschutzgbiet, privte Grundflächan wern okaaft und Renturierungsmaßnahman duachgfiaht (unta andam Obhoizung vo Fichtn, Vafüllung vo Gräbn, Mahd und eakologische Gsichtspunkt). De Maßnahman wern vo vaschiedane Intaressnsgruppn duachgfiaht, wie z. B. dem Staatsforst, dem Jagdvaband, vaschiedane Natuaschutzvabänd und da Untarn Natuaschutzbehörde. Des Natuaschutzgebiet is mittlaweil aa ois FFH-Flächn ausgwiesn.

Eakologische Bedeitung

De Todtenau mit de umgebandan Aun is duach de vaschiedana Moorflächn und Feichtwiesn oanzigarte im Boarischn Woid und beherbeagt a Vuizoi sejtana Tier- und Pflanznortn, wia z. B. Woidschnepfn, Baampiepa, Wiesnpiepa, Fieschotta, Rundblättriga Sonnentau oda Niedrige Schwarzwurzl. Des charaktaristische Birkwuid is Mitte de 1980a Joahr ausgstorbn, mittlaweil gibt's konkrete Plän zua Wiedawibiagarung. A Bsondaheit is aa des Restvoakemma vom Wachoida, a Erinnarung an de Woidweidnnutzung friahrara Zeitn, do da Wachoda im Gegnsatz zu andare Pflanzn vom Vieh ned gfressn worn is, duach de spadarn Aafforstunga is er wieda zruckdrängt worn. De charaktarisdische Baamort in de natuablassana Teil vo de Aun is de Spirke, wejche nua lichte Bständ buidt. De Rauschbeer is in da Todtenau ned sejtn.

Song

Um de Todtenau rankn se vui Song, z. B. soi do s Stod vasunga sei. Aa werd behaupt, dass da Nam vo da Au vo de Pestdodn kimmt, de do vasenkt worn san. Es gibt olladings koane Beweis fia die oadn Erzählunga, aa gibt's koa gsicherte Erklärung fia de Herkunft vo dem Nam.

Wandarn

Des Natuaschutzgebiet is duach an befestigtn Natualehrpfod schea zum bewandarn, Info-Dofen erklärn entlang vom Weg Entstehung, Bedeitung und Schutz vo dem Moor. A Begleitbroschürn is kostnlos bei da Touristninformation im Rothaus vo Kiabeag im Woid erhätle. Zum beachtn is des Weggebot innhoi vom Natuaschutzgebiet.

Geotop

Des Hochmoorgebiet is vom Boarischn Landesamt fia Umwejt ois bedeitends Geotop (Geotop-Numma: 276R028) ausgwiesn.