Pumuckl

Da Pumuckl auf na Deitschn Sondabriafmarkn

Pumuckl, so nennd se a kloana Kobiod in na boarischn Höaspui-, Feansäh- und Biachaserie füa Kinda: Der Meister Eder und sein Pumuckl.

Da Pumuckl is a kloans Mannschkal mid roude Hoar am Kopf, dea füa mehrane Genarationan zu de beliebtastn Figuan in da Kindauntahoitung zäihd.

Eafundn hodn "sei Muatta", wia s a oft gnennd wead, d Ellis Kaut, anno 1961 fürn Boraischn Rundfunk ois Höaspuiserie. Spaata san nacha seine Gschichtn auf Schoiplattn, Kassettn, Biacha und Feansehserien aussekemma. Schließle homs no drei Kinofuim mid eam gmacht und a Musical.

Newam Pumuckl de Hauptfigua is da Schreinamoasta Eder, bei dem da Pumuckl lebt.

Beim Moasta Eder, am äitan Jungsäijn, dea in seina a weng vakruschtn Schreinaweakstod oide Möwe richt und restauriad, schaugt da Pumuckl, a Nachfahr vo de Klabautamenna, dea irgandwia noch München kumma is obwois do koane Schiff ned gibd, auf da Suach noch Amteia bappn. Und zwar an am vaschmiadn Leimhofa. Weil füa an Koboid nix aussa Koboidsgsetz guitn, und de grod voaseng, daß' bei dem Menschn bleim miassn, an dem seim Zeigl se festhenga wann ea do is, und se eam zoang miassn, muass da Pumuckl auf äwig beim Moasta Eder bleim und, dea konn den normal unsichtbarn Koboid aa seng, wenn koa andra Mensch in da Näh' is.

Da Pumucklbrunna im Luitpoidpark in München, dea in unreglmäßige Abständ und Weitn spritzd (speibd).

Am Pumuckl sei Charakta

Da Pumuckl is meistns a kindischa, bissl unreifa Spitzbua, dem schnäij langweilig wead und dea gean Gedichtl macht und Schoklad isst.

Am liabstn mog da Pumuckl ois Nachfahr vo de Klabautamenna, de ja Sääleid warn, ois wos mid Schiff oda Boot zsammahänd. Weils in Bayern hoid weniga Schiff gibt, suacht se da kloa Koboid des wos eam am nächstn fui Freid macht, a Unordnung. Drum gfoid eam ja aa de Werkstod vom Eder so guad, weil do Brettl, Weakzeig, Krusch und Sagmäih und aussadem Howespän rumlieng.

Üwa sei Lem ois Klabauta voam Moasta Eder, is genauso weng gsogt, wia üwa sei Oita. Nua, daßsa unsichtbar war, daßsa nix hod essn miassn und daßsa se ned vakäitn hod kenna.

Kinda, füa de ja de Gschichtn gschirem worn san, vastengan des ganz guad und kennan se auf da Stäij in seine Soang und Gedankn, üwa de's vielleicht grod säim nochdenkt hom, neivasetzn.

Da Moasta Eder siechtn ois sei Kind oo, des a beschützn und aa eaziang muass. Ea prowiad aa oft, am Pumuckl ebbs beizbringa, wia's lesn oda Grundsätz vo da Moral, hod awa häifig ned den Eafoig, den a se wüschd. Zum Beischpui gibta se Miah, am Pumuckl a stäijn obzgwohna, awa weil des bei de Klabauta ogborn is, kimmd da do nia weida.

Da Pumuckl is auf da oan Seitn manchmoi recht säibstsichte' und bringt se säim und andane damid haifig in Schwierigkei'n oda duad oam (meistns am Kind oda na alloastähadn Frau) deszweng a Unrecht oo. Wanna awa meakt, daß des a Fähla war, beisstn s Gwissn arg und ea duad ois um dea Peason zum Häiffa ums wieda guat zmacha. Eigantle hod da Pumuckl nämle s Heaz aufm rechtn Fleck.

Moasta Eder

De wichtigste Figua aussam Pumuckl is in dera kloana Gschichtnwäid da Schreinamoasta Franz Eder. Da Moasta Eder is so gseng des genaue Gengteil vom Pumuckl. Ehrlich, ruhig, hoit se so guad wias gehd aus am jen Streit oda Schwierigkein ausse, vasuacht oiwei a gütliche Lesung z'findn. Aaa wanns in seina Weakstod manchmoi recht vakruscht ausschaugd (an dem meistens da Pumuckl dra schuid is), is a a recht oadntlicha Mensch dea deszweng in seina Wohnung a Putzfrau (gspuit von da Erni Singerl) oogstäid hod, de s eam sauwa hoid.

Ea hoit se aus Üwazeigung an Gsetz und Ordnung und is alloa scho deszweng üwahaupt ned midm Pumuckl seine Streiche wias dea nennd, einvastandn, voa oijm wenn dea ebbs stuit. Grod weil da Moasta Eder so rechtschaffan is, is eam de Lag oft recht peinlich in de n da Pumuckl bringt, weil a des ja midm Kobold ned eaklean koo ohne daß n oana fia varuckt hoid. Letztans is awa grod oft des wos eam nacha doch bassiad: Daß d Leid moana, ea hod, weil a ois Jungsäij so alloa is, a weng an Sparrn weg.

Da Moasta Eder hod no a Schwesta, de kimmd awa säim ned oft voa, wenn nua am Telefon und a Nichtn, in de si da Pumuckl amoi a bissl valiabd hod. Außadem hod a no an Neffen (von dem is aba nua da Nennonkel), dea moi zum prowian beim Eder s schreinan lerna duad und prompte midm Pumuckl zsammruckd. Sunst is nix üwa seine familiärn Vahäitnis bekannd.

Da Eder is scheints ned unbedingt am gsäischaftlichn Lem in da Stodt intressiad, weil a se sovui in seina Weakstod oda midm Pumuckl beschäftigd. Soi awa ned hoassn, daßsa deszweng ungsellig war. Ea triffd se reglmäßig im Wirtshaus am Stammdisch mid seine Handweakakollegn auf a Hoiwe Bia zsamm.

Da Pumuckl ois bayrischa Kuituaträga

De Pumucklgschichtn spuin fast ausschließle in Minga, in am Hintahof vo da Stodt. In de Fuim homs de Szenen vo da Weakstodt im Lähchl, in am Hintahof vo da Wiedenmayerstraß' 2 drahd. Olle Oat de in da Serie voakemma san in irgndna Weis a typisch füa Minga. De Schaupiela, de des Umfäid vom Pumuckl spuin oda synchronisiad hom, san oiddiende Voiksschauspiela de aa an Dialekt a so ren, wia s n in Minga in da Effntlichkeid ren dan, wanns wissn, daß eana aa Leid zuahean, de ned aus Minga stamma. In de Gschichtn san oft aa Charakter zoagt, de ois "typisch" boarisch oogseng san.

Aussahoib vo Bayern wundan se vui Leid, warum se da Pumuckl oft mid Sachan beschäftigd, de ma aussahoib vo Bayern ned oft so im Umgang mid Kinda siechd. Zum Beispui rauchan de Eawachsna in de Gschichtn haifig oda dringan a Bia, es fäihn in de Fuim a ned de diaffn Einblick in d'Diandlausschnitt oda da lüstane Großvadda. .

Des muaßm freile im Zsammahang nacha mid da boarsichn Wiatshauskuitua seng, de zumidest in de Sechzgerjohr no a grässane Roijn gschpuid hod ois wia heid no. Biadringa, Raucha und Beinandhocka am Stammdisch guit füa fui a heid noo ois da Inbegriff vom Griawign. Aa, daß da Pumuckl gean a Bia dringt is vo da typisch boarischn Gwohnheid obgschaugt, grässane Kinda moi von da Hoiwe vom Vatta a Schlickal dringa zlassn im Wirtshaus.

Weidas kimmd manche aussahoib vo Bayern de a weng deabe Sprach, so sogt da Moasta Eder scho moi "scheißfreindle", oda daß de Leid in de Gschichtn fluacha, a weng fremd. De Sprach, de da Eder und de meistn ren, stäid de gwöhnliche, im gmäßigtn Dialekt a weng vastendlicha ausgsprochane, Mingana Umgangssprach dar. Dabei wead a deitlich, daß in Minga no vui andane Dialekt gredt wern, wia Schwobm oda Niedabayern usw. Zu dera Umgangssprach ghean a obgmuidate Fliach wia Kreiz, Bianbaam Hollerstaudn, oda em Scheißglump vareckts und wead a ned ois vuigäar oogweng.

Dea Artike is grod no a Skizzn. Wenst meara zum Thema woasst, bist recht herzle einglodn, ebbs dazua zum schreibm. Wenst a Huif brauchst, konst auf da Huif-Seitn nochschaugn oda afd Dischkria-Seitn vom Artike geh und duat middischkrian, wias midm Artike weida geh soid.