Ausschreibung und Vagob
A Ausschreibung is a Auffuadarung aun a bstimmte oda unbstimmte Zoih vo Untanehman, dass im Wettbewerb Aunbote zua Eabringung vo ana genau bschriabanan Leistung eireichn suin. De Vagob (dt. Vergabe) vom Auftrog eafuigt daun noch bstimmtn Vafoahn entweda aunan Best- oda Bülligstbieta.
Waunst du oisa Priavotpeasaun z. B. a Haisl baut haum wüsd, kaunst zuaran Baumasta gehn wosd wüsd und eahm sogn, du mochst ma des. A effantlicha Auftroggeba oda Sektoanauftroggeba deaf des ned, sundan dea muass se auns Bundesvagobegsetz (BVergG) hoidn, des wos im Zuge vom Beitritt zan Eiropäischn Wirtschoftsraum (EWR) ealossn wuan is, des hoaßt, ea muass Bau-, Liefa- und Dienstleistungan ausschreim; waun ma iwa'n Schwöönweat san, daun sogoa EU-weid. Effantliche Auftroggeba san Bundes-, Laundes- und Gmoastöön wia z. B. de BIG oda Asfinag. Sektoanauftroggeba san Untanehman in den Bereichn effantlicha Vakeah, Energie- und Wossavasuagung, Postdienste, ... oiso z. B. ÖBB, Flughofn Wean AG oda EVN. De Schwöönweate liagn fia Liefa- und Dienstleistungan im Bereich Wossa-, Energie- und Vakeahsvasuagung bei 418.000 EUR, fia olle aundan Liefa- und Dienstleistungan bei 209.000 EUR und fia Bauleistungan bei 5.225.000 EUR.
Grundsätz
[Werkeln | Am Gwëntext werkeln]De Vagob rennt noch an im Gsetz definiatn Vafoahn owe, im frein und lautan Wettbewerb unta Gleichbehaundlung vo oin Bewerban und Bietan und deaf nua zua aungemessanan Preisn aun befugte Untanehma eafuign. So a Vafoahn deafst nua daun mochn, waunst aa wiakli de Ohsicht hosd, dassd an Auftrog vagibst - ned wäust hoid nua amoi schaun wüsd ...
Wos fiara Vafoahn dassd nimmst, hängt davau oh, obsd untan oda iwa'n Schwöönweat bist. Drunta deafst olle Vafoahn nehma, driwa deafst oisa effantlicha Auftroggeba grundsätzli nua des offane Vafoahn nehma und ois Sektoanauftroggeba in da Regl es offane Vafoahn, es ned offane Vafoahn mit vuaherigm Aufruaf zan Wettbewerb unds Vahaundlungsvafoahn mit vuaherigm Aufruaf zan Wettbewerb.
Vagobevafoahn
[Werkeln | Am Gwëntext werkeln]Offans Vafoahn
[Werkeln | Am Gwëntext werkeln]Beim offan Vafoahn fuadast a unbstimmte Zoih vo Untanehman zua Aunbotsohgob auf; waunst iwa'n Schwöönweat bist, nocha muass de Bekauntmochung EU-weid eafuign. Bevuast daun de Ausschreibungsuntalogn aun de intressiatn Untanehman schickst, de wos se drauf gmödt haum, muasst de Eignungskriterien und des Zuaschlogsprinzip festlegn. De Eignungskriterien san de Vuaraussetzungan, de wos da Untanehma eafüün muass; olle Aunbote, de wos de ned eafüün, wean ausgschiedn. Zan Beispü, waunst a Bruckn ausschreibst, kaunst valaunga, dass des Untanehman scho mindastns amoi a Bruckn baut ghobt haum muass. Owa de Eignungskriterien deafn ned so sei, dass a Untanehman bevuazugt oda a aundas diskriminiat wiad. Da Zuaschlog geht entweda nochm Bestbietaprinzip, oiso du wöhsd des technisch und wirtschoflich beste Aunbot, oda nochm Bülligstbietaprinzip, des hoaßt, des Aunbot mim günstigstn Preis - des muasst im Vuahinein festlegn.
Noch da Aunbotsfrist kummts zua Aunbotseaöffnung; de Auzoih und Nauman vo de Untanehman, de wos Intaresse zoagt haum, muasst bis dahin geheim hoitn. De Aunbote wean prüft, ob's eh formal richtig und vuiständig san, ob de Grundsätz eighoidn wuan san und so weida, waun ned, wiad's glei im Vuahinein ausgschiedn. Daun kummts zan Aufklärungsgespräch und zan Zuaschlog fia's beste bzw. bülligste Aunbot, des wos no iwa is. Iwa'n Ausschreibungsinhoit deaf dobei ned vahaundlt wean. Waunst blaue Autos ausgschriam hosd, deaf ned ana kumman und sogn, geh mechst koane rodn, de san vü schena.
Ned offans Vafoahn
[Werkeln | Am Gwëntext werkeln]Beim ned offanam Vafoahn mit vuaherigm Aufruaf zan Wettbewerb ruafst zeascht a unbstimmte Zoih vo Untanehman zua Ohgob vo Täunehmaaunträgn auf. De, wos se drauf gmödt haum, kaunst prüfn und di fiara poa davau entscheidn, de wosd daun zua Aunbotsohgob auffuadast. Nocha muasst de Eignungskriterien unds Zuaschlogsprinzip festlegn, schickst de Ausschreibungsuntalogn aus und woatst auf de Aunbote, dobei güüt wieda Vahaundlungsvabot.
Beim ned offanam Vafoahn ohne vuaherigm Aufruaf zan Wettbewerb gehst hea und entscheidst di fiara bstimmte Zoih vo geeignetn Untanehman, de wosd zua Ohgob vo Aunbotn auffuadast. Nocha geht's weida wia obm.
Vahaundlungsvafoahn
[Werkeln | Am Gwëntext werkeln]Beim Vahaundlungsvafoahn mit vuaherigm Aufruaf zan Wettbewerb ruafst zeascht a unbstimmte Zoih vo Untanehman zua Ohgob vo Täunehmaaunträgn auf. Vo de, wos se griaht haum, entscheidst de fia mindastns drei, desd zua Aunbotsohgob auffuadast; de Gründe fia de Entscheidung san schriftli zan auge'm. De Bewerba wean daun, nochdemsd de Eignungs- und Zuaschlogskriterien festglegt hosd, zuara Vahaundlung eiglodn, wo iwa'n gaunzn Auftrogsinhoit vahaundlt wean deaf, owa ned iwa de Zuaschlogskriterien. Da Ohschluss vo de Vahaundlungan muass bekaunnt ge'm wean mit ana Auffuadung, dassd a letztas Aunbot legst. Es gibt aa de Möglichkeit vo an „short listing“ oda an „quasi offan Vafoahn“, des muass in da Ausschreibung aunkündigt wean, daun brauchst nua mim Bestbieta vahaundln.
Beim Vahaundlungsvafoahn ohne vuaherigm Aufruaf zan Wettbewerb entscheidst di im Vuahinein fiara bstimmte Zoih vo geeignetn Untanehman, de wosd zua Ohgob vo Aunbotn auffuadast. Nocha geht's aa wieda weida wia obm mit ana Vahaundlung.
Weitare Vafoahn
[Werkeln | Am Gwëntext werkeln]- Direktvagob (nua bis 100.000 EUR)
- Direktvagob mit Bekauntmochung
- Rauhmanvaeiboarung
- Dynaumisches Beschoffungswesn
- Wettbewerblicha Dialog
Prüfung und Ausscheidung vo Aunbotn
[Werkeln | Am Gwëntext werkeln]De Aubote, wosd kriagt hosd, muasst zeascht amoi prüfn, ob de Vagobegrundsätz eh eighoidn wuan san, ob's fuamrichtig und vuiständig san, ob's rechtzeitig eiglaungt san, ob se da Bieta und seine Subuntanehma dofia eignan, wäu waunst de Heastöllung vo Schnecknortbetonpfähln fiara Baugruamsicharung ausschreibst und se da Zuckabäck drauf mödt, nocha wiad a ausgschiedn. Daun, ob da Preis aungmessn und rechnarisch richtig is, wäu Aunbote, de wos vü z'büllig san, miassn aa ausgschiedn wean, und ob da Bieta wirtschoftli und technisch aa in da Log is, dass a ihn Auftrog eafüün kau.
Ausgschiedane Bieta miassn davau vaständigt wean, se kennan daun beim Bundesvawoitungsgricht a Nochprüfungsvafoahn beauntrogn, wauns moanan, dass eahna des ned passt.