Waifåita

Der Artikl is im Dialekt Hausrukfiatlarisch gschrim worn.

A Dobfpfauenaug is a Waifåita dén ma bai ins nu oft siagt

Waifåita (a Faifåita, Pfaifålter, Zwifåita, Dåg- oda Nåchtfoita und Summafogi gnennt, auf Hochdaidsch: Schmetterling, Lådainisch: Lepidoptera) han a Insektnoat dés auf da gãnzn Wöd aussa in da Antarktis gibt und de mid iwa 180.000 Untaoatn, dé wo zu 127 Familien und 46 Üwafamilien zãmgfåsst wean, nåch de Kefa de oatnraichsde Insektnoadnung han. Es wean oiwai nu a jéds Joa ungefea 700 naiche Oatn dazua gfundn. In Mitlairopa gibt's ungefea 4.000 faschidane Waifåita-Oatn.

Schwärma Agrius convolvuli

Etimologi fum Woat

Dés uaschbringliche Woat in de boarischn Dialekt fia de Schmetaling woa Waifåita, Pfaifåita oda Faifåita. Dés kimd fum åidhochdaidschn „fifaltra“ (åidenglisch: „fifealde“), wås so fü wia flatan oda Flatara hoast und is a mid'n italienischn Woat „farfalle“ fawãnt, so wia doatn a de Schmetalingsnudln hoassn. A ãndas Dialektwoat dafia woa Summafögi, wai ma's am mearan im Summa zan seng griagt håd. Dé Woatkreazion is a analog zu de Bêfögi, oiso de Bienen. Ois wås in da Luft umadum fliagt håd ma im Dialekt fria Fögi gnend.

S'Woat Schmetaling is in Bayern und Ésdaraich eascht so um's 18tn Joahundat aufkema und kimd uaschbringli aus'n Slawischn. Genau so wia de Englenda haid „butterfly“ sång, oiso Budafliang, hãm de Tschechn, de Sorbn und de Boin de Waifåita a gnend und Buda hoast auf Slawisch smetana. A in mãnche daidsche Dialekt, dé fü Kondakt zan Slawischn ghåbt hãm, håd dãn da Buda „Schmand“ oda „Schmetten“ ghoassn. Und aso is a des Woat „Schmetterling“ iwa Schlesien und Ostdaidschlãnd ins Hochdaidsche kema. Nåchdém si de naiche hochdaidsche Schriftschbråch im 19tn Joahundat a in Bayern und Éstaraich oiwai meara ausbroat håd, san de oidn Dialektweata oiwai meara faschwundn, so dass's haid fåst kõana mea kend und a in da modeanen Umgãngsschbråch sågt ma haid fåst oiwai „Schmetterling“, håid gråd a weng dialektmassi gsågt.

Des Woat Nachtfoita wead aa heid no im Boarischn füa divease nachaktive Artn wia Mottn und Schwärma haifiga vawendt. Ois Voabuid füa de Foita (z. B. da Zidronafoita) nennan vui im Owaboarischn de dågaktivn Foita nacha Dågfoita, oda nua Foita.

Weblinks

Commons: Waifåita – Buidl, Videos und/oda Audiodatein