Weana Loga

Der Artikl is im Dialekt Ostestareichisch gschriem worn.

A Kriagl Weana Loga

Is Weana Loga (deitsch: Wiener Lager, Englisch: Vienna Lager) is a untagärige Biasuatn, de wos uaspringli aus Estarreich kummt. Duach estarreichische Auswaundara is zeascht noch Mexiko und spoda daun in de Stootn kumma.

Gschicht

Da Anton Dreher, a Lithographie vom Kriehuber Josef

Bis ins 19. Jhdt woar is Bia in Estarreich eha a dungle und rauchige Gschicht. Des is vo dem hea kumma, doss ma s Moiz friacha iwan offanan Feia oogräßt hod. In Englaund is ma in de 1830a Joa draufkumma, doss ma des aa mid ana Haaßluft mochn kunnt.

Da Anton Dreher aus Schwechat hod de neiche Technologie auf ana Raas kenna gleant und hods mid haam brocht.Ea hod sei Moiz daunn mid ana untagärign Hefn vasetzt und auf de Oat a neichs Bia braut. Im 1841a Joa is daun is easchte Wean Loga braut wuan, a beanstaafoabms Bia. Des woa fia de Zeid wos bsundas, weu wia scho gsogt, is Bia woa domolig recht dungl. Zweng dem hod mas aar a „hölles“ Bia ghaaßn, aa wauns noch de heitign Vahötniss eha hoibdungl warat. De neiche Biasuatn woa daunn in da k.u.k. Monarchie vuar oim aum Aufaung recht eafoigreich. Sei vualeifigs End hod s owa in da Zeid währand und nochn 1. Wöödkriag gfundn, weu in dera Zeid de Wiatschoft in Estarreich recht marod woa. Zweng dem hods suichane Sochn wia a hochweatige Braugeaschtn net gebm. Außadem san in da Zwischnzeid scho aundare, höllare Biare braut wuan.

Da Kaisa Maximilian vo Mexiko

Olladings is im 1861a Joa da Napoleon da III in Mexiko eihmaschiad und hod in Hobsbuaga Eazherzog Maximilian duatn ois Kaisa eihgsetzt. Midn Hobsbuaga san aar a poa Estarreich midkumma, unta aundam aa Biabraua. De drei Joa Herrschoft vom Maximilian haum greicht, doss si s Weana Loga in Mexiko etabliad und bis heid ghoidn hod. Spoda daun hod sa si aa no in de Stootn ausbraat. Olladings hod ma duatn foiweis d Rezeptua varändat, ma paunscht z. B. an Gugaruz eine.

In sein Uasprungslaund söwa hod mas launge Zeid net braut. Eascht in de 2010a Joa is wiedarum aufkumma. Heid wiads in Estarreich vo a poa greßare Konzean und etliche klaanare Brauarein heagstööt.

Charakta

Is Weana Loga is a beanstaa- oda kupfafoabms Voibia mid an leicht nussig-moizign, owa niamois siasslatn Gschmock. Oft is a leichte Rauknotn dabei. Da Äuk-Gehoit reicht vo 4,7- 5,5%. De beste Drink-Tempratua laungt vo 7-9°C.

Aundare Nauman

Vaschiedane Heastölla haaßn eahna Weana Loga u. a. Wiener Original, Wiener Biertyp oda Vienna Imperial Lager.

Im Netz

https://learn.kegerator.com/vienna-lager/

https://www.falstaff.at/nd/wiener-lager-ein-bier-mit-geschichte/