Gonâve-Insl

Aus Wikipedia

D'Gonâve-Insl (frãnzäsisch: Île de la Gonâve, früher Île de la Gonaïve) is a Insl vu de Großn Ãntüin in da Karibik. Sie gheat zum Stååd Haiti und liegt im Vawåitungsgebied Ouest („Westn“), in dem d'Insl a eingnes Arrondissement ausmåchd. D'Insl bestehd aus de Gmoana Anse-à-Galets (Hauptståd vum Arrondissements) und Pointe-à-Raquette. Auf da Insl fãngan ålle Postleitzåihn mid 65 ãu.

D'Gonâve-Insl liegt 50 Kilometa westnoadwestli vu da haitianischn Hauptståd Port-au-Prince im Golf von Gonâve. Mid iara Läng vu ungefäa 56 Kilometa, da Broadn vu 16 Kilometa und da Flächn vu 743 Quadratkilometa is's d'greßte Nåchbåainsl vu Hispaniola und damid d'greßte Insl, de Haiti mid kam ãndan Lãnd teun muaß. D'Gonâve-Insl bestehd zum greßtn Teu aus Kåikstoa und is vu mearare Riffe umgem. D'Insl is trucka, hüglig und ziemli öd, ia hechsta Beag schåfft a Hechn vu 778 Meta. Im Joa kemman zwischn 800 und 1600 Millimeta Niedaschläge zsãmm, wobei de hecha glengnen Gengdn eha mea dawischn. D'Übaweidung und d'Wåssavaschwendung san de greßan Probleme vu de ungefäa 200.000 Leid (Schätzung fia 2005^[1]) auf da Insl, auf dea's kane Flüss oda Bäch gibd.^[2]

D'Gonâve-Insl wåa d'letzte Gengd vu Haiti, in de si de Taínos (a Uaeinwohna-Gsöischåft) zruckziang håm kina, nåchdem's 1503 vu Hispaniola em duathi gflicht han. Vu eana stãmmd da heidige Nãm vu da Insl, da wås de Taínos nämli Guanabo ghoaßn håm.^[2] Späda is de Insl a Piratnsitz gwen.^[3] 1925, wia de USA Haiti bsetzt ghåbt hãm, håd si da US-Offizier Faustin Wirkus zum Inslkini Faustino II (le roi blanc de la Gonâve – „da weiße Kini vu La Gonâve“) ausgruafn – ea is åwa 1929 vu da Regiarung vu Haiti vatrim woan.^[4] Nåch am Oakan, dea 1976 Teile vum Südn vu Haiti verwüstet håd, hãm si einige Leid auf da Gonâve-Insl ãugsiedlt und duat de eastn lãndwiatschåftliche Deafa vu da Insl aufbaud.

[dro werkln] Nåchweise

1. ↑ MSN-Encarta
2. ↑ ^{2,0 2,1} Meyers Großes Konversations-Lexikon (1905)
3. ↑ National Aeronautics and Space Administration
4. ↑ Faustin Wirkus auf poles.org

Koordinaten: 18° 50' N; 73° 5' W