Eismauna
| Der Artikl is im Dialekt Hausrukfiatlarisch gschriem worn. |
De Eismauna han drai Heilige, de fum 12tn bis zan 14tn Mai hintaranaund eanan Faiadog haum und da Foiksmund sogt, das zu denane Dag fost a jeds Joa nu oa Moi gscheit frisch wiad und's a nu a lezds Moi ba da Nocht bfrean kau. Desweng sogt ma, da ma fia de Eisheiling koa Gmias ausezn soi, wos koa Ködn ned fadrogt und a de Dobfbleama liawa nu im Haus losst, bis de Dag ummi han. Zu de drai Aismauna dazua ghead oisa fiate nu as koide Soffal, de am 15tn Mai ian Faiadog hod. Wea auf Numma-Sicha gee wü mid dea Bleami und Bledschn, dea woat bis noch da Soff.
Eismauna-Schbrichal
[Werkeln | Am Gwëntext werkeln]- Pankrazi, Servazi, Bonifazi san frostige Bazi. Und zum Schluss do föd nie, de koide Sophie[1]
- Fua Bonifaz koa Somma, noch da Soff koa Frost[2]
- Wea seine Schof schead foa Bonifaz, dem is de Woi liawa ois wia's Schof[3]
- Pankraz und Servaz san zwoa bese Briada, wos da Lanzing brocht hod, des zaschdean de zwoa wida
- De drai Eismauna ohne Regn, bringan im Wainschdok fü Segn
- Waunn's an Pankratius gfriad, wiad da Goatn ruiniad
- De koide Sophie, mocht ois hie[4]
Wissnschoftliche Daklearung
[Werkeln | Am Gwëntext werkeln]De oide Bauanweisheid fu de Eismauna is koa bleda Owaglaum, sondan wissnschoftli fu da Meteorologie bschdedigt. A waunn's im Abrü und Aufaung Mai schau recht woam sei kau, kaun nöadli fu de Oipn oiwai nu a Wedaumschwung kema. Waunn iwa Noadairopa a Diafdrukgebied is, schaufit des so richdig de koide Luft fu da Arktis iwa de Noadsee bis zu uns. In schdadistische Untasuachungen is aussagfunden woan, das zu de Dag fu de Eismauna wiakli a sgnifikant hechane Woaschainlichkaid bschded, das so a Noadairopa-Zyklon nu amoi aufdaucht und koide Luft zu ins bringt. Natiali bassiad des ned a jeds Joa, owa as Risiko bschded. Des Phänomen gibt's owa nua in Middlairopa neadli fu de Oipm, wo aundas güt de Bauanrögi ned.
A de Heiling
[Werkeln | Am Gwëntext werkeln]De drai Eismauna san:
- da Pankraz, am 12tn Mai
- da Servaz, am 13tn Mai
- da Bonifaz, am 14tn Mai
- as koide Soffal, am 15tn Mai
Olea drai Eismauna und a d'Soff woan friachristliche Meatiara, de zweng eanam Glaum as Lem haum lossn miassn. Ois Glaumszaign gödn de Eisheiling ois bsondas reschpektwiadig. Wai's owa sunst a weng unbekaunnte Heilige san, iwa de de meisdn Leit nix wissn, haum's a wos mysteriöses, unbekaunnts aun sich. Des is fia so Losdogheilige grod recht. Zwoa fu eana, da Pankraz und de Soff, san in da Zeid fum Kaisa Diokletian, dea fu 284 bis 305 regiad hod, in Rom umbrocht woan. In Bonifaz hod de Diokletianische Kristnfafoigung im Joa 306 in da Provinz nu dawischt, in Tarson in Kilikien, des heit in da Diakai liegt. Da Servatius is fu ana schbedan Genarazion, wia as Kristndum schau auneakaunnt woa in Rom. Ea woa Bischof fu Tongern im heitign Hollaund und is noch da Üwaliefarung im Joa 384 fu heitnische Barbarn in Maastricht daschlogn woan.
-
da Pankratius, um 304 in Rom ois Meatiara gschdorim -
da Servatius fu Tongern, 384 in Maastricht umbrocht woan -
da Bonifatius fu Tarsus, um 306 ois Meatriara in Kilikien gschdorm -
de heilige Sophia fu Rom, um 304 untam Kaisa Diokletian umbrocht woan
Beleg
[Werkeln | Am Gwëntext werkeln]- ↑ osttirol.at: Die Eisheiligen, 19. Mai 2012
- ↑ bauernregel.net: Die Eisheiligen (Memento des Originals [1] vom 12. Juli 2014 im Internet Archive)
Info: Der Archivlink wurde automatisch eingesetzt und noch nicht geprüft. Bitte prüfe Original- und Archivlink gemäß Anleitung und entferne dann diesen Hinweis.
- ↑ brauchtumsseiten.de: Die Eisheiligen - Eismänner
- ↑ Oberösterreichische Nachrichten: Die „Eisheiligen“ halten sich heuer an den Kalender, 12. Mai 2012
