Schloss Fraisoi

Der Artikl is im Dialekt Oidsoizburgarisch gschrim worn.

's Schloss Fraisoi (Hochdaitsch: Schloss Freisaal) ligt aibett im Grealåndgirtl im Sidn vo da Låndeshauptstod Soizburg, im Stodtail Nonntoi (Tail Fraisoi). In unmittlborer Nähe befindt se d' Naturwissnschoftliche Fakultät vo da Universität Soizburg. 's Schloss befindt se inmittn vo am kloanan Waiher.

's aisserlich a bisse unschainbore Schloss, vo dem se da Nåm vo „Freudensaal“ oloatt, is 1392 as erschte Moi urkundlich dawänt worn. 's kloane Wosserschloss hod beraits ois Lusthaisl vom Firschterzbischof Pilgrim II. vo Puachhoam deant, is 1549 unterm designirtn Erzbischof, Administrator Ernst vo Bayern (1500 - 1560) in maniristischm Stüi naich darichtt worn und is saidher ois Wosserschloss vo am Waiher umgeem. 1907 is as Schloss renovirt und im Villnstüi vaändert worn, dodabai is aa da Fochwerkbau im Innanhof darichtt worn. De Vaändarungan san tailwaise spader rickängig gmocht worn.

Im Owergschoss befindn se Wåndmoiarain de auf de grosse Vagångenhait vo dem Bauwerk hiwaisn, wobai a monumentois Fresko vom Håns Bockerschberger - am öidern - (1558), des an faierlichn Aizug vom Firschterzbischof Michael von Kuenburg im Jor 1558 zoagt. Da Bsitz is haid in privater Hånd und ned äffmtlich zuagänglich.

In de Jor 1967 bis 1989 hod da renomirte esterraichische Moier Prof. Lucas Suppin im Schloss Fraisoi gleebt. Noch ner unglicklichn Renovirung noch 1950 hod a unter da Loatung vom Bundesdenkmoisåmt d' Freskn vur 1970 wider in eanern urspringlichn Zuastånd vasetzt. Ois akademischer Moier hod eam vüi mi'm Schloss, saine ehemoling Freskn und sainer oazigorting Gschicht vabundn.

Aingtimer ob 2006 is a Stiftung, vo dera da friarerne Vurstånd Erich Schumann, da Schef vo da Valogsgruppm Westdeutsche Allgemeine Zeitung (WAZ) Åfång 2007 vastorm is.