Lena (Fluss)

Lena (Fluss)
Verlauf der Lena im östlichen Sibirien
Datn
Log	Sibirien
Läng	4400
Quäin	Baikalgebirge
Häh vo da Quäin	1465
Mindung	Laptewsee (Nordpolarmeer)
Häh vo da Mindung	0
Eizugsgebiet	2306772
Rechte Neemfliss	Kirenga, Witim, Oljokma, Aldan,
Linke Neemfliss	Wiljui, Linde, Muna
Schiffbor	ab Ust-Kut (3.500 km)

D'Lena (russ. Лена) is a Flus in Sibiarien (Rußlãnd, Asien). Si is mid 4.400 Kilometa õana fu de lengsdn Fliß fu da gãnzn Wöd. Si entschbringt im Baikalgebiarig, rind dãn duach Jakuzien duach und håd ia Mündung gãnz waid om im Noadn, wo's in de Laptewsee rind, wås a Doal fum Nordpolarmeer is. Duach ia geographische Låg im Noadosdn fu Sibiarien is de Lena im Winta komplet zuabfread mid so dikn Ais, das ma sogoa mim Auto driwa foan kã.

Flusslauf

Das Lena-Delta (NASA Landsat Project)

Quellgebiet der Lena

Da Fluss håd sai Quön im Baikalgebiarig, neta fimbf Kilometa westlich dfum Baikalsee. De Gégnd is haid a Natuaschutzgebid, damid as Wåssa ned doat an da Quön schã drekig wiad. Fu doatn rind de Lena zeascht a weng in westliche Richdung nåch Katschug. Dãn biagt da Flus nåch Noadosdn å, fu wo im Somma ab da Schdåd Ust-Kut sogoa Schif drauf foan kinan. Danå rind de Lena duach's Mittlsibiarische Beaglãnd und fliast a Wai parallel zu da Untan Tunguska, wås a ãndana sibiarischa Flus is. Doalwais san de zwoa Fliß neta a boa Kilometa fuanãnda wéka, trozdem dréffn si de zwoa nia. Doatn rind dãn bai da Schdåd Kirensk da Fluß Kirenga in de Lena, dea a aus de Beag baim Baikalsee kimd.

Waida unt rind de fu Sidn kemade Witim in de Lena aini, de nåch dém Zusãmenflus in am Rechtsbogn um's Patomhochlãnd foabai rind. Fu doatn dãn fliasts waida in östliche Richdung, nimd as Wåssa fu dea a ausn Sidn kemadn Oljokma auf und drad dãn lãngsãm Richdung Noadn, wo's duach de Schdåd Jakutsk duachi rind. Doat falåßt de Lena dãn de higelige Gégnd und kimd ins Mittljaktische Diaflãnd. Dé Region is recht flåch und im Winta komplett bfread, im Somma åwa a Sumbflãndschåft.

Doatn rind da Flus 300 Kilometa untahåib fu Jakutsk dãn an de so gnendn Lenafösn foabai, de si auf ana Leng fu ungefea 80 Kilometa links und rechts fum Ufa ausbroatn. Auf iam Wég nåch Noadn rinan nu ãndane Fliß in d'Lena aini, zwascht da aus'n Osdn kemade Aldan, dãn da Flus Wiljui dea aus wesdlicha Richdung kimd. In deara Lãndschåft fliast de Lena dãn zwischn am Werchojansker Gebiarig im Osnd und im Mittlsibiarischn Beaglãnd im Wesdn. Gãns im Noadn kimds dãn zum Polarmea, wo de Lena in am risign Delta ia Mündung håd. Des Delta is iwa 30.000 km² gros und an da breadasdn Schdö 230 Kilometa fu West nåch Ost und 150 Kilometa fu Sidn nåch Noadn. Doat faastlt si da Flis in an Haufn fu Haupt- und Némoam und kimd zan Schlus in de Laptewsee, de wo a Rãndmea fum Noadpolarmea is.

Klima und Schifboakaid

Aisschdråßn iwa d'Lena

D'Lena is noamalawais jéds Joa fu Oktoba bis in Juni aini zuabfread, so das ma auf'n dikn Ais sogoa mid Autos und Låstwågn foan kã. Im Winta is de Lena désweng a Schdråßn und a wichdiga Fabindungswég. Wãn dãn im Lanzing s'Ais lãngsãm schmüzt und da sibiarische Somma kimd, wiad aus'n Fluß auf õa Måi a raissenda Schdrom und da Wåssaschdãnd kã um bis zu 25 Meta schdaing, wai in iam Quögebid und entlãng fu de Zuafliß as Ais schmüzt. Dabai draim åwa oiwai wida Aisschoin in Fluß åwi, de si an enge Schdön fakain kinan und so an natialichn Schdaudãm büdn. Wén dãn da Druk fum nåchkemadn Wåssa so a Aisbarriea auf õa Måi wéka raisst, kãn's untahåib zu schware Iwaschemmungen kema. Dés is zan Baischbü im Mai 2001 bassiad, wo duach so a Aisschdauung und de danåch foigende Flutwön de Schdåd Lensk komplett fawüst woan is und in da Schdåd Jakutsk mearane Fiatl iwaflut woan san.

Wãn im Somma as Ais dãn faschwundn is, is de Lena fia a boa wenige Wochan schiffboa und zwoa fu Ust-Kut bis gãnz in Noadn zum Delta, insgesãmt auf ana Leng fu 3.500 Kilometa.

Zuafliß

Lena bai Jakutsk

In de Lena rinan foigande Némfliß, flußåbweats aufglist:

• Witim
• Kirenga
• Njuja
• Oljokma
• Tschaja
• Aldan
• Wiljui
• Linde
• Muna

Städte

Zu den Ortschaften an der Lena gehören flussabwärts betrachtet:

• Katschug (473 m ü. M.)
• Ust-Kut
• Kirensk (248 m ü. M.)
• Witim (176 m ü. M.)
• Lensk
• Oljokminsk (120 m ü. M.)
• Jakutsk (92 m ü. M.)
• Bulun

Siehe auch

Weblinks

Commons: Lena – Buidl, Videos und/oda Audiodatein

Wiktionary: Lena – Bedeitungserklärunga, Wortherkunft, Synonyme und Ibasetzunga

• Hydrographische Messpunkte im Einzugsgebiet der Lena und benachbarter Flusssysteme

Litaratua

• Tatjana Kuschtewskaja: Sibirienreise - die Lena. Vom Baikal bis zum Eismeer - Geschichte und Geschichten entlang dem großen sibirischen Fluss. Wostok-Verlag, Berlin 2007. ISBN 978-3-932916-36-6