Sebastian Vettel
Da Sebastian Vettel (3. Juli 1987 in Heppenheim) is a deitscha Automobilrennfåhra. Ea startet seit 2007 in da Formel 1 und steht beim esterreichischen Team Red Bull Racing unta Vatråg. In da Saison 2010 håt ea als bisher jingsta Pilot an Wödmoastatitl gwunna und in da Saison 2011 håt ea si zum bisher jingstn Dopplwödmoasta gmåcht.
Inhoitsvazeichnis |
Karriere [dro werkln]
Kartsport [dro werkln]
Da Sebastian Vettel is durch sein Våta Norbert zum Motoasport kemma. Norbert Vettel wår 13 Jåhr lång hobbymäßig im Bergrennsport aktiv und håt sei Rennfåhrzeig vakafft, um sein Sohn Sebastian an Eistieg in'n Motorsport z'amöglichn. Sei Våter håt'n bereits mit drei Jåhr seine easchtn Rundn im Kart drahn låssn und eam z'Weihnåchtn a 60 cm³-Bambini-Kart gschenkt, mit dem da Sebastian a seine erstn Kartrennen betrittn håt. Vettels Aussång zufolge håm eam seine Ötan stets bei seina motoasportlichen Entwicklung khoifn. Vettel wår bis 2002 im Kartsport aktiv und håt unta åndam 2001 die europäische und deitsche Juniorenkartmoastaschåft gwunna.
Easte Afåhrungen im Monoposto [dro werkln]
2003 is da Sebastian in den Formelsport gwechslt. In seina Debütsaison is a füa Eifelland Racing in da deitschn Formel BMW g'startet. Er hot fünf Rennen gwunna und is Vizemeista hintam Maximilian Götz wåan. 2004 hot a mit Mücke Motorsport den Meistatitl da deitschn Formel BMW gwunna und hot a mit 18 Siegen in 20 Rennen an nein Rekord aufgstöd. Nachdem ea as Budget fia die easte Saison mit groaßm Aufwånd zåmbråcht hot, hot da esterreichische Getränkeheastöa Red Bull ugfång, an Sebastian Vettel finanziell z'unterstützn.
Formel 1 [dro werkln]
BMW Sauber (2007) [dro werkln]
In da Saison 2007 is da Vettel z'nachst als Test- und Asåtzfåhra fi BMW Sauber tätig gwesn. Då da Eisåtz vå an drittn Fåhrzoig nimma alabt wår, hot jeweils oana da Ståmmpilotn, Nick Heidfeld oda Robert Kubica, eam as Cockpit im easchtn frein Training ågem miassn. Nåch Kritik da Betroffenen håt BMW Sauber åb'm drittn Lauf auf Vettels Eisåtz åis Freitågsfåhra vazichtet.
Nåch Robert Kubicas schwarn Unfåi beim Großn Preis vo Kanada in Montréal hot eam as BMW Sauber Team als Einsåtzfåhra beim darauffolgendn Großn Preis da USA engagiert. Somit håt a då am 17. Juni 2007 sei Renndebüt gem. In seinem eastn Qualifikationstraining håt a bereits an siebtn Plåth arreicht. As Rennen is zunachst nit gånz zufriedenstellend valoffn. Ea håt si mehrmåis vabremst und somit a mehra Plätze valoan. Zum Schluss hot a decht no an åchtn Plåtz arreicht und is somit da jingste Fåhra, dea in die Punkteränge gfåhn is.
Toro Rosso (2007-2008) [dro werkln]
Am 31. Juli 2007 håt die Presse gmöd, dass da Sebastian Vettel ab'm Großn Preis vo Ungarn an US-Amerikaner Scott Speed bei Scuderia Toro Rosso fian Rest da Saison asetzn wead. Vorraussetzung dafi woa a Freigabe vom BMW Sauber Team. Då es dabei zu Vazögarungen kemma is, hot ea as Rennen in Ungarn bestrittn, ohne vorher as Fåhrzeig jeweils gfåhrn z'håm. Ea is Teamkolleg vom Vitantonio Liuzzi wåan.
Beim chaotischn Regnrennen beim Großn Preis vo Japan in Fuji håt a eastmåis fia Aufsechn g'sorgt, åis a bis auf Plåtz drei voagstoaßn is und zwischnzeitlich as Rennen sogår ugfüaht håt. Während a Safety-Car-Phase is a jedoch bei a Kollision mit'n Mark Webber ausgschiedn. Ånfångs håm eam die Rennkommissare die Schuid gem und es is fias nagste Rennen um zehn Startplätz zruggvasetzt wåan. A Amateurvideo håt eam jedoch entlastet. Lewis Hamilton håt mit am plötzlichn Bremsmanöva den Unfoi provoziat, is ållerdings nit b'stroft wåan. Beim drauffolgendn Großm Preis vo China is ea vo Startplåtz 17 in Rennen gonga und hot as Rennen erneut auf nossa Streckn auf Platz vier beendet, då die Boxenstrategie guad passt håt. Des wår bis dahin die beste Platzierung fi'n Sebastian Vettel als a fi Toro Rosso, des durchn Vitantonio Liuzzi eascht oan Punkt hoin hot kinna (Vitantonio Liuzzi 2006 in den USA). Außadem is ea voa seim Engagement in da Formel 1 in da World Series by Renault gstartet und is Fünfter in da Gsåmtwertung wåan.
In da Saison 2008 wår da Sébastien Bourdais, dea zwischn 2004 und 2007 viermåi in Folge die amerikanische Champ-Car-Serie gwunna håt, da neue Teamkolleg vom Sebastian Vettel. Die eastn via Rennen is ea nia ins Ziel kemma, da Teamkollege håt jedoch scho im eastn Rennen den siebtn Plåtz arreicht und somit bewiesn, dass ea konkurrenzfähig is. Mitn fünftn Plåtz in Monaco und weitan Punkteplatzierungen håt da Sebastian jedoch wieder konstante Ergebnisse zu vazeichnen kopt.
Am 13. September 2008 håt ea si im varegneten Qualifying in Monza als bishea jingsta Fåhra die Pole-Position ghoit. Im Rennen håt ea sie dånn a in an Sieg ummünzn kinna und is somit a da jingste Fåhra, dea an Formel-1-Grand-Prix gwinna håt kinna.
A in da zwåatn Saisonhälftn håt da Sebastian Vettel übazeugn kinna und is reglmäßig in die Punkte gfåhn und håt mit an viertn Plåtz beim Saisonfinale in Brasilien sogår no an Weltmoastatitl vom Lewis Hamilton in Fråg gstöd. Nåch dea Saison hot a mit 35 Punkte an åchtn Plåtz in da Fåhrawertung erreicht und håt seinen Teamkollegen Sébastien Bourdais und die zwoa Kollegn vo Red Bull Racing hinta si låssn kina.
Red Bull (Seit 2009) [dro werkln]
2009 [dro werkln]
Mitte Juli 2008 håt as Toro-Rosso-Schwestanteam Red Bull Racing bekånntgem, dass da Vettel åb da Saison 2009 ån da Seitn vom Mark Webber fåhrn wead. Nåchdem ea in den eastn beidn Rennen imma kurz vorm Rennende ausgschiedn is, håt ea in Shanghai beim Großn Preis vo China sei zwåate Pole-Position azün kinna (di easte fi Red Bull Racing übahaupt) und håt Tågd drauf a sein zwåatn Sieg eigfåhn. Beim Großn Preis da Türkei is ea zwår wieda auf die Pole-Position gfåhn, håt jedoch im Rennen scho in da eastn Rundn an Fåhrfehla gmåcht und is auf'n drittn Plåtz zrugggfåin, gwunna håt zum Schluss da Jenson Button. Beim drauffoigendn Großn Preis vo Großbritannien in Silverstone håt ea sein zwåatn Saisonsieg vå da Pole-Position azüt und is a z'gleich di schnöste Rennrundn gfåhn. Im August håt Red Bull Racing a Vatrågsvalängarung bis 2011 bekånntgem. Beim Großn Preis vo Belgien håt a mit an drittn Plåtz an Rückstånd aufn WM-Führendn Jenson Button weita vakürzn kinna. Nåch an åchtn Plåtz vo Italien und an viertn Plåtz in Singapur håt a in Japan aufn Suzuka International Racing Course sein drittn Saisonsieg eigfåhn. Oa Rennen vor Saisonschluss håt si jedoch da Jenson Button vorzeitig an Weltmoastatitl gsichat. Durch an Sieg beim Saisonfinale in Abu Dhabi aufn nein Yas Marina Circuit is da Sebastian Vettel Vizeweltmoasta vorm Rubens Barrichello woan.
2010 (1. WM-Titel) [dro werkln]
In da Saison 2010 håt ea aneit as Fåhraduo mitn Mark Webber bildet. In den eastn beidn Rennen is da Sebastian jeweils auf da Pole-Positon gståndn, is jedoch imma durch technische Probleme zrugggfåin. In Bahrain wår a hinige Zündkeazn und in Australien wår a glöste Radmutta d'Schuid. Beim drittn Rennen in Malaysia håt ea sein eastn Saisonsieg azüt, desmåi håt sei Fåhrzeig bis zum Rennende funktioniat. Nåch an sechstn Plåtz in China håt a beim Europaauftakt in Spanien mit Reifn- und Bremsproblemen z'kämpfn ghob, håt's åba doch no aufn drittn Plåtz gschåfft. Beim traditionön Großn Preis vo Monaco håt a hintan Teamkollegn Mark Webber an zwåatn Plåtz arreicht.
Beim Großn Preis da Türkei håt a fi vü aufsechn g'sorgt, als a bei an Übaholvasuach mit seinem füarendn Teamkollegn Mark Webber kollidiat is. Ea söba is ausgschiedn, da Mark Webber håt allerdings weitafåhn kinna und is no Dritta wåan. Gwunna hot da Lewis Hamilton, zwåata is da Jenson Button wåan. Nåch an viertn Plåtz beim Reifnpoker in Kanada håt a beim Großn Preis vo Europa sein zwoatn Saisonsieg eigfåhn. Bei den nagstn drei Rennen håt a zwår jeweils die Pole-Position gwunna, im Rennen håt a sie jedoch nit umsetzn kinna. In Großbritannien is a nåch an Reifnschådn no auf Plåtz siebn voagfåhn, bei seinem Heim-Grand-Prix in Hockenheim is a noch an misslunganen Start dritta woan und in Ungarn håt a in a Safety-Car-Phasn zfü Åbstånd zum Füarendn Mark Webber låssn und is mit a Durchfåhrtsstråfn blegt woan.
Auf da Traditionsrennstreckn in Spa-Francorchamps håt a nua Plåtz 15 arreicht, weil ea bei an gscheitatn Übaholvasuach gegn an Jenson Button mit eam kollidiat is. Da Jenson Button is ausgschiedn, da Sebastian Vettel håt jedoch nåch an Reparatuastopp as Rennen foatsetzn kinna. Außadem håt a a Durchfåhrtsstråfn kriag. Somit is a aufn voaletztn Plåtz zrugggfåin. Spata håt eam da Vitantonio Liuzzi bei an Übaholmanöva an rechtn Hintareifn beschädigt. Somit håt da Sebastian Vettel an weitan Boxnstopp eileng miassn. Beim nachstn Rennen in Italien håt ea im Qualifying mitn sechstn Plåtz sei schlechtestes Qualifyingagebnis in dea Saison azüt, håt jedoch im Rennen durch a perfekte Boxenstrategie no an viertn Plåtz arreicht. Beim Großen Preis vo Singapur is a vo Startplåtz zwoa hintan Fernando Alonso ins Rennen gonga und håt bis zum Rennende gegn eam um an Sieg g'kämpft, håts jedoch nia an eam vorbei g'schåfft.
Beim nachstn Rennen in Japan håt a sein drittn Saisonsieg arreicht. Bei da Premiern des Großn Preises vo Korea håt a as Rennen lång ugfüat und het a as easte Måi die WM-Führung übanumma, jedoch håt eam a Motorschådn nåch 45 Führungsrundn ausn Rennen gworfn hät. In Brasilien håt a mit an Sieg vor seim Teamkollegen Mark Webber noch a Chance aufn Weltmoastatitl kop. Beim Saisonfinale, erneut in Abu Dhabi, håt a aneut gwunna. Då da Fernando Alonso nua siebta woan is, is da Sebastian Vettel Weltmoasta 2010 woan. Somit håt a sie mit 23 Jahren und 134 Tågn zum jüngstn Formel-1-Weltmoasta in da Geschichte da Formel 1 gmåcht. Ea håt insgesåmt 10 Pole-Positions und 5 Rennsiege vabucht.
Nåch da Saison is da Sebastian Vettel zum deitschn und europäischn Sportla des Jåhres 2010 woan.
2011 (2. WM-Titl) [dro werkln]
Da Sebastian Vettel håt a in da Saison 2011 dominante Leistunga zoagg. Nåch zwoa Siegn in Australien und Malaysia håt a in China Plåtz zwoa arreicht, weil ea auf a Zwoastoppstrategie gsetzt håt und daher geng Rennende nimma so guade Reifn khåb håt. Bei di easchtn Europarennen in da Türkei, Spanien und in Monaco håt ea a jeweils an Sieg eigfåhn. Beim Groaßn Preis vo Kanada in Montréal håt ea as Rennen bis zua voaletztn Rundn ugfiad. In da letztn Rundn håt eam jedoch da Jenson Button unta Druck gsetzt und eam zu an Fåhrfehla zwunga und is als zwoata ins Züü kemma. Beim Großen Preis vo Europa in Valencia håt ea wieda an Sieg gfeiat. Beim großn Preis vo Großbritannien håt ea die Führung durch an fehlahåftn Boxnstopp valoan und is zwoata woan. Bei seim Heim-Grand-Prix am Nürburgring is a easchtmåis ois Viata nit auf's Podest kemma. Durch an Fåhrfehla in da Ånfångsphasn håt ea an Ånschluss auf die easchtn Drei valoan. Beim varegnetn Groaßn Preis vo Ungarn håt a an zwoatn Plåtz hintan Jenson Button arreicht.
Die nachstn drei Rennen in Spa-Francorchamps, Monza und in Singapur håt a jeweils souverän gwunna. Nåch Singapur håt a nua no oan Punkt braucht, um Dopplweltmoasta z'wean. Beim Großn Preis vo Japan håt eas mit'n drittn Plåtz somit gschåfft und is mit 24 Jåhrn und 98 Tång da jingste Dopplwödmoasta in da Formel-1-Gschichtn woan. Bei di nagstn Rennen in Südkorea und da Premiere in Indien aufn Buddh International Circuit håt ea zwoa weitare Siege gfeiat. In Indien håt ea a sein eastn Grand-Slam (Pole-Position, Rennsieg, Schnöste Rennrundn und Start-Züü-Sieg) gfeiat.
Beim Großn Preis vo Abu Dhabi håt da Sebastian Vettel sei 14. Pole-Position in da Saison 2011 eigfåhn. Somit håt ea an Pole-Rekord vom Nigel Mansell aus'm Jåhr 1992 (Meiste Pole-Positions in oana Saison) eigstöd. Im Rennen jedoch håt ea jedoch scho glei nåch'm Start an Reifnschåån am linkn Hintaradl khob, wo ebenso die Radaufhängung defekt woan is und somit a seinen easchtn Saisonausfall bedeitet håt.
In da Saison 2011 håt ea in 19 Rennen 15 Pole-Positions und 11 Rennsiege eigfåhn.
Mitte März 2011 is bekånnt woan, dass da Sebastian Vettel bis 2014 fi Red Bull Racing fåhn wead.
2012 [dro werkln]
Am Ufång beim Groaßn Preis vo Australien in Melbourne håt a wieda an guadn Start khob und is åis Zwoata hintan Jenson Button ins Züü kemma. Beim Groaßn Preis vo Malaysia in Sepang, vo dem a vom sechstn Plåtz g'startet is, is a iwan öftn Plåtz nid aussikemma, weil a in da 48. Runde mit'n Inder Narain Karthikeyan kollidiat is und an Reifnschåån am rechtn Hintaradl kriag håd. Beim Groaßn Preis vo China in Shanghai is a nåch an enttäuschendn Qualifying (Plåtz 12) no Fünfta woan und sei Låndsmånn Nico Rosberg håt då sein easchtn Grand-Prix-Sieg gmåcht. Beim Groaßn Preis vo Bahrain, dea wia scho im Voajåhr vo politische Unruhn prägt woan is, owa desmåi trotzdem austrågg woan is, håt a sein easchtn Saisonsieg eigfåhn und a gleichzeitig an Hattrick gschåfft (Pole-Posiion, Rennsieg und Schöste Rennrundn).
Beim Europaauftakt in Spanien is a åis Sechta ins Züü kemma. Zwoa Wochn spada beim Klassika in Monaco is a bei am Sieg vo sein Teamkolleng Mark Webber Viata woan. Beim Groaßn Preis vo Kanada in Montréal is nåch an Start vo da Pole-Position Viata woan. Beim Groaßn Preis vo Europa in Valencia is a wieda auf die Pole-Position gfåhn, håt die Führung lång behaupt kinna, is jedoch nåch a Safety-Car-Phase in da 33. Rund weng a kaputtn Liachtmaschin ausgfåin. Gwunna håt da Fernando Alonso. Nåch am drittn Plåtz in Silverstone is a bei seim Hoamrennen in Hocknheim zeascht no Zwoata woan, is jedoch nåch am reglwidrign Iwahoimanöva beim Jenson Button weng a 20-Sekundn-Stråf auf'n fünftn Plåtz zruggigfåin.
Da Sebastian Vettel liegg nåch ööf Rennen auf'm drittn Plåtz vo da WM-Wertung mit 110 Punktn und håt 42 Punkte Rückstånd auf'n Führendn Fernando Alonso.
Statistik [dro werkln]
Karrierestationan [dro werkln]
|
Formel-1-Statistik [dro werkln]
Stånd: Saisonende 2012
| Saison | Team | Chassis | Motor | Rennen | Siege | Zwåata | Dritta | Poles | schn. Rennrundn |
Punkte | WM-Pos. |
|---|---|---|---|---|---|---|---|---|---|---|---|
| 2007 | BMW Sauber F1 Team | BMW Sauber F1.07 | BMW 2.4 V8 | 1 | − | − | − | − | − | 1 | 14. |
| Scuderia Toro Rosso | Toro Rosso STR2 | Ferrari 2.4 V8 | 7 | − | − | − | − | − | 5 | ||
| 2008 | Scuderia Toro Rosso | Toro Rosso STR2B / Toro Rosso STR3 | Ferrari 2.4 V8 | 18 | 1 | − | − | 1 | − | 35 | 8. |
| 2009 | Red Bull Racing | Red Bull RB5 | Renault 2.4 V8 | 17 | 4 | 2 | 2 | 4 | 3 | 84 | 2. |
| 2010 | Red Bull Racing | Red Bull RB6 | Renault 2.4 V8 | 19 | 5 | 2 | 3 | 10 | 3 | 256 | 1. |
| 2011 | Red Bull Racing | Red Bull RB7 | Renault 2.4 V8 | 19 | 11 | 5 | 1 | 15 | 3 | 392 | 1. |
| 2012 | Red Bull Racing | Red Bull RB8 | Renault 2.4 V8 | 20 | 5 | 3 | 2 | 6 | 6 | 281 | 1. |
| Gsåmt | 101 | 26 | 12 | 8 | 36 | 15 | 1054 | ||||
Grand-Prix-Siege [dro werkln]
|
|
|
|
Im Netz [dro werkln]
Commons: Sebastian Vettel – Oibum mit Buidl, Videos und Audiodateien
