Intanazionala Dåg fu da Muataschbråch

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
Shaheed Minar, s'Meatiaradenkmoi in Dhaka, Bangladesch, wo an de Dodn fum 21sdn Februa 1952 earinat wiad

Da Intanazionale Dog fu da Muataschbroch is jeds Joa a Gedenkdog fu da UNESCO, wos um d'Föadarung fu da schbrochlichn und kuituareln Füfoit ged und um Measchbrochigkaid. Saidn 2000a Joa foid dea Dog oiwai auf n'21tn Februa.

Ungefea d'Höftn fu ole Schbrochn des auf da Wöd gibt san fum Ausschdeam bedrod und desweng hod de UNESCO de Iniziatifn ghobt, den Dog global dafia zan widmen, das Schbrochn ois Zaichn fu kuituarela Idendidet wos weatfois san und a gföadat ghean. Iwahaupt han Schbrochn a kostboare Soch und s'Recht auf de aigane Muataschbroch wia a des, das d'Laid a nu aundane Schbrochn dazua leanan han da Schlissl dafia, das si d'Laid auf da Wöd bessa faschdengan und meara Reschbekt fia aundane Kuituan haum.

Dea Dog, dea wo a jeds Joa is, soid mea Aufmeaksaumkaid fia Mindahaitnschbrochn bringa, fia Schbrochn fu Migrantn und Flüchtling, fia Regionalschbrochn und bsondas natiali fia kloane Schbroch de wo boid ausschdeam kintadn, wai s'neama fü Laid gibt, de wo de nu kinan. 2005 hod ma bsondas d'Situazion fu da Zaichnschbroch fia Dearische und a d'Blindnschrift aufzoagt. 2008 is sogoa s'gaunze Joa zan Intanazionaln Schbrochnjoa ausgruafn woan.

Bsondas in Lenda wo eascht jez da wiatschofliche Foatschrit so richdig Âizug hoit han fü indigene Schbrochn bedrod, wia in da Amazonasregion in Brasilien, in Afrika, Südostasien und Naiginea. Owa a in de Indusdrilenda gibts an Haufn kloane Regional- und Mindahaidnschbrochn de koan bsondan rechtlichn Schdatus haum und a neta nu fu weng Laid gret wean. Fu de ungefea 6.000 Schbrochn des nu im 1900a Joa gem hod, gibts haid e blos nu 2.000, de zu mindest fu a boa Laid nu aktif gret und faschdaundn wean.

Wias dazua kema is[VE | Weakln]

Im 1952a Joa hod d'Regiarung fum domolign Bakisdan bschlossn, das Urdu d'oanzige ofiziele Schbroch fum Laund sai soid, obwoi s'Urdu aigentli neta in Westbakisdan de am mearan fawente Fakeasschbroch woa und sogoa neta fu 3% fu de Laid d'Muataschbroch woa. In Ostbakisdan, des wos haid da unobhengige Schdod Bangladesch is, haum d'mearan Laid owa Bengali gret und es hod fost iwahaupt neamt Urdu kina. Am 21. Februa fu dem Joa hods an grossn Protest gem in Dhaka, da gresdn Schdod fu Ostbakisdan, wo d'Laid geng des Gsez demonsdriad haum. Do hod de Bolizai auf t'Demonsdrantn gschossn und es san sogoa Laid daschossn woan.

De Konflikt um dschbrochliche und kuituarele Untadrükung fu Ostbakisdan hod in de Joa drauf oiwai wida fia Eaga gsoagt, bis si da Ostdai im 1971a Joa ogschboitn hod und da naiche Schdod Bangladesch grünt woan is. Da 21sde Februa is doat daun zan "Dog fu de Meatiara" danaunt woan und auf Aundrog fu Bangladesch is dea Gedenkdog im Joa 2000 sogoa zan intanazionaln Dog fu da Muataschbroch woan.

Bsondana Fokus[VE | Weakln]

  • 2008 woa da Fokus fum 8n Intanazionala Dog fu da Muataschbroch auf da bsondan Bedaitung fu schbrochlicha Füfoit und darauf, wia wichdig Schuiuntaricht in da aigenen Muataschbroch is. 2008 is fu da UNESCO a glaichzaidig s'intanazionale Schbrochnjoa und s'Moto is: “languages matter!”, « Les langues, ça compte!», «¡Los idiomas, sí que cuentan!»
  • 2007 hod d'UNESCO bsondas auf de Fabindung zwischn da Bedaitung fu da Muataschbroch und Measchbrochigkait hingwisn
  • 2006 is draun earinat woan, das fu de 6.000 bekauntn Schbrochn, de mearan recht kloa und akut fum Ausschdeam bedrod san
  • 2005 han d'Zaichnschbroch fu de Dearischn und d'Blindnschrift im Foadagrund gschdaundn
  • 2004 han muataschbrochliche Schuibiacha und Untarichtsmaterialien im Foadagrund gschdaundn
  • 2003 is drauf hii gwisn woan, das mea Weabung und Föadarung fia d'Muataschbrochn gmocht wean soi
  • 2002 is da Dialog zwischn faschidane Kuituan und untaschiadliche Schbrochn bsondas betont woan
  • 2001 is draun earinat woan, das a bis jez ned faschriftliche Schbrochn a wichdiga Dail fum kuituareln Eabe fu da Menschhaid san
  • 2000 woa da easchde Intanazionale Dog fu da Muataschbroch, nochdem im Nofemba 1999 auf Iniziatifn fu Bangladesch, des fu da UNESCO bschlossn woan is

Schau a unta[VE | Weakln]

Im Netz[VE | Weakln]