Nutza:Luki/Don Juan de Austria

Der Artikl is im Dialekt Owaöstareichisch gschriem worn.

Da Don Juan de Austria – Johann von Österreich, woa da aussaehelige Suhn vom Kaisa Koal V. Ea woa des Eagebnis vo an Gschpusi des da scho ödare Kaisa mid oan jingan regnschbuaga Deandl ghobt hod. Sei Votta hod dem Buam a guade Ausbüdung zuakemma lossn und so is ea zan schpanischn Admireu afgschting.

Bei da Seeschlocht vo Lepanto woa ea da Owakomandant vo da Heilign Liga, de aun dem Tog de tiakische Armada gschlogn hod. Weu ea zweng dem in Eiropa iwaroi augseng woa, woit eam sei Hoibbruada da Kaisa Phillip II a wengl koitschtön und hodn zan Schtotthoita vo de schpanischn Niedalaunde eanaunnt. Duat is ea a vaschtuam, owa seine Bana san im Escorial beigsezt. Gbuan is a am 24. Febra 1547 und gstuam is a am 1.Oktowa 1578.

Des Kaisagschpusi[Werkeln | Am Gwëntext werkeln]

Da Don Juan ois junga Beasch.
A Ölbüdl vom Coello da junge Juan mid umma 12/13 Joa.

Vom Aprü 1546 bis in August eini woa da Kaisa Koal af an Reichstog in Regnschbuag. Ea woa domois 46 Joa oid und hod vamuatli a wengl a Zaschtreiung gsuacht vo de schwan Regiarungsgschäft. Wia eam de Maid Barbara Blomberg afgfoin is, des woas ma heid nimma. Megligawoas hods eam bei da Tofö aufgwoat (dt. am Tische bedient). Af jeden Foi hod se zwischn da 19jahrign Giatlastochta und im Kaisa a oiseits bkaunnte Romanzn ogschpüd, mid de bekaunntn Foign. De Frucht vo dea kuazn, owa gachn Liab woa a 1547 gbuans Bibal, des afn Naum Johann tauft wuan is. Zufälligawoas is ea am sobn Tog af d´Wöd kema wia sei Votta da Kaisa a am 24 Februa, nua 47 Joa schpada.

Da Gerónimo[Werkeln | Am Gwëntext werkeln]

Sei Votta da Kaisa hodn zwoa za seina Lebzeit ned offiziö ois sein Suhn aunakaunt , owa ea hodn im oita vo drei Joa seina Mudda ognumma und des Biabal noch Schpanien vabrocht. Duat is ea bis ins 6/7 Lebnsjoa vo oafochi Leid afzogn wuan, vom Violinschpüla Fraunz Massy und sein Weiwal da Anna de Medina . Mid an Oita vo umma 7 Joa , 1554 hodn a Vatrauta vom Kaisa , da Kaummahea Adrian du Bois ois sein Suhn Gerónimo in sei Famüli ghoid. Ea und sei Gaddin de Magdalena de Ulloa hom dem Biabal lesn und schreim gleand und ois sei ausgebna Suhn hoda a schtaundesmassige Eaziahung griagt. Da Kaisa Koal hodn vamuatli oanige Moi afgsuacht. Owa bis zan Tod vom Kaisa hod da Johann ned gwisst das dea sei Votta woa.

Don Juan de Austria[Werkeln | Am Gwëntext werkeln]

Nu bevua da Kaisa Koarl 1558 vaschtuam is , hod ea in an Kodizill za sein Testament bschtimmt, daß sie sei Suhn, da Kini Phillip II umman Johann, sein Hoibbruada kimman und eam via an geistlign Bruaf ausbüdn soid. Dahea hod a den 11 jahrign Geronimo annan Hof ghoid. Do hod da Geronimo eascht eafoan das da Kaisa Koarl sei Votta gwest wa und das ea richtigawoas Johann- Juan hoassad. Am Madrita Hof is ea mid sein foßt gleichoitrign Neffn Don Carlos eazogn wuan, dea da Bua vo sein Hoibbruada Phillipp woa.

Olle am Hof haum daun gwisst das da Don Juan a Bua vom vaschtuamna Koal V. is. In da Raungfoig is a noch da kinilign Famüli owa nu vua olle Grandn kema.

Das aus dem Buam nia und nimma a Geistliga und Kardinal wead, hod se glei aussagschtöd. Ois 1565 de Tiakn Malta belogat hom, woit da 18 jahrige Don Juan unbdingt midkempfn. Ea woit sogoa hoamli oposchn, owa sei Bruada hods eam vabotn und wida zruck annan Hof ghoit.

Um sein Bruada zbscheftign hod eam da Kini oiweu wichtigare Aufgobm iwatrogn. Mid 21 Joa (1568) hod eam sei Bruada zan Capitan general del mar mediterraneo y adriatico eanaunt. Ois Aufpassa und Leahrmoasta hod a eam den eafoahna Militäa Reques za Seitn gschtöd. Und mid dem is a im westlign Middlmea mid a boa Schiff af Korsarnjogd gaunga.

1569 und 1570 hod da Don Juan ois Kommandant de Afschtänd vo de Moriskn in Alpujaras (Andalusien) nidagschlogn.

In Phillip sei Suhn, da Don Carlos hod se mid sein Votta ned vaschtaundn und woitn osetzn lossn. Ea woit den Don Juan iwaredn das ea eam dabei intaschtitzn soid. Da Don Juan is owa za sein Hoibbruada gschtaundn und hod eam vom Plan vo seim Suhn vazöht.

Seeschlocht vo Lepanto[Werkeln | Am Gwëntext werkeln]

De tiakische Flottn is oiwei schteaka wuan. Se hom des Estlige und vom westlign Middlmea den Sidn bheascht. Eanane Korsarn haum mid eanane schnön Galeern Jogd af de kristlign Schiff gmocht. und vo de nuadafrikanischn Barbareskn-Schtootn aus homs sogoa Städ und Kistnlaundschtrich in Italien und Sidfraunkreich iwafoin. Do haums braundschozt und de Eiwohna vaschleppt und af de Sklavnmeakt vakaft.

De Tiakn hom a grod de Insl Zypan eaobat und eana Kriagsflottn hod umma 5/6000 Schinackl umfosst. Dahea hom se 1571 Venedig, da Pobst und de Schpania za Heilign Liga vabünd, um gmoasaum eana Oweahr bessa ozschtimma zkenna.

Afn Vuaschlog vom Pobst Pius V. hod ma en Don Juan de Austria zan Genaralkommandant da Mear eanaunnt. Da Flottn haum Kriagsschiff vo Schpanien, Savoyen, Genua, Malta (Johannita), Toskana, vom Pobst und vo Venedig aukeat. De Venediga haum grod an neichn Schiffstip vom Schtopö glossn. De 6 Galeassn woan daun a in da spadan Ausanaundasezung Schlochtentscheidand.

Bade Gegna haum de direkte Ausanaundsezung gsuacht. De tiakische Flottn, mit umma 260 Schiff haum im Goif vo Patras gaunkad. Eana Admiral woa da Kaptan-i Derya Ali Pascha af seim Admiralsschiff da Sultana.

De Schiff vo da heilign Liga vua da Insl Oxiagwoat. Da Admiral woa da Don Juan af sein Schiff da La Real uns sei Flottn hod aus 206 Galeern und de 6 Galeassn bschtaundn. Mid eppa 40.000 Seemauna und Ruadara. Sowia umma 18.000 Soidotn.

Fruah am Sundamoagn, dem 7.10.1571, haum se de Flottn za Schlocht afgschtöd. Bade hom je drei Gschwada ois Schlochtuatnung gwöht, mid je oan Gschwade in eanan Ruckn ois Reseav. De Schiffsreih da Tiakn woa eppa 1 Km lenga, se hom jo a mera Schiff ghobd.

Um Neini-dreißg is losgaunga und um Zehne-viazg san de easchtn Schiff afanaundakrocht. De Kämpf san hin und heagaunga. Af bade Soatn is a Schiff nochn Aundan zgrund gaunga. 5 Galeern hom zgleich des Admiralsschiff vom Don Juan augriffa. Boid haum 30 Schiff um des Admiralschiff kempft. De Janitscharn san mid da Leibgardn vom Don Juan zaumkrocht, wobei a da Don Juan am Fuaß valezt wuan is. Soga de Ruadasklavn hod ma freilossn und eana de Freiheit vaschprochn, wauns höffan de Tiakn ozwean. Afn sidlign Fligl hod da Uludsch Ali de Iwahaund griagt. De Tiakn hom sogoa des maltesische Admiralsschiff gentad. Ois da Don Juan frische Kräft za Hüf ummigschickt, hod da Uludsch Ali gneist das fia de Tiakn de Seeschlocht valuan woa.

Ea hod mid seine Galeern an Ausbruch vasuacht und des is eam a mid eppa 30 Galeern glunga. So woa ea da oOanzige vo de tiakischn Bföhshowa dea entkema is. weu ea dem Suitan de maltesische Kommandoflaggn iwagem hod, is ea dafia mid an Schweat (Kilic) auszoachnt wuan und hod seit dem Kilic Ali Pascha ghoassn.

De Tiakn hom umma 30.000 Mau valuan. Eanane todn Ruadasklavn san goa ned zöht wuan. 150 Galeern san vo da Liga eaowat und 110 san nu vasenkt wuan. Augebli davo umma 30 Schtuck soidn davo de Tiakn söwa vasenkt hom. De Heilige Liga hod 13 Galeern valuan und eppa 8.000 Mau. Vü Iwalebande woan schwaa valezt, so a da Miguel de Cervantes Saavedra, dea a mitkempft und zwoa Schiß in de Brust und oan in de Haund ogrigd hod. Spada hod a daun den Mau vo La Mancha, Don Quijote gschrim.

De Kristn nuztn den Sieg owa ned aus, s´ewige Misstraun hod wida iwahaund gnumma. Und so haum de Tiakn eana Flottn boid wida neich afgschtöd ghobt. De Veneziana woa da oagne Haundl mid de Tiakn wichtiga und se haum den Valust vo Zypan akzeptiat. Jo se haum de Tiakn sogoa an jahrlign Tribut zoit und san aus da heilign Liga ausgschidn. Da tiakische Großwesir, hod in ana Depeschn an Venedig so gschrim:

"Indem mia Eich des Kinireich Zypan entrissn hom, hom ma Eich an Oam ausgrissn. Indem Ia insare Flottn bsiagt hobd, hobds Ia uns nua in Boat rasiat. Eicha Oam woxt nimma noch, owa insa Boat woxt iazt nua um so dichta"

Psychologisch woa da Sieg in dera Schlocht owa scho wichti, den easchmolig is a osmanische Flottn so entscheidand gschlogn wuan. De tiakischn Schiff haum se daun a ins estlige Middlmea zruckzogn.

Da Don Juan de Austria is nochand fian Sieg, vom Pobst midn Titl "Earetta vom Obndlaund" geaht wuan. Sein Auteu vo da Siegabeute hod a de eignan Vawundatn iwalossn. Noch da Seeschlocht vo Lepanto woit a weida gegn de Tiakn kempfn. Owa do eam da Pobst Gregor XIII zan Daunk fia den Schlochtnsieg a Kinischtö vaschoffa woit, is da Phillip II. a wengli mistrauisch wuan und hod in Don Juan a wengl eibremst.

1573 Hod da Don Juan mid ana Flottn gegn de Barbaresknschtootn kempfn deaffa. Se haum Tunis eaowat. De Schtod is owa scho boid widavaluan gaunga ois da Uluj Ali de Schtod mid ana großn tiakischn Flottn bfreit hod. 1575 is a zan Schtoothoata vo de schpanischn Bsitztima in Italien eanaunnt wuan.

In de schpanischn Nidalaunde[Werkeln | Am Gwëntext werkeln]

De vom Pobst Gregor XIII vuagschlogane Ehe mid da schottischn Kenigin Maria Stuart hod sei Bruada, da Kini Phillip II ned ealaubt. Schtod da Hoazad soit ea, af Biddn vo sein Kinibruada, 1576 Schtotthoita (Genaral Gouvaneur) in de Nidalaund wean. Do jo eigendli Schpanien praktisch Pleite woa, san de schpanischn Soidotn im Nuadn schlecht zoit wuan. Obwoi da Don Juan schtreng Katholisch woa, de Meran da nuadlign Nidalenda owa Calvinistn gwest san hod as im Guadn vasuacht. Ea hod Friednsvahaundlungan und den Ewign Edikts dawiakt. Weu da Phillip oiweu weniga Göd fia de Södna aus Schpanien gschickt hod, woa a eivaschtaundn das se Oziagn soidn. Da ea de Maria Stuart nu oiweu ned ogschriem hod, woit ea das de Soidotn de Nidalaund afn Seeweg valossn soidn, weu do hed as megligawoas fia a Invasion Englaunds braucha kena. De nuadligan Provinzn nhom owa draf bschtaundn das de Soidotn afn Laundweg hoamroasn.

Oiso hod a söwa, mid buagtn Göd a kloane Armee afgschtöd. Und ea is a daun vo de Generalschtootn zan Gouvaneua gwöht wuan. De Provinzn Seelaund und Hollaund san vo Fraunkreich intaschtizt wuan und hom na spada oglehnt. Ea hod daun des Kastell in Naumur eaowat. In Rijmenam owa a kloanare Schlocht valun. Daun owa mera Schtäd eaowat. Sein Freind und Sekretea Juan de Escovedo noch Schpanien za sein kiniglichn Bruada um Hüf gschickt. Und den hod da kiniglige Sekretea da Antonio Perez am 31. Meaz 1578 duach Hescha in Madrid umbringa lossn. Da Don Juan hod do vamuatli scho des Vatraun vo sein Bruada valun ghobd, dem ea woascheinli zu Populea wuan is.

Sei End[Werkeln | Am Gwëntext werkeln]

Weu ea oiweu Gäidproblem ghobt hod, is eam ois zlaungsaum gaunga. Nochn Moad vo sein Sekretea woa a nidagschlogn. Des Regnwetta und da nosse Bodn hom a weidakempfn schwaa megli gmocht. In de Födloga hod zweng da maunglndn Hygiene a de Pest ( Cholera, Typhus?) grassiat. Und an De is ea vamuatli aa eakraunkt. Da Ea scho lenga krenkli woa is da Vadocht afkema , daß ea vagift wuan warad. Af Vaaunlossung vo da englischn Kinigin Elisabeth de oiweu nu gfiacht hod, das a do nu de Maria Stuart heiratn kunnt.

Da lezte Kreizritta vo Eiropa is nua 31 Joah oid wuan.

Sei Armee hod fia eam a groß Begrebniss oghoitn. daun is a zschticklt wuan und seine Köapateu san, in Akohoi eiglegt, duach des vafeindte Fraunkreich noch Schpanien brocht wuan. Do hod ma daun seine Trimma wida zaumdau und spada im Escorial, noh sein Vota in an Sarkophag beigsezt.

Da Kini Phillip II hod daun de Afzoachnungan vom Don Juan de Austria iwaprüfn lossn und koan Beweis vo Untreue oda untaschlogung gfundn. Draf hi hod a sein Sekretea Antonio Perez eischpian lossn. Den dea woa vamuatli Schuid drau das a zwischn de zwoa Briada an Unfried gschtift hod.

Schpruch am Haidplotz[Werkeln | Am Gwëntext werkeln]

Aun da Heabeag zan goadanan Kreiz in Regschbuag is a Tafal zu Eainnarung aun Eam. (Origineutext):

In dem Haisl vo oida Oat,

hod offt gruat noch launga Foaht.

Herr Kayser Carl der Fünfft gnaunnt.

In olla Wöd goa woih bkaunnt.

Dea hod a do zu guada Schtund,

Geküßt ana Jungfrow Mundt.

Daun draus eawux dem Votta gleich,

Da Don Juan vo Östareich.

Dea bei Lepanto in da Schlocht,

Vanicht hod da Tiakn Mocht.

Da Herr vagöts eam Ollezeit,

So Iazt, wia a in Ewigkeit.

Barbara Blomberg[Werkeln | Am Gwëntext werkeln]

Ois ia Suhn noch Schpanien brocht wuan is, hod mas midn kaisalign Beaumtn Hironymus Kegel vaheirat. Dazua homs 5000 Guidn Haozadguat griagt und daun 400 Tola jeds Joa. 1551 sans noch Brüssl iwasiedlt wo ia Mau fia de Ausristung vo da Armee zuschtändi woa. Midanaund homs nu drei Kinda ghobt. Ois ia Mau 1569 gschtuam is hods midn Gäid ned guad ausgschaut. Do hod ia da schpanische Kini Phillip da zwoate a guade Apanasch zuagschprochn. Ian Suhn Johann hods nua nu a oanzigsmoi nu gseng. Des woa 1567 in de schpanischn Nidalaund. Noch Tod vom Johann is daun noch Schpanien zogn, wos an Hof mid Deanstbodn griagt hod. Af dem is a am 18.12.1597. ois Madame Barbara de Blomberg vaschtuam. Ois ma ian Nochlos guatnd hod is do a aa Woppnring vom Kaisa Koal V gfund wuan.

Seine Gschpusi und Kinda[Werkeln | Am Gwëntext werkeln]

De fuigandn Daman hom nochwoasli a Gspusi midm Don Juan de Austria ghobt:

De María de Mendoza und eana Tochta María Ana de Österreich (1568 - 1629)
De Anne vo Toledo, koane Kinda vo de Zwoa bekaunt.
De Zenobia Sarotosia, a Biabal des owa scho Jung gstuam is. Umma 1574.
De Diana Falangola mid eanana Tochta da Juana de Österreich (1573-1630).

Litaradua[Werkeln | Am Gwëntext werkeln]

Victor von Kraus: Blomberg, Barbara. In: Allgemeine Deutsche Biographie (ADB). Band 2, Duncker & Humblot, Leipzig 1875, S. 718 f.
Martia A. Panzer: Barbara Blomberg. Bürgerstochter und Kaisergeliebte. Pustet, Regensburg 1995 *Eugen Trapp: Blomberg, Barbara. In: Neue Deutsche Biographie (NDB). Band 2, Duncker & Humblot, Berlin 1955, ISBN 3-428-00183-4, S. 314 (Digitalisat).
v. Reuter: Don Juan d´Austria als Admiral der heiligen Liga und die Schlacht bei Lepanto, in: Marine-Rundschau, 13. Jg. 1902, S. 678-684.
Charles Petrie: Don Juan d’Austria. Aus dem Englischen von Rudolf Wedekind. Kohlhammer, Stuttgart 1968.
Hartmut Heine: Geschichte Spaniens in der frühen Neuzeit. Beck, München 1984, ISBN 3-406-30296-3.
Sigrid-Maria Grössing: Mord im Hause Habsburg. Heyne, München 2003, ISBN 3-453-86727-0. *Marita A. Panzer: Don Juan de Austria. Karriere eines Bastards. Pustet, Regensburg 2004, ISBN 978-3-7917-1866-8.
Constantin von Wurzbach: Don Juan d’Austria. Nr. 128. In: Biographisches Lexikon des Kaiserthums Oesterreich. Band 6, Verlag L. C. Zamarski, Wien 1860, S. 331–336.
Wilhelm Maurenbrecher: Juan de Austria. In: Allgemeine Deutsche Biographie (ADB). Band 14, Duncker & Humblot, Leipzig 1881, S. 278–281.
Christian Kahl: Don Juan d'Austria. In: Biographisch-Bibliographisches Kirchenlexikon (BBKL). Band 24, Bautz, Nordhausen 2005, ISBN 3-88309-247-9, Sp. 918–925.
Helmut Neuhold: Österreichs Helden zur See. S. 12–25. Styria Verlag Wien-Graz-Klagenfurt 2010. ISBN 978-3-222-13306-0.
Niccolò Capponi: Victory of the West. The Story of the Battle of Lepanto. Macmillan, London 2006, ISBN 1-4050-4588-4.
Wolfram zu Mondfeld: Der sinkende Halbmond. Die Seeschlacht von Lepanto im Jahre 1571. Vorbereitungen, Schlachtgeschehen, Auswirkung. Arena, Würzburg 1973, ISBN 3-401-03675-0. *Oliver Warner: Große Seeschlachten. Ariel, Frankfurt am Main 1963.

Im Netz[Werkeln | Am Gwëntext werkeln]

In Koal sei Gschpusi:

Don Juan:

Schlocht vo Lepanto:

http://commons.wikimedia.org/wiki/Category:Don_Juan_de_Austria?uselang=de