Wüstnfux

Der Artikl is im Dialekt Owaöstareichisch gschriem worn.

Wüstnfux

Oadnung:	Raubviecha Carnivora
Üwafamülie:	Hundeoatige Canoidea
Famülie:	Hund Canidae
Tribus:	Echte Fichs Vulpini
Gottung:	Vulpes
Oat:	Wüstnfux

Wissnschoftlicha Nom

Vulpes zerda

Zimmermann 1780

Da Wüstnfux oda Fennek (Vulpes zerda, friaha Fennecus zerda) is de kleanste vu olle bekaunntn Wüidhundeoatn. Ea is guad ans Lem in da Wüstn aupasst.

Merkmole

D'Läng vu Schedl und Rumpf is knoppe viazg Zanti und d'Hächn vu seina Schuita so um de zwoanzg. De Oahn vum Fennek san oba alanig fuchzehn Zentimeta laung. Sei Schwaunz hod a Läng vu ungefäa 25 cm, s'Gwicht kimmt so auf de anahoib Kilo. Sei Föi hod a krem-göibe Foab, d'Untaseitn und stöinweis aa s'Gsicht san weiß. De iwapropoazional laungen Oahn san greßa wia bei olle aundan Wüidhunde und san fia'd Reguliarung vu da Köapahitzn guad.

Lemsraam

Sei Naum lossts schau vamutn: Da Wüstnfux lebt in da Wüstn – bsundas duat, wos saundig is und wo ma Dünen findt. Dahoam sans in da Sahara und in de aungrenzndn Gegndn und teilweis in Arabien und am Sinai.

Lemsweis

Damit eam d'Hitz vum Tog nix tuad, gehd da Fennek netta in da Nocht leischn. D'Wüstnfix lem in kloane Vabänd vu fuchzehn bis zwoanzg Viecha in am Bau, dea aus unmittlboa unta da Obaflächn liegadn Reahn gmocht is. Bei ana Gfoah kau si a Fennek aa gach in dn lockan Wüstnsaund eigrom.

Fressn tuad a Meis, Eidexn und Heischreck. Vegi mecht a aa, dawischt a oba ned so oft. Vegetarischs Fuada gibts duat, wo a lebt, mea oda weniga ned, in Gfaungenschoft frisst a oba aa Obst und Bedln. Des Wossa, wos a braucht, hoid a si greßtnteus aus seim Fressn; findt a oba a Wossaloch, sauft a duat schau aa.

Noch ana Trogzeid vu fuchzehn bis zwoanzg Tog bringt a Wüstnfüxin zwoa bis via Wöipn auf'd Wöid. In da Zeid voa und noch da Gebuat is s'Mandal wauhnsinnig aggressiv und vateidigt s'Weiwal geng an jedn Fremdn, dea daheakummt. Da Nochwuchs bleibt fia ungefäa a Joah bei seina Famülie.

S'arabische Woat Fenek (فنك‎) güit ned netta fia'd Wüstnfix, sondan aa fia'd Hosn. Des kau ma do drauf zruckfüahn, dass da Fennek launge, spitze Oahn hod, de an an an Hosn erinnan.

Laut da IUCN föihn Augom üba'd Greßn vu da Populazjon vu de Wüstnfix und aa üba'd Bestaundsentwücklung woaß ma nix. Es warat oiso möglich, dass da Fennek gfäahdet is.

Im Netz

Commons: Fennek – Oibum mit Buidl, Videos und Audiodateien

Da Wüstnfux in da tierenzyklopaedie.de
Vulpes zerda in da Roudn Listn vum IUCN 2006. Eigstejt vo: Asa et al, 2004. Version vum 12. Mai 2006