Leiberl

Der Artikl is im Dialekt Weanarisch gschrim worn.

A Wikipedia Leiberl

A Leiberl (denglisch: T-Shirt) is a Hemd mit kuazn Äamen und an rundn oda V-feamign Ausschnitt, owa ohne Krogn, Toschn oda Knepf.

S Leiberl is im 19. Jh. entstaundn und woa bis in de Mittn vom 20. Jh. bloß a Untahemd. Ois Hemd is s Leiberl eascht durch de legendärn amerikanischn Fümschauspüla Marlon Brando (Endstation Sehnsucht, 1951) und James Dean (…denn sie wissen nicht, was sie tun, 1955) populär woan. De zwa hom ois jugendlich-rebellische Füm-Charaktere, s Leiberl ois Ikone vo da Popkuitua voabreitet.

Wo s Leiberl herkummt, waß man ned genau. Es kennt vo de Seeleit kumma. Friacha hod ma zum Leiberl a no Ruadaleiberl gsogt, wei de Ruadara zu de easchnt gheat hom, de s Leiberl ois Spuathemd trogn hom.

Rednsoat

• A Leiberl reissn (Erfoig hom, guad aunkumma): Des kummt davo, dass friacha de, de a Leiberl kriagt hom, in ana Fuassboimaunschoft spün hom deafn, wer ka Leiberl kriagt hod, woa ned aufgstöd.

Im Netz

Gschicht vum Leiberl