Trojana

A Trojana oda Trojanisches Ross is a Programm oda Skript, des wo oscheinend an Nutzn fian Owenda stifdt, im Hintagrund owa ohne Wissn vom Nutza Schodn vuasocht.

Da Nama kimmt vom Trojanischn Ross aus da Griachische Mythologie. Des woa a hejzans Ross, des wo de griachischn Belogara ois Gschenk tarnt hom und desweng vo de Trojana in de Stod Troja zaht worn is. In Wiaklichkeit san owa griachische Kämpfa drin ghuckt, de wo Troja in Untagong brocht hom.

Trojana kena obsichtle eingschleist wean oda oba aa zuafällig auf an Rechna kema.

Trojana, Viren und Hintatialn

Im Untaschied zum Computervirus ko si a Trojana ned sejbständig vabroadn. A infiziate Datei bsteht oba aus zwoa Komponentn: Ausm Virus und aus da Wiatsdatei. De Wiatsdatei is gnau gnomma a Trojana. Moastns wead oba eascht donn vo an Trojana gredt, wenn de Schodkomponentn ned zuafälli iba an Virus eingschleist worn is.

De moastn Trojana enthoidn oda installian Hintatialn oda Rootkits (Adminbaukostn), des is oba koa conditio sine qua non. Es gibt a Trojana, de wo koane Hintatial enthoidn und beispuisweis systematisch Owendadatn vasendn.

Bekonnte Trojana

• Netbus (Carl-Fredrik Neikter)
• Subseven oda Sub7 (Mobman)
• Y3K Remote Administration Tool (Konstantinos & Evangelos Tselentis)
• Back Orifice (Sir Dystic)
• Beast
• Zeus
• Blackhole exploit kit
• Flashback Trojan (Trojan.BackDoor.Flashback)

Trojanaschutz

De oanzige Meglichkeit si voa Trojanan effektiv z schitzn, is da Vazicht auf de Installation vo Programmen, wo ma ned exakt woass, wos heakema. Bsondas gfeali san Programm aus da Grauzone om Rond vo da Legalität.

Vui Antivirenprogramme scanna en Rechna aa auf Trojana. Es gibt oba koa Antivirenprogramm, des wo olle Trojana eakennt. Omdrei is da Schutz nua donn wiakungsvoi, wenn da Trojana no ned gstartet is. Wenn da Trojana beispuisweis scho a Hintatial installiert hod, nutzt aa s Lescha vom Trojana nix mea. Aussadem gibts Trojana, de wo s Antivirenprogramm deaktivian oda so manipulian, dass nimma eakonnt wean.

A Firewall und ähnliche Programme schitzn ned direkt gegn de Installation vo an Trojana. Monche Firewalls kena oba auf ned autorisiate Netzweakkommunikation aufmeaksom mocha oda Autostarteinträg ibawocha. Es gibt aba an Hauffa Trojana, de wo de Firewall deaktivian oda ibalistn.

Im Netz

• Russische Geldautomaten mit Trojaner infiziert, Meaz 2009, [1]