Legio III Italica

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
Datei:Antoninianus Gallienus 260-leg 3 Italiumajpg
A Antoninianus dea untam Gallienus im Joa 260 bregt fia d drite italische Legion woan is. Auf da rechtn Saitn siagt ma in Schdoach, s Legionssimbol fu da III Italica und es schded "VI Pia, VI Fidelis" (6 Moi blichtbewust, 6 Moi drai/loijal)

D Legio III Italica (drite italische Legion) woa a römische Legion, de fum Kaisa Marcus Aurelius im Joa 165 noch Grisdus gemainsaum mid da Legio II Italica in Italien ausghom woan is, zu ana Zaid wo s römische Raich glaichzaitig am Limes in Geamanien, an da Donau geng de Markomanen und im Ostn geng de Partha im Griag woa. D drite italische woa baim Markomanen-Griag an da Donau dabai und hod schbeda d Grenz fum römischn Raich in da Brovinz Raetia II bewocht und s Hauptquartia in Castra Regina (Rengschburg) ghobt.

Gschicht[VE | Weakln]

D Porta Praetoria fum römischn Loga in Castra Regina
D Schüd-Foam fu da Tertiani Italica, da Comitatensis Legion de aus da III Italica entschdaundn is.

Markomanen-Griag fum Marcus Aurelius[VE | Weakln]

Glai nochdem d drite italische Legion grünt woan is, han im Joa 166 de Markomanen iwa d Donau ins römische Raich aigfoin und haum de Brovinz Noricum und Pannonien fawüst. Da Kaisa Marcus Aurelius hod mid mearane Legionen de Gengofensifn gschdart, de in da Gschicht ois Markomanen-Griag bekaunt is. Unta saim Befö han d Legio III Italica sowia de II Italica und de I Adiutrix an de Donau zong und haum de Markomanen zruk drengt. Da Marcus Aurelius hod de meara Zaid fu saina Regentschoft an da Donau in Carnuntum fabrocht und is im Joa 180 woaschainli sogoa doat in da Gegend in Vindobona, im haiding Wean, gschdoam.

Untam Septimus Severus[VE | Weakln]

Im Biagagriag fum Joa 193 hod d Legio III Italica in Septimus Severus untaschdizt und eam ghoifn saine Gegna zan schlong, zeascht in Pertinax und in Didius Julianus, daun in Pescennius Niger und in Clodius Albinus. In deara Zaid woa de drite italische Legion waid weg fu da Donau, in Italien und im Ostn fum römischn Raich.De Loijalidet zan Kaisa hod si a noch n Dod fum Septimus Severus ghoidn und d Legio III Italica hod fia sain Nochfoiga in Caracalla in saim Fødzug geng de Alamannen im Joa 213 kempft.

Im 3. Joahundat[VE | Weakln]

Said da kuazn Regentschoft fum jungen Kaisa Gordianus III., dea nochn Dod fum Maximinus Thrax ois 13jariga römischa Kaisa woan is, hod de drite italische Legion in Bainaumen Gordiania draung. Wos owa do genau dafia da Grund woa und wo de Legion fuan Gordianus III. aigrifn oda kempft hod woas ma ned. Es kaun owa sai das de Legion in dea Zaid gauns im Ostn baim Fødzug fum Gordianus III. geng des Sassanidn Raich gfiad hod (243-244).

Danoch woa d Legio III Italica auf jedn Foi wida in Rengschbuag und woa doat in de faschidanen Mochtkemp involviad de im 3. Joahundat oft fu de mechding und schdoakn Donaulegionen entschidn woan san. Ma woas dass fian Gallienus geng sain Rivaln in Postumus kempft hod und des weng in Eantitl VI Pia VI Fidelis griagt hod, wos so fü wia "6 Mo blichtbewust, 6 Moi drai" hoast. Schbeda hod is sogoa VII Pia VII Fidelis draus woan. Ma woas a das d III Italica im Joa 273 baim Fødzug fum Kaisa Aurelianus geng de Königin Zenobia im Ostn fum Raich dabai woan, obwoi s Hauptquartia oiwai in Rengschbuag blim is.

Am End fum Römischn Raich[VE | Weakln]

De drite italische Legion wiad a am End fum 4. Joahundat nu ois Dail fu da römischn Schdraidmocht an da Donau fu de Beleg aufglist. In deara Zaid woa s owa koa komplete Legion mea sondan neta a comitatensis Ainhaid, de im Hintalaund fum Limes schdazioniad woa. Dano woas ma laida neama recht fü wos aus ia woan is und wo s aufglest woan is oda im Kaumpf unta gaunga is.

Schau aa[VE | Weakln]

Beleg[VE | Weakln]