Carlos Santana

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
Da Carlos Santana mit seina Gitarr

Da Carlos Santana, dea wos 1947 im mexikanischn Jalisco afd Wöd kemma is, is a Musika und Gitarrist, da Wegbereita vum Latin Rock und ana vo de bekaunntestn und einflussreichstn Rockmusika iwahaupt, dea wos mittlaweile guade 85 Miljonen CDs unta de Leid brocht hod.

Werdegaung[VE | Weakln]

Scho mit via Joa hot eam sei Vota s'Geingspüün gleant. Da Carlos Santana hot si oba ois Ochtjahrigha, wia da Rock'n'Roi aufkemma is, entschieden, mitm Gitarrnlerna zum ofaunga. Daun is de Familie noch Tijuana zong, wo a in Klubs vü dazualerna hot kina.

A poa Joa späda san seine Leid weidazong noch San Francisco und ea is daun aa nochikemma. 1966 hod a mit Gleichgsinnte de Santana Blues Band ins Lem gruafa, wos de Gebuatsstunda vum Latin Rock woa. De Klaungmischung vu Blues, Rock'n'Roi und lateinamerikanischn Rhütmen is bis heit anzigoatig. 1969 nemman de Leid de LP Santana auf, de wos duachs Woodstock-Festival wödweit bekaunnt woan is. Des Album woa zwoa zwa Joa in de Top-Fümf vu da amerikanischn Vakaufslistn, Spitznreita woas oba trotzdem nia. Genauso net gaunz auffe kemma san de erstn Singls Jingo und Evil Ways.

Mittlaweile is de Gruppm, de am Aufaung fümf Leid ghobt hot, af sechsi augwochsn gwen. Zu siebt woans daun schau beim zweitn Album, Abraxas, im 70a-Joa. Des Album is Numma ans woan, de drei Singls Samba pa' Ti, Oye Como Va und Black Magic Woman oba net, obwoi olle unta de erstn Zehn kemma san. Noch da Tuanee zu Santana III ,im drittn Album, hom si de Leid 1971 gtrennt. Da Carlos Santana hod se de Rechte afn Bandnaumen ghoidn und in de Foigejoare mit vü aundare Leid und aa allanig einige Plottn eigspüüt. Außadem hod ea aa bei aundare Bands mitghoifn.

1999 daun is des große Comeback vu da Band gwesn. S'Album Supernatural is wödweid a Erfoig gwesn und hot mit nei Grämmys in am Joa an neichn Rekoad aufgstööd. A Riesnhaufn vu aundare bekaunnte Musika hom si de Ehre gem und haum auf dem Album mitgspüüd wia zum Beispü da Eric Cläptn, Maná, Wyclef Jean und da Rob Thomas. Mit letzarem hod ea mit da Single Smooth dreißg Joa noch seina eastn Single s'erste Moi an Numma-Ans-Hit in de USA ghobt, wos aa a Rekoad is. Beim 2002ra-Album Shaman und 2005a-Album All That I Am haum wieda vü berühmte Leid mitgsunga wia Dido und Seal beziahungsweise da Steven Tyler, Kirk Hammett und de Märy J. Blidge.

Sei Bua, da Salvador Santana is aa a Musika, dea in Stil vu seim Votan im Hiphop und a im Dschäss aunnähat.

Da Carlos Santana ois Mensch[VE | Weakln]

Da Carlos Santana is a Produkt vu seina Zeit. In de 70a-Joa woan vü junge Leid auf spiritualla Suach noch se sööba. So hod si aa da Santana ob und zua am indischn Guru augschlossn. Auf da Suach nochse sööba hot ea sei Lebmsmotto gfundn des wos haaßt: Mia hant olle ans. Aufaung vu de 90a-Joa is ea bei ana kristlichn Gmeinde aktiv woan.

Schau joazehntelaung is ea aa sozial aktiv und hot in de 90a d'Milagro Faundäischn ggründet, de wos se fia Bildung aa fia sozial benochteiligte Leid stoak mocht. Des Angaschmau is mit vü Ehrungen aunerkaunnt woan und seit 1987 is de 6. Juni in San Francisco da Santana-Tog.