Elektronischs Energiniveau

Der Artikl is im Dialekt Inntalerisch gschriem worn.

Äläggdroona hand nárresch gloane Partiggl. Deszweng foings komischaweis ned da gwenlichna Mechanigg sundan ana andaschdn Mechanigg de wo mia Kwantnermechanigg ghoassn hod. Des bedaidd háptsechlich, dass eã ned auf Reibma bewäng wiar a gschmissna Schdoa ebba odar-a õdráde Milibidschn, sundan dass ma endweda grod song ku wo dáss hand oder wia schnöj dáss hand, awa niamois ojs zwoa ned zuagleich. Wemma seechane kloana Partikl igenwo ejne zwingd (a Potential õlegd) ofd ku ma si ausdaroaddn, dáss sogar à grod gwisse oanzejne Gschwindigkeitna õnemma kinnan - wurschd wia gách oda már dássd is vorheer õdauch hosd. Und de gwissn Gschindigkeitna bedeidn damid gleichzeidig á grod gwisse oanzejne fesde Enagina und bej de Eléggdrona hand des na gee de eleggdronischna Enarginivoos.

Beischbuia

In de Atoma do zwingan de äläggdriisch plus-mássig aufgloona Atomkern de älägdrisch minus-mássig aufgloona Äläggdroona in eana Bewägung ejne, wej ses ja qwasi õziang. Aloa scho desszweng kimmts na, dás de Äläggdroona grod gwisse fesde Gschwindigkeidna und ojso wega eanan fesdn Gwichd á grod gwisse fesde Enargian hom deaffand. A den Bejschbui ku ma si no á frog zwee wos, dás de Eleggdroona gee iid a de Atomkern ejnehaud. An aofache Anddwordd wár de, dás bois im Atomkern drinnad warn, dáss nachand a fesde Gschwindigkeit (nemlich Null) händ und zuagleich á an gwissn bekanntn fesdn Bloodz hän. Und desseij deaf ned sej (schdääd dromad wiaso). Dessweng ku koa Äläggdron ned de Energi 0 (Null) hobm. Und desszweng hauds es á iid in Atomkern eine. Wiaso dáss de Äläggdroona im elektrischna Fejd vo de Aadomkeana koa eleggdromagnäddischne Schdrojung (Arwad) owgem is na wida an andane Frog, de wo si grod inahoib vo da Kwantnereleggdrodynamik gschejd eaglean lossd.