Braunaua Palamént

Aus Wikipedia
Wexln zua: Navigation, Suach
Der Artikl is im Dialekt Hausrukfiatlarisch gschrim worn.

Braunaua Palament hoasst ma d'Fasãmlung fu de boarischn Aufschdendischn géngan habsbuagischn Kaisa, dé im Dezemba 1705 in Braunau am Inn zãm kema is. Braunau und s gãnze Îfia'l woan dåmåis a Dail fu Boarn. Söwa håd si dés Palament dåmåis "Lãndesdefensionskongress" gnent und håd si ois legitime Géngregiarung fu Boarn faschdãndn. Da Foiksaufschdãnd géng de kaisaliche Bsézung fu 1705/06 is haid foa oim duach d Sendlinga Moadwainåcht bekãnt und d Gschicht fum Schmid fu Kochi. Wéniga bekãnt is, das de Rebelion fu de Bauan ausn owaboarischn Owalãnd neta a klõana Dail fu am fü gressan Aufschdãnd woa, dea si iwa waide Regionen fu Niadaboarn, s Îfia'l und s östliche Owaboarn zong håd. D Aufschdendischn hãm de Schdet und Fésdungen in deara Gégend unta eana Gewåit bråcht oda earowat und d Rebelion håd a aufn Boarischn Wåid, an Dail fu da Owapfåiz und Kehlheim an da Donau iwagrifn.

Da õanzige echde Foiksaufschdãnd in da boarischn Gschicht håd si oiso géng a Fremdheaschåft gricht, dé nåch da Fadraibung fum Kuafiascht Max Emanuel s Lãnd ausbait håd. D Rebelion woa loial géngiwa in Kuafiaschdn im Exil und woit eam ois rechtmessign Heascha zruk hãm. D Aufschdendischn hãm ois kuaboarische Lãndesdefendion fia dåmålige Zaid a grosse Armé aufgschdöd und sogoa a Palament âigricht, dés ém in Braunau Råd ghåidn håd.


Gschicht[VE | Weakln]

Am 26. Nofemba 1705 is d Fésdung fu Braunau fum doating kaisalichn Komandantn Georg Ignaz Gråf fu Tattenbåch an de Aufschdendischn iwagém woan, dea drauf fu de Rebeln âigschbead woan is. Auf dés aufi hãm si de Fadreta fu da Rebelion am 21. Dezemba bain Brainigna Wiat zãm gfundn, dea in Freiherrn vo Paumgarten ghead håd und hãm doat driwa grét wia s waida gê soid. Ois Åbgeoadnete in Braunau woan Fadreta fu ole fia Schdend dabai, fum Å'l, fu da Gaistlichkaid, Biaga und a Bauan, sowia de milidearischn Ãfiara fum Aufschdãnd. Damid håd s in Boarn nu foa da Franzesischn Revoluzion und foam frian daidschn Parlamentarismus a easchds Palament gém.

Bschliss fum Defensionskongress[VE | Weakln]

D grosn Bauansu, foa oim dé mid an grosn Hof dahõam, woan am Ãfãng unta de Rebeln schdoak fadredn. Es håd si åwa zoagt, das gråd dé kõane bsondas falessliche Soidådn san. Eanare Fådan hãm d Ofizia bschdocha, damid s eanare Buam wida hõam gê låssn. Aus dém Grund håd da Lãndesdefensionskongress a am 23. Dezemba 1705 foigends bschlossn:

„Und soll sich kein Officierer, er auch sey, Macht und Gewalt nehmen, einen gestelten Mann vo seiner Compagnie, wohin er gestellet worden, zu entlassen, damit nicht geschehe, wie man vormahls gethan, daß nemlich die Officierer vo denen reichen Bauern-Söhnen das Geld nehmen, die Armen alsdann stehen bleiben.“


Niadalåg[VE | Weakln]

Wia am 9. Jena 1706 in Braunau d Nåchricht âidroffa is, das in Hofmã sâi Koa (Corps) bai Aidnbåch fanicht woan is, han d Laid fum Brauna Palament zeascht amåi recht driabsini woan. Åwa schã am negsdn Dåg håd da Defensionskongress entschidn, das de in de Dag dafoa bschlossane Schdrategi waida fafoigt wiad, bsondas das waida Widaschdãnd glaist wiad, géng de Drupn fun Kaisa und håd a Genaralmobilmåchung und s Aufschdön fum am aigenen Dragonaregiment bschlossn. Untaweafn woit ma si auf kõan Fåi. Auf da ãndan Saitn hãm d Fadreta fu de Schdet und Meak oiwai mea drauf drengt, das do Fridnsfahãndlungen gmåcht wean soin, befoa eana Gmõa oda Schdåd womegli duachn Griag zaschdead wiad. Déswéng håd da Defensionskongress an Deputiadn zan Fiaschteazbischof fu Såizbuag, in Eanst Gråf fu Thun, gschikt, damid dea iwan Gråf Tattenbåch mim Georg Friedrich Freiherr vo Kriechbaum Kontakt aufnema soid, dea da Genaral fu de kaisalichn Drupn woa.

Am 11. Jena 1706 is de Deputazion nåch Såizbuag aufbrocha um doat iwa an Fridn zan fahãndln. Zu deara Delegazion håd da Braunau Biagamoasda Dianhad (Dürnhardt), da Baumgoatna (Freiherrn vo Paumgarten) und da Brilmõa (Franz Bernhard Freiherr vo Prielmayr) ghead, so wia da Biagamoasda fu Buaghausn, da Georg Ludwig Harter und da Baua Frãnz Någischdéda (Franz Nagelstätter). Am 13. Jena is Scharing an de kaisalichn iwagém woan, am 16. Cham, am 17. Braunau und am 18. Jena 1706 håd Buaghausn ois lézde Schdåd kapituliad, dé nu in da Hãnd fu da Lãndesdefension gwén is.

Diarektoarium[VE | Weakln]

Braunauer Parlament Spottbild.jpg

Nåch n Buach fum Henric L. Wuermeling, dea de Gschicht fum boarischn Foiksaufschdãnd 1705 genau reschaschiad håd, woan foigende ségs Åbgeoadnete s Diarektoarium fum Brauna Palament:

  • Da Baumgoatn Frãnz (Franz Freiherr vo Baumgarten oder Paumgarten) ois Haushea a Bresident fum Palament.
  • Da Aham Sep (Joseph Franz Graf vo Aham) aus Mauakiara.
  • Da Hãns Baptist Laidn (Johann Baptist vo Leyden) aus Scharing
  • Da Brilmõa Frãnz (Franz Bernhard Freiherr vo Prielmayr) ois Fadreta fu da Regiarung fu Buaghausn.
  • Da Freiherr vo Widmann ois Rentnmoasda (Kassia) fu Buaghausn.
  • Da Owast d'Ocfort (Ludwig Karl Baron d´Ocfort) ois Genaral und Griagsminisda fum Diarektoarium.
  • Da Plingansa Schua'l (Georg Sebastian Plinganser) håd sâi Funkzion an dn d´Ocfort ågém miassn und is dafia „Sekredea fu da Griagsdiarekzion und Brotokoifiara fu da Lãndesdefension“ woan.

Sunst woan nu ois Delegiate da Hatinga Wiat (Paulus Hartinger) ois Fadreta fum Magisdrat Buaghausn dabai, da Platianer Frãnz - Sailamoasda und Fadreta fu de Buaghausna Biaga und da Någischdéda Frãnz (Nagelstätter), fia de Bauan. Ofiziela Woatfiara fu de Bauan woa åwa da Dana Ãndre (Andreas Thanner), a Kupfaschmid fu Braunau.


Da Kupfaschdich[VE | Weakln]

Kupfaschdich fum Beziaksmuseum in Braunau am In (11859) Transkripzion: Dr. Stephan Deutinger, Minga

Titl: Das Rebelische bayrn Parlament zu Brauna

Dext:

  1. Der Französische Han so die Rebelische bayrn aufgeweckt.
  2. Stadt Richter Martin Schalckh. Burger, Bauren und alle Lansleith, Get Schlagts Kaisa Landsknecht Todt alzgleich.
  3. Hofbaur Georg Hamershlag. i gei däzu mein hab und guet, Wans a glei gilt mai aigens bluet.
  4. Millner und Stadschreiber zu filshoffen. Sagts engre meinug nur gsteift oh, denn unserm Churfiascht ligt Mächtig vil dro.
  5. Richter vo Pläting Adam Zweiffelhafft. Ich sags engs grod und schweig nit still, der schluß hart käma wird zu end und zil, dan skaisa leith seind starck und frisch, werden uns klopfa wie d’stockfisch.
  6. Schneider zu Brauna. Ich allein schlag 6 mann Todt.
  7. Schulmaister Peter Limel. Sagts mirs na, wans get zum Räffä, dschuler bueben miessen al mit läffä.
  8. Matthaeus Craus burger und Metzger zu Kelheimb. sols halt geltn mein balck und krogn, so will ich des Kaisa Soltaten helfa daschlogn.
  9. Pfarer und bauren Commentant, so Camb eingenohmen. Die Heillig schrifft sagt klar und frey, daß nit zwey Herrn zu Dienen sey.
  10. der Keyserlich Alliierte Soltat zeigt den Rebelischen bayrn Parlament die feigen.
  11. Christoph Haltnvöst Stadtschörg. alle abdöckha und schörgenknecht, stehn eng a zu diensten recht.
  12. ein Schwartzer Hund so dem Bayrischen Parlament auf das Concept Sch...


Beleg[VE | Weakln]