Soicha

Zan Soicha oda aa Soacha (Miktion) gehd ma, wenn d Blodan (Harnblase) foi mid Soichalen (Urin) is. Des wiad voum autonoma und wuikialichn Neavnsüstem gschteiad.

Synonyme

Nem dem Fachbegriff Miktion sogt ma zan Soicha a, je noch Region no: Wossalossn, Biesln, Pissen, Pipi machen, Ludeln, Schiffa, Brunzn, Pinkeln, Austreten.

Physiologie da Miktion

De Nian buidn kontenuiale an Seuchalen, in da Blodan wiad a gsammed. Iwa d Harnrean wiads wida ausglaard, 2 bis 6 moi am Dog, wen ma noamoi dringt. Noamoi san 300 bis 400 Millilita wos gsoicht wean, owa es gibt a Leid de wo an Lita soichan.

De maxemale Kabazetäd vo da Blodan hod an Normwert vo 400 bis 600 Millilita ba de Maana, 300 bis 400 Millilita ba de Weiwa. Wiads mera, no soicht ma se ei. De Werte san owa vo Mensch zu Mensch vaschien.

Zwoa Schliasmuskln, oana aussahoi und kweagschdreift, oana innahoi mid gladdn Musklzejna, soang dafia das da Soichalen in da Blodan bleibt. Je voia de Blodan wiad, umso mera muas da Blodanlaara (M. detrusor vesicae, kuaz Detrusor ) an Druck obassn und se enschbanna. Des nennd ma Akkommodation bzw. Compliance vo da Blodan. Schpuin da Blodanlaara und de Muskln ned zam, no fiad des za a Blodanfungdsionsschdearung, Detrusor-Sphinkter-Dyssynergie^[1] gnennd.

Obschdeigande Bohna za de Ricknmoakssegmente S1-4 hom Einfluss afs Soichzendrum im Ricknmoak.

Abhänge davo wos a sauft, broduziat a gsunda Mensch za.1 bis 1,5 Lita Soichalen am Dog, dena 2 – 6 moi ausse soichd. Den mostn Soichalen broduziat da Mensch um sexe in da friah.

Blodankontroi

A Kontroi iba s Soicha griagt a Kind easchd, wenns a Kontroi iba s Scheissn hod. Mid finf Joa san 80. Brozend vo de Kinda am Dog und in da Nocht drugga.

Fetals Soicha

Soichanda Fetus

Da Fetus soicht oi Stund und mochd damid s Fruchtwossa, wos a wida sauft.

SozioKuituarelle Faktoan

D Hoitung da Gsejschofd zan Soicha ändad se mid da Zeid und je no Kuituakroas. Des beziagt se oanaseits afs Soicha in da Effadlekeid, andraseits gibds Regln wia ma soicha soi.^[2]

Sizn oda Steh

In unsan Kuituakroas soichan Maana und Weiwa untaschiadle. A Mo ko guad soicha wenna schdäd und mid seim Zipfe kontrollian wo a hie soicht. Ea ko a sein Nama in Schnää eisoicha. A Wei ned. Weiwa soichan im sizn oda in da Hocka. In andare Kuituan, zan Beispui ba oi Afrikana, soichan Weiwa im Schdäng.^[2]^[3]

Ba uns uma und a de moastn andan Kuituan hod se owa de schdäade fia de Maana und de sizande Köabahoidung fia de Weiwa, ois sozioe Noam edabliad.

Damid Weiwa a schdäand soicha kinna, (wenn a effandlichs Glo dasoichd is und ma se ned neihocka mog oda fia draussd zan Soicha) hod ma ois Huifsmiddl a Babbadegldrichdasüstäm afn Moakt brocht. A Weiwaurenoie fia effadliche Glos hod ma dafundn, wou a Wei fast schdäad soicha ko.^[4]

Ofd wiad owa a gwinschd, das se d Maana zan Soicha afs Glo sizn soin. Wei vui Maana ofd des Urenoi goa ned dreffa und ois dasoichan.^[2]^[5]

Effadlichs Soicha

Bis ens 19. Joahundat eine woas a in de westlechn Gsejschoftn iable, im Freia zan soicha. Wia d Leid owei mera in d Stod neizong san, homs d Kanoisation ausbausd und ma hod Sanedäranlong, wia Urenoi und Glos dabaud. Dene Leid in da Stod hod des a langsam gschdunga, das ibaroi hie gsoicht woan is, no hod mas effadliche Soicha sangtioniad.

Z Deitschland is s effadliche Soicha a Oadnungswiadrekeid, in Esdareich a Ostandsvaletzung. Owa ba Groußvaanstoidunga wia Fasching, Musi- oda Oktobafest, wiad se ofd nix gschissn (bsundas mim Rausch) und ibaroi hie gsoicht. Ma stejd scho a mobile Glos af, damid da Haubdtei vo de Leid do nei gehd. Z Amsdadam homs effadliche Urenoie baud, de oms voum Drodoa aussafohn und am Dog im Boon bleim.

S Soicha is oiwei mera aus da Effadlekeid vobannd und Briwadisiat woan. Vui Leid woin alloa Soicha, ungschdöad one Zuaschaua. Ofd san Urenoie mid an Sichtschutz seidle dabaud und Weiwa deafan a ned nei.^[2]

Soicha ba de Viecha

Olle Saigetiare soichan, haubdsechle ausm sejm Grund wia d Menschn. Owa oi Viecha doan mim Soichalen ano ia Rewia makian, oda wia de gloana Nooga an Weg. Da Soichalen zan Makian stinkt ofd gscheid.

Je gräßa d Viecha umso mera Soichalen. A ausgwoxna Äläfant ko 30 Lita soicha. A Aisbea dea im Winda schlofd, soicht do goaned.

Lidaradua

Klinke, Silbernagl: Lehrbuch der Physiologie. 4. Auflage, Georg Thieme Verlag, Stuttgart 2004, ISBN 3-13-796004-5, S. 300f.

Beleg

Im Netz

Commons: Urination – Sammlung vo Buidl, Videos und Audiodateien

Biddschee en Hiiweis zu de Gsundheitstheman beochtn!

[1] ttp://www.unimedizin-mainz.de/urologie/patienten/krankheitsbilder/urologie-des-erwachsenen/detrusor-sphinkter-dyssynergie.html?L=99999999%20oR%207%3D7

[moellring-2] 2,0 ^2,1 ^2,2 ^2,3 Bettina Moellring: Toiletten und Urinale für Frauen und Männer (PDF; 3.5 MB) Diss. Universität der Künste Berlin 2004

[3] Intersex Surgery, Female Genital Cutting, and the Selective Condemnation of “Cultural Practices”: “Interestingly, I can report, based on having lived in a small village in Togo, West Africa, that West African women used to urinate standing up, and many still do—although the practice appears to be decreasing, perhaps as a result of Western influence.” (PDF; 525 kB)

[4] Stehpinkeln für Frauen

[5] Klaus Schwerma: Stehpinkeln – die letzte Bastion der Männlichkeit, Kleine Verlag, 2000

[1]

[2]

[3]

[4]

[5]