Arbeiter-Cottage Favoritn

Der Artikl is im Dialekt Weanarisch gschriem worn.

Des Arbeiter-Cottage, oda Kaiser Franz Josef-Jubiläumsstiftung g'hass'n, is a Wauhnungsgebiet mid 18 Heisa, de wo im 10. Weana Beziak Favoritn stehngan. De genaue Adress' is Absberggåss'n 16–20, und zwoa zwisch'n Absberggåss'n, Puchsbaumgåss'n, Schrankenberggåss'n und Kiesewettergåss'n. De Oat von Oawata-Famülienheisa is in dera Fuam füa Wean gaunz ung'wehnli und aussadem anzichoatich g'wes'n. De Aulåg' is 1884–1886 nåch da Planung vom Josef Unger errichtet wua'n. De Baugrupp'n steht jetzt'n unta Denkmoischutz.

Glei daneb'n is de bekaunnte Ankerbrotfabrik.

G'schicht' und Bauweis'

1884 is unta da Leitung vom Architekt'n Dr. Maximilian Steiner da sozeaule „Verein für Arbeiterhäuser“ in da Kiesewettergåss'n gründ't wua'n und da bekaunnte Architekt Josef Unger håt den Auftråg kriagt, a Mustasiedlung zum plana. So is drauss'n in Favorit'n seit 1884 a klaane Grupp'n von Oawatawohnheisa entstaund'n, da öitaste sozeäule Wohnbau in Wean. Vuabüid woa'n de Reih'nheisa mid klaane Vuagäat'n (Cottages) wia's daumois in England scho bestaund' hau'm. Weu da Unger bei da Eis'nbauhn g'oawat håt, erinnan de Heisa stoak aun de daumåliche Bauhnhofsgestoitung. De eascht'n 12 Heisa sa scho 1884 baut wua'n, no amoi viere daunn 1886.

Gaunz neich füa Wean woa'r aa, dass de Heisa an direkt'n Wåssaauschluss g'håbt haum, oiso net nua'r a Brunnan drauss'n im Hof und des Klo woa'r a Wåssaklosett. Jed's Haus woa füa zwaa bis drei Famülen oda füa'r a Großfamüle voag'sehg'n. Innahoib von 25 Jahrl'n soittat'n de Bewauhna duach an Zuaschlåg auf eahnare Zinszåhlungan de Heisa ois Eig'ntum besitz'n.

Uaschprüngli woa'n doppet so vüi Heisa, nämli 36, vuagsehg'n g'wes'n, owa nua de Hoibscheid is baut wua'n, weu si de Idee daumois net håt finanzian låss'n. Es woa'n nämli net g'nua Leut' då, de wo den Zins und den Kaufzuaschlåg hätt'n zoi'n kenna. Drum is 1886 da Varein aun de „Kaiser Franz Josef-Jubiläumsstiftung“ üwageb'n wua'n, wobei daunn de Mietvatrag' in gaunz noamale ung'waund'lt wua'n san. Hauptsächli Eis'nbaunha woa'n daunn de neich'n Mieta.

• 
  Absberggåss'n 2
• 
  Absberggåss'n 16–20
• 
  Puchsbaumgåss'n 4–14
• 
  Schrankenberggåss'n 2

Literatua

• Christine Klusacek/Kurt Stimmer: Favoriten. Zwischen gestern und morgen, Mohl Verlag, Wien 2004, ISBN 3-901781-38-1; S. 92–93.
• Maria Kinz: Lebenswertes Favoriten, J&V Edition Wien, Wien 1992, ISBN 3-85085-083-0; S. 100–101.

im Netz

• Des Arbeiter-Cottage und sei' Architekt Josef Unger auf David Jüdische Kulturzeitung
• Eigner/Herbert/Resch: Sozialer Wohnbau in Wien . Eine historische Bestandsaufnahme. Verein für Geschichte der Stadt Wien, Wien 1999; S. 49-100