Yellowstone-Nationalpark

Da untare Yellowstone Wossafoi, wo da Yellowstone Fluss in an Grand Canyon vom Yellowstone stiazt.

Da Yellowstone liegt auf am Krata (Caldera) vo am Supavuikan.

Unta da Caldera vom Yellowstone.

Da Yellowstone-Nationalpark in de USA woa da wejtweit easchte Nationalpark. Ea is am 1. März 1872 grindt woan. Da Nom kimmt vom Yellowstone Fluss. Seit 1978 gheat da Yellowstone zum Wejtnatuaeabe.

Da Yellowstone is voa oim aa fia de Geysir und Schlammtepf (hoasse Schlammquejn) bekonnt. Im Park san ebba de Hejftn vo de Geysir vo da gonzn Wejt. Da bekonntaste is da Old Faithful Geysir. Aa de Viechawejt vom Yellowstone is oanzigoatig. Da Park is beispuisweis de Hoamat vo Grizzly Bärn, Wejfn, Bison und Wapiti. Desweng keman aa jeds Joa an Hauffa Touristn.

Da Park is de gresste intakte Natualondschoft vo da Noadhoibkugl vo da Eadn. Im Yellowstone gibts vui vaschiedane Eco-Systeme.

Eadkund

Da gresste Tei vom Park (96%) liegn in Wyoming; drei Prozent vo da Flächn ghean z Montana, a Prozent z Idaho. Mit 8987 km² Flächn is da Yellowstone ebba so groß wia Korsika. Da Park liegt auf an Plateau in in de Middlan Rocky Mountains, auf oana duachschnittlichn Heh vo ebba 2.400 Meta. Da hexte Gipfe is da Eagle Peak mit 3.462 Meta.

Im Park gibts drei Canyons, de wo duach Fliss im Lauf vo 640.000 Joa (seit da letztn großn Eruption) in de vuikanischn Fejsn (Tuff) eigrom woan san. Da bekonntaste is da Grand Canyon vom Yellostone.

Da Nationalpark liegt fost voiständig aufm Krata (Caldera) vo am Supavuikan, dea wo noch wia voa aktiv is. De Magmakamma liegt 8 Kilometa unta da Obaflächn und is 60 Kilometa long, 40 Kilometa broad und 10 Kilometa hoch. Damit gheat da Vuikan zu de gresstn vo da Wejt. De letzte Mega-Explosion vom Yellowstone-Vuikan hods voa 640.000 Joa gem. A Eruption vom Yellowstone-Vuikan, de wos irgendwonn wieda gem wead, wei si de Kamma laufend fuid, häd katastrophale Auswiakunga auf de gonze Wejt. Wonns so a Mega-Explosion wieda gem wead, woass owa neamd. De ko aa eascht in hundattausend Joan sei.

Viechawejt

A Gobebock im Groslond

Bison grosn bei oana hoassn Quejn

Da Yellowstone hod a vuifejtige Viechawejt. Es gibt aloa ebba 60 Spoviecha im Park, beispuisweis Woif, Lux und Grizzly-Bär. Weidas gibts no Bison, Wapiti, Gobebeck, Ejch, Beaglewen, Schwoaz-Bär und mea.

Dazua hods sejtane Fisch- und Vogloatn.

Indiana

Da Yellowstone woa ra wichtigs Siedlungs- und Jogdgebiet vo de Indiana. Bis 1871 hom Schoschonen in da Region glebt. De san owa systematisch vatriem woan. In de letztn großn Indiana-Kriag woan aa Lakota unta da Fiarung vom Sitting Bull do. Seit 1880 lem koane Indiana mea im Yellostone. Zletzt aa no Nez Percé untan Haiptling Joseph.

Trivia

De Hanna-Barbera-Zeichntrickserie Yogi Bär spuit im Jellystone-Nationalpark.

Literadua

• Philip Burnham: Indian Country, God's Country: Native Americans and the National Parks. Washington, D.C.: Island Press, 2000
• Aubrey L. Haines: The Yellowstone Story - A History of our First National Park. University Press of Colorado, Niwot 1996, zwei Bände: ISBN 0-87081-390-0 und ISBN 0-87081-391-9
• Joel C. Janetski: Indians in Yellowstone National Park. The University of Utah Press, Salt Lake City 2002, ISBN 0-87480-724-7
• Judith L. Meyer: The Spirit of Yellowstone - The Cultural Evolution of a National Park. Rowman & Littlefield Publishers, Inc., Lanham (Maryland) 1996, ISBN 0-8476-8248-X
• Peter Nabokov / Lawrence Loendorf: Restoring a Presence: American Indians and Yellowstone National Park. Norman, University of Oklahoma Press, 2004.
• Thomas Riepe: Yellowstone - Im Land der Wölfe und Kojoten. Monsenstein und Vannerdat, 2005, ISBN 3-86582-124-3

Im Netz

 Commons: Yellowstone-Nationalpark – Sammlung vo Buidl, Videos und Audiodateien

• National Park Service: Yellowstone-Nationalpark (Hoamseitn)
• American Park Network: Yellowstone-Nationalpark
• Vidclips: Yellowstone-Caldera
• Total Yellowstone Page