Baldr

Der Artikl is im Dialekt Obaboarisch gschrim worn.

Baldr ("Each arrow overshot his head", 1902 vo Elmer Boyd Smith

Baldr (aa Balder, Baldur: „Herr“) is in da nordischen Mythologie da Gott vom Licht, Glick, vo da Liab und Scheenheit. Baldr is da Sohn vom Wodan und vo da Frigg, dahea da Bruada vo Hödur und Hermodr. Sei Gattin is de Nanna, eana Sohn is da Forseti.

Pflanzn de wo eam gwidmet san, hoassn auf isländisch baldrsbrá („De Wimpern vom Baldr“); dazua ghean de Gänsebleamal und de Margaritn.

Mythos

Baldr lebt z Breidablik in Asgard. Amoi hot a an Draam vo seim Tod. Drauf geht sei Muadda Frigg zu jedn Viech und jede Pflanzn und valangt vo dena an Eid, dass an Baldr nix doa. Olle legn an Eid ob, nur de Mistln frogt de Frigg ned, wei ia de z'unwichtig vorkeman.

Bei am Kampfspui vo de Asen, wo da unvawundbare Baldr mitmacht, beschiassns eam mit Speern, Stoana und deagleichn, ohne dass an Baldr wos ausmaocht. Da Loki nutzt des owa aus und gibt am blindn Bruada vom Baldr, am Hödur, an Mistlzweig zum Schiassn. Da Baldr wead damit troffa und stiabt.

Da Leichnam werd af am Schiff afbewohrt und dann samt Schiff vabrennnt. Da Donar segnet an Leichenbrand mit seim Hamma Mjölnir. Sei Vadda Wodan gibt eam an Ring Draupnir mit auf de letzte Fohrt nach Hel. De Gattin vom Baldr, Nanna, stirbt während de Bestattungsfeierlichkeitn an brochanan Herzn und werd zamma mitn Balder vabrennt.

Neiere Forschungsergebnis lossn an Schluss zua, dass in ana äitan Version da Wodan sein Liablingssohn umbrocht hod. Des Spui vo de Asen, aufn Baldr z schiassn, deit auf an oidn Opfaritus hi, ums Gedeihn vo oim Lebendign z sichern.

Deitung

Mit da Lichtgstoit Baldr vaschwindn Glick und Scheenheit aus da Wäit und Ragnarök (Gettadämmerung) ruckt näha. Ois Personifizierung vo da Sunna, steht sei Dod mit da Sunnwend in Vabindung. So wia de Sunn mit da Summasunnwend schwächa werd und mit da Wintasunnwend wieda stärka, so stiabt da Baldr und werd wiedageborn.

Biacha

• Jacob Grimm: Deutsche Mythologie. Marix Verlag, Wiesbaden 2007, ISBN 978-3-86539-143-8. 
• Edward Otto Gabriel Turville–Petre: Myth and Religion of the North. The Religion of Ancient Scandinavia. London 1964.
• Anatoly Liberman, "Some Controversial Aspects of the Myth of Baldr," Alvíssmál 11 (2004): 17-54 [1]

Im Netz

Commons: Baldr – Buidl, Videos und/oda Audiodatein