Led Zeppelin
Aus Wikipedia
 |
Der Àrtikl is im Dialekt „Inglstädtarisch“ gschriem worn. | |
 |
Es werd grod dischkriert, ob der Artikl fia de „Berign Artikl“ daugt, red mid! |
|
 |
|
|---|---|
| Ofang: | Septemba 1968 |
| End: | 4. Dezemba 1980 |
| Genre: | Hard Rock, Blues Rock |
| Website: | http://www.ledzeppelin.com/ |
| duatmois | |
| Gsang, Mundharmonika: | Robert Plant |
| E-Gitarr, Theremin, Mandolina: | Jimmy Page |
| Bass, Keyboard, Gitarr, Orgel: | John Paul Jones |
| Schlogzeig, Perkussion: | John 'Henry' Bonham |
| heidzdogs | |
| Schlogzeig, Perkussion: | Jason Bonham |
Led Zeppelin is a englische Rockband vo de 60er und 70er Joah. Se guitn ois Pioniere vom Hard Rock und Heavy Metal. De spuin aba a no a weng Blues und Folkrock.
De Band hot vo 1968 bis zua Aflösung 1980 immer mit de gleichn Leid gspüd. Da Robert Plant (Gsang), Jimmy Page (Gitarr, Mandolina), John Paul Jones (Bass, Keyboard, Orgel, Mellotron) und 'm Schlogzeiger und Percussionspieler John Bonham. Letztara is im Septemba 1980 verstorbn. Am 10. Dezemba 2007 woa a Re-Union Konzert unta ehrnam oidn Nama 'Led Zeppelin', am Schlogzeig war am John Bonham sei Bua, da Jason g'hockt.
Inhaltsverzeichnis |
[dro werkln] Bandgschicht
[dro werkln] Vorgschicht und Gründung
Oiso de Ofäng kenna af de britische Rockband The Yardbirds bezong werdn. Da Jimmy Page hat do ab '66 Bass und späda E-Gitarr gspui. Nachdem da Jeff Beck und späda a da Keith Relf und da Jim McCarty wegganga san, hot da Jimmy Page und da übrige Bassist Chris Dreja de Band umbaut.
Z'erscht woit da Jimmy Page den Schlogzeiga B.J. Wilson und an Terry Reid, beide vo Procol Harums, die woitn oba net. Da Terry Reid hat dann an Robert Plant vorgschlong, der z'erscht bei Hobbstweedle gsunga hat. Der hat dann gmoant dass den Schlogzeiga John Bonham afnehma soitatn, wei da Robert den vo na uroidn Band Band of Joy kennt hot. Ois dann da Dreja a ganga is hom's an John Paul Jones ghoit, der scho moi mit denne gspuit hot.
Obwoi da Jimmy Page no da letze "Yardbird" war, hom se se 1968 The New Yardbirds gnannt, wei do no Yardbird-Verträg zum macha warn.
Schuid am Namma is woi da The Who-Schlagzeuger Keith Moon dea gsagt hat, dass a Band mit und um an Robert Plant wia a bleierns Luftschiff ostirzn dad („The Band will go over like a lead zeppelin“). Des hot ja im Englischn zwoa Bedeitunga – easchtns: Verb - to lead [liːd] („führn“) und zwoatns: Adjektiv - lead [led] („bleiern“). Zur Entwirrung homs as a wegglassn.
[dro werkln] As erste Oibum: Led Zeppelin
Bei da erstn USA-Tournee im Winter '68/'69 warn Led Zeppelin no d'Aufwärmband für Vanilla Fudge, Iron Butterfly, Alice Cooper und Country Joe and the Fish.
Zu dera Zeit hot Led Zeppelin mit Atlantic Records an Vatrag g'macht und glei eana Debütoibum (in nua 30 Stund) afgnumma. Am 12. Januar 1969 is des Oibum dannad endlich rauskumma. Die hom glei im erstn Oibum a boa Genres mitnanda verzwerlt. In Good Times Bad Times und Communication Breakdown is a deitlich härtara Sound zum hearn wia bei de Liadln Black Mountain Side und Babe I'm Gonna Leave You, do san Elemente vum Folk unvakennboa. De Afnahmekostn warn mit 1.800 Pfund (2.356 €) ziemlich billig, dafia hots 3,5 Mio Pfund (4,58 Mio €) eigspuid.
Noch a boa verbatzte Aftritte im Fernseh, v.a. in Dänemak und in Deitschland, hot sich de Band und da Manager Peter Grant - dea füa den Erfoig vo Led Zeppelin stäht - dafia entschiedn, sich vo Fernsehafnahmen weg z'beweng und mehra af Oibums und Liveaftritte zum setzn. Nachdem oba 1970 dann Whole lotta love in Deitschland bekannt gwordn is, hot Radio Bremen de 1969er Afnahmen ausm "Beat Club" doch a boa moi im Fernseh abgspuit.
[dro werkln] Da Weg zum Erfoig
Des zwoate Oibum 'Led Zeppelin II', war vom musikalischn hea genauaso wias Erste. Es beinhoitet Heartbraker und Whole lotta love, mit Gitarrnriffs de ma se leicht merka ko. As Cover war a Gruppnbüddle mitm 'Roudn Baron'. In de USA des Oibum Platz oans, und hot somit 'Abbey Road' von de Beatles vadrengt. De Zeidung 'Rolling Stone' hot an Jimmy Page wega seiner musikalischn Qualität zum „absolute number-one heaviest white blues guitarist“ gmacht.
Im Rahma vo da erstn Europatournee hot de Band im Freijoah 1970 a de erstn vier Konzerte in Deitschland gebn. Ogfanga im Mingana Circus-Krone (8ta März). Veranstoidet san de Konzerte - wia de spädan Auftritt in Deitschland - vo da Konzertagentur Lippmann & Rau.
Fia de Afnahmen von eahrnam drittn Oibum 'Led Zeppelin III' hot se Led Zeppelin zum 'Bron-Yr-Aur', am entlegnem Landhaus ohne Stom nach Wales verzong. Daraus hot se dann a akustischer Sound der vo keltischa Musi und Folkmusi beeinflusst woa, entwickelt. Jimmy Page hot de neie "akustische" Seitn von eharm seiba entdeckt (Gallows Pole, Tangerine).
As erste Liadl vo 'Led Zeppelin III' is da legendäre 'Immigrant Song', Robert Plant is af da Island-Tour im Somma '70 af Island inspiriert wordn. Nachm Aufenthoitsort san a Liadl betitelt wordn: Bron-Yr-Aur (Physical Graffiti) und Bron-Yr-Aur Stomp (afm Cover foisch als Bron-Y-Aur Stomp bezeichnet). Led Zeppelin III schliaßt mit Hats Off to (Roy) Harper, a Hommage an den britischn Singer-Songwriter "Roy Harper".
[dro werkln] Woidruhm
Nach erfoigreichn Tourneen duach Nordamerika und Japan im Somma 1971 is im Novemba des mit nua vier kryptischn Symbolen (
) betitelte vierte Oibum da Band rauskumma.
Kenna duad ma den Tonträga unta de Bezeichnunga Led Zeppelin IV oda 'Four Symbols'. Mitm erstn Stickl 'Black Dog' hot de Band an Hardrocksound gschoffn, weicha sowoi Plants Gsang, ois a de musikalischen Fähigkeitn vo Page und vom Schlogzeiga Bonham hervoahebt. 'Rock and Roll' spiegelt de stilistischn Urspring vom Hard Rock im Rock'n'Roll vo de 50er und 60er Joah wieda. As Paradestickl vo dera Plattn is ohne Zweifl de Rockballade 'Stairway to Heaven', weichas woi as bekannteste Liadl vo Led Zeppelin is. Manchmoi werd Stairway to Heaven ois besta und einflussreichsta Rocksong alla Zeitn ghandelt. Weidare bekonnte Stickl san da Rolkrocksong 'Going to California' und de Ballad 'When the Levee breaks'. De Plattn is übawiegend im 'Headley Grange', am abegelegen Landhaus in Hampshire afgnumma wordn.
hot net nua guade Kritikn gerntet, sondern hot se a aiserst guad verkafft. Aloi in de USA san bis heid 23 Mio Exemplare verkafft wordn. Damit is duad oins dea vier am meist verkafftn Oiben ibahaupt.
1972 foigtn drei kuaze Tourneen, weiche de Band neba Australien und Neuseeland obamois in de USA und Japan aufträdn hom lassn. Af besagta und a spädarn Tour duach de USA warn de Musiker in ehrnam eigana Flugzeig untawegs, a Boeing 720. Nach zwoa Aftrittn in da Schweiz (Montreux) hot im Novemba a viermonatige Tournee duach Groußbritannien begonna.
Nach oina Europatour im März '73 is mit 'Houses of the Holy' des finfte Oibum und a erfoigreiche US-Tournee gfoigt. Bei de letztn drei Konzerte vo dera Tour im New Yorker Madison Square Garden is a Groußteil vo de Fuim- und Tonafnahma für den 1976 erschienana Konzertfuim 'The Song remains the same' (mit Soundtrack) entstandn. De Oabat am Fuim is im Heabst '73 fortgsetzt wordn.
1974 hat Led Zeppelin as eigene, oba Atlantic Records untageordnete Label 'Swan Song Records' gründet. Außa Led Zeppelin hom a unta andrem Bad Company, The Pretty Things und Maggie Bell bei dem Label untaschriebn. Fia de Gstaltung vom Logo homs as Buidl 'Evening, Fall of Day' (1869) von William Rimmer hergnumma, weichas Apollo doastöit. Des Logo is af vui Fanartikeln ogedruckt wordn.
Eahrna ersts Doppeoibum 'Physical Graffiti' hom die vier Musiker 1974 aufgnumma. Des Oibum is im Freijoah 1975 erschiena und beinhoitet neba neie a scho freiah geschrieme Stickl, de aus de Sessions fia de letztn drei Oiben iba blieben san. Oina vo de bekanntestn und beim Live-Publikum beliebtestn Songs vo dem Oibum is Kashmir, a Stickl, in dem die Musiker orientalische Einfliss veroabeit hom. Nach eigene Ogabm is da finfte Titl 'Trampled Under Foot' Robert Plants Lieblingsliadl vo Led Zeppelin.
[dro werkln] Weidare Tourneen
Ofang 1975 hot ma zerscht a weidare US-Tournee untanumma. Noch zwoa Joar Bühnaabstinenz in Großbritannien hot de Band außadem finf Konzerte voa insgsamt 85.000 Zuschauern im Londoner Earl's Court Exhibition Centre gebn, vo dem Mitschnitt späda af a DVD veröffentlicht wordn san.
Im Auguscht '75, kurz voarm Beginn vo a geplantn Stadiontournee durch de USA, san da Robert Plant und sei Frau in an Autounfall auf Rhodos verwickelt wordn, bei dem da Plant se sein Knechl brocha hot. Daduach woas unmöglich de Tour oztreten, hot de Band bschlossn, mit da Oarbeit an am neua Oibum ozfanga. Bei de Aufnahma zu ehrnam sechsten Studiooibum Presence in de Mingana Musicland Studios is da Robert Plant notdrunga im Rollstui bzw. in am Sessel rumghockt.
Im Spädherbst 1976 san schließlich da Konzertfilm The Song Remains the Same und da begleitende Soundtrack veröffentlicht wordn. Obwoi de Konzertaufnahma von 1973 warn, is dea Füm fia mehr ois 20 Joah as oinzige Dokument vo de Liveauftritte von Led Zeppelin bliebn. De Livemitschnitte san duachsetzt von psychedelischen Spielfilmsequenzen und Szenen ausm Backstagebereich.
A weidare umfangreiche US-Tour, die emfois innahoib wenger Tog nach ihra Okündigung ausverkauft woa, is 1977 gfoigt. Af dehra Tour hot die Band voa jeweis circa 20.000 Zuschauern sechs ausverkaufte Konzerte hindaranda im New Yorker Madison Square Garden gspuid. Kurz voam End da Tour - de Band hot no siem restlos ausvakaffte Konzerte voa se ghobt - hot am Robert Plant die Nachricht erreicht, dass sei finfjähriga Bua Karac am 26. Juli an na Virusinfektion verstorbn woa. Die Tournee is darafhi sofoad obrocha wordn.
Nach dem Voafoi im Summa 1977 is die Band erst im Mai 1978 wieda zu Probeaufnahma in Wales zamma kumma, wo mit da Oabeit am neia Oibum ogfanga wordn is. Afgnumma san In Through the Out Door wordn, des achte Werk vo Led Zeppelin im Novemba in de Stockhoima Polar Studios. Rauskumma is im August 1979, nach zwoa Aftritte voa jeweis iba 100.000 Zuschauern beim Knebworth-Festival in Stevenage.
Scho wäarend de Festivals is zu Spannunga zwischen Peter Grant und Festivalpromoter Freddy Bannister kumma bezüglich da tatsächlichen Heich vo de Zuschauerzahlen, die nach de vertraglichen Vereinbarungen a Faktor bei da Berechnung der fälligen Lizenzgebühren gwesn warn. De Lizenz hot für jeweis 100.000 Zuschauer goitn. Afgrund stoak konträra Ogabn vo Bannister und de örtlichen Behörden in Stevenage nachm erstn Festivaltag hot da Grant voam zwoatn Konzert eigens Personoi an de Einlässen abgsteid, um de tatsächliche Besucherzahl zum ermitteln. Nach dem Festival hot Grant zusätzlich a unabhängigs Institut in Nassau dazuaghoid, die Zuschauerzahlen anhand vo Luftaufnahma festzumstellen. So san schließlich de Angaben vo Bannister (104.000 Zuschauer am 4.8. und 40.000 am 11.8.) Grants Zahlen gegenüber (218.000 am 4.8. und 187.000 am 11.8.) gstandn. Dea Disput is mitm Rückzug Freddy Bannisters ausm Promotiongeschäft undm Konkurs seina Firma Tedoar Ltd geendet.
[dro werkln] Diskografie
[dro werkln] Studiooiben
|
[dro werkln] Weidare offizielle Veröffentlichunga
|
[dro werkln] Auszeichnunga
- Led Zeppelin is am 12. Januar 1995 in de Rock and Roll Hall of Fame aufgnumma wordn. Am 12. Februa 2005 hot Led Zeppelin an Grammy für ehrna Lebnswerk griagt.
- Am 22. Mai 2006 is Led Zeppelin ois „große Pioniere der Rockmusik“ mitm Polar Music Prize auszeichnet wordn. Da Polar Music Prize vom schwedischen Stifter Stig Anderson guit ois inoffiziella Nobeipreis fürd Musi. De drei no lebenden Band-Mitglieder san bei da Verleihung in Stockhoim erschiena.
- Da Fernsehsenda VH1 hot Led Zeppelin an ersta Stei dea 100 greatest artists of hard rock afglist.
- As Musimagazin Guitar World hot des Liad Stairway to Heaven 2007 af Plotz 1 dea „Best Guitar Solos“ gsteit.
[dro werkln] Oiben
| Joah | Oibum | USA | UK | D | A | CH |
|---|---|---|---|---|---|---|
| 01/1969 | Led Zeppelin | 10 | 6 | 32 | ~ | ~ |
| 10/1969 | Led Zeppelin II | 1 | 1 | 1 | ~ | ~ |
| 10/1970 | Led Zeppelin III | 1 | 1 | 3 | ~ | ~ |
| 11/1971 | Led Zeppelin IV (a bekonnt ois Four Symbols, Zoso oda Untitled ) |
1 | 1 | 9 | ~ | ~ |
| 03/1973 | Houses of the Holy | 1 | 1 | 8 | 3 | ~ |
| 02/1975 | Physical Graffiti | 1 | 1 | 17 | 2 | ~ |
| 03/1976 | Presence | 1 | 1 | 27 | ~ | ~ |
| 09/1976 | The Song Remains the Same (Live) | 2 | 1 | ~ | ~ | ~ |
| 08/1979 | In Through the Out Door | 1 | 1 | 28 | 20 | ~ |
| 11/1982 | Coda | 6 | 4 | 43 | ~ | ~ |
| 09/1990 | Remasters | 47 | 10 | 13 | 19 | 24 |
| 09/1990 | Led Zeppelin Box Set Vol.1 | 18 | ~ | ~ | ~ | ~ |
| 09/1993 | Led Zeppelin Box Set Vol.2 | 87 | 56 | ~ | ~ | ~ |
| 11/1997 | BBC Sessions | 12 | 23 | ~ | ~ | ~ |
| 11/1999 | Early Days: The Best Of Led Zeppelin Vol.1 | 71 | 55 | 79 | 23 | 84 |
| 03/2000 | Latter Days: The Best Of Led Zeppelin Vol.2 | 81 | 40 | 71 | ~ | ~ |
| 07/2000 | Early Days & Latter Days: The Best Of L.Z. | ~ | ~ | 96 | ~ | ~ |
| 03/2003 | How the West Was Won (Live) | 1 | 5 | 15 | 17 | 20 |
[dro werkln] DVD
- Led Zeppelin (2003): D# 18
[dro werkln] Litaratua
- Richard Cole, Richard Trubo: Led Zeppelin – Stairway to Heaven, Simon + Schuster Uk, 1. Auflage der dt. Ausgabe, 1993. ISBN 978-0-7434-8985-0
- Paul Kendall, Dave Lewis: Led Zeppelin talking, Schwarzkopf und Schwarzkopf, Berlin 2004 (Orig. 1981). ISBN 3-89602-497-3
- Dave Lewis: The Tight But Loose Files – Celebration 2, Music Sales Corporation, 2004. ISBN 1-84449-056-4
- Dave Lewis, Simon Pallett: Led Zeppelin: The Concert File, 2. Auflage. Omnibus Press, 2005. ISBN 1-84449-659-7
- Luis Rey: Led Zeppelin Live. An Illustrated Exploration of Underground Tapes, 3. Auflage. Hot Wacks Press, 1997. ISBN 0-9698080-7-0
- Jürgen Seibold: Led Zeppelin, Paul Zsolnay Verlag, Wien 1993. ISBN 3-552-05110-4
- Ritchie Yorke: Led Zeppelin – Biographie einer Band, vgs verlagsgesellschaft, Köln 1994. ISBN 3-8025-2287-7
- Musikexpress (Sonderheft): Led Zeppelin - Die Musik und die Geschichte der ultimativen Rockband, Axel Springer Young Mediahouse, München Oktober 2004; 146 Seiten. Mit bisher unveröffentlichten Fotos und einem Vorwort von Dave Grohl. Entstanden in Zusammenarbeit mit der britischen Musikzeitschrift Q.
