Fritz Dinkhauser

Da Dinkhauser Fritz

Da Dinkhauser Fritz (* 16. Aprü 1940 in Innschbrugg) isch a eschdreichischa Bolitikha. Im foln Naum hoasch a Friedrich Josef Lienhard Dinkhauser.

Er isch in Inschbrugg, im Schdottail Wilten afgwogsn. Er hod drai Schweschdrn, oa eltane und zwoa jingane und sei Fotar hot ols Laundesschdelnlaitr baim Rodn Kraiz gorwat und sei Muatr woa Hausfrau. Schul gaungen isch a zersch in d'Hauptschul und nochan daun in d'Obndn-Haundlsakhademi. Ea wolt zersch Schbortla wern und hot Laichtatletikh gmoch, dabai isch a seks Mol Tiarola Maischtr im Haummawerfn worn. In de 60ga Joar hot a daun zum Bobforn gwegslt und isch 1968 im Zwoara- und im Fiarabob bai de Olimpischn Schbil fu Grenoble mitgforn. 1969 wor a a bai da Juniorn-WM in Cortina dabai. Danoch hot a si owa bai am Schdurz schwa falezt und wor sogoar a Zeidl glemt.

Schon in deara Zeid ols Schbortla hot a si bolitisch aungaschiart und isch seid 1964 Laundesgscheftsfiara fu da Jungen Generation Tirol gwen, de wo seid 1970 Junge ÖVP hoasch. 1971 isch a daun Laundessekretea fum Tiarola AAB worn. Schaun sein Onkhl und Daufpat, da Josef Dinkhauser, wor in Tirol a bekhaunta Bolitikha, dea bai da Wirtschoftskaumma wor und fiar de Volkhsbortai im Nazionalrot gsessn isch und der hot iam in seina Jugend a bolitisch gepreght. In Fritz sei Karriere wor in de 70ga Joar recht erfolgreich, glaichzeitig hot a obr imr weniga Zeid ghob fiar sei Familie und a so isch khemen, das si sei erschde Frau, d'Sigrun, mid der a drai Khinda hod, scheitn lossn hot. Schbetr hot a nu amol ghairat, sei jezige Frau d'Heidi, mid der a a nu amol zwoa Khindr hot. Aso hot a heit a recht zaumgschuasdarte Patchwork-Familie, a Soch wos bai Bolitika aus da ÖVP in Tiarol olwai nu a weng ebs ungwenlichs isch.

Said 1979 wor a Khaummrrod in da tiarola Orbaitrkhaumma, isch dort 1985 Vizepresident worn und 1991 President. Danem wor a fu 1984 bis 1993 a nu Obmaunn fu da Tiarola Gebietskraukhnkhassa. Ols AK-President isch a sowol Obmaunn fum Tiarola Bscheftigungsfarain gwesn, ols a Forschdaundsmitglied fum Konsumentnschutz. 1993 isch a Vizepresident fu da Orbaitrkhaumma esschdreichwaid worn und 1994 Frakhzionsforsizendr fum ÖAAB, olso im Orbraitr- und Aungschdeltnbund fu dar ÖVP.

In Tiarol, wo'd ÖVP d'lengschde Zeid in obsolutr Mearheit regiart hot, sein de bolitischn Khembf oft wenigr zwischn de faschidanen Boartain, ols wiar zwischn de faschidanen Fligl fu da Volksboartai ausdrogn worn. Da Fritz Dinkhauser wor dabai immr auf da Seitn fum ÖAAB und gengan Ainflus fum Bauanbund, dea in Tiarol tradizionel recht schdorkh isch, obwols gor neamr so fil Bauan gib. Er hot dabai immr eha de chrischtlich-sozialn Posizionen fadretn und wor gegn a wirtschoftsliberale Bolitikh, de mer auf de groasn Firmen schaug und weniga auf denan ianare Aungschdeltn und Orbaitr. Z'letsch wor a fu 2005 bis 2008 a Forschdaundsforsizenda fum eschdreichischn Haupferbaund fu de Sozialfarsicharungstrega.

Bürgerforum Tirol

Im Laundtogswolkhompf 2008 hot a endgültig mid da ÖVP brochn und isch mid oana aiganen Boartai gengan aumtiarendn Laundeshaupmaunn, in Herwig Van Staa, auntretn. De Boartai hot Liste Fritz Dinkhauser - Bürgerforum Tirol ghoassn und isch im Juni 2008 gauns iwaroschend mid 18,35% zwoatschderksde Boartai worn und isch seid dem mit 7 Mandatn im Laundtog fadretn. Obwol im Wolkhaumbf efda behaup worn isch, das des Bürgerforum Tirol blos da Staigbüglholtr fia de ÖVP isch, hot de Volksboartai noch da Wol a Koalizion mid da SPÖ gmoch und d'Lischdn fum Dinkhauser isch seid dem in Opposizion. Neicha Laundeshaupmaunn isch da Günther Platter.

Nazionalrodswol 2008

Am 8. Juli 2008 hot da Fritz Dinkhauser bekaunt gem, das sei Lischdn a bai de forzoganen Nazionalrodswoln kandidirn wird. Drai Wochn schbetr hot a gsog, das de sel untam Naum Bürgerliste Österreich, nit nur in Tiarol, sondern im gaunzn Laund kandidirn wird, dazua hot a owa in am jedn Bundeslaund zeasch Untaschdüzungsuntaschriftn brauch, insgesaumt 2.600, de a Aunfaung September a ole bainaund ghob hot. Bai da Wol am 28dn Septembr 2008 haubm obr blos 78.119 Leit d'Lischdn Fritz gwelt, wos eschdareichwaid 1,8% gweschn isch. Damid hots de 4% ned zaumkchriak, de ma mindeschdns brauch damid mar ins Parlament kimp und a s'Grundmandat in Tirol, wos mid 31.311 Schdiman 8,7% kchriak hot, is si nit ausdagaungen.

Im Netz

Spruch: Fritz Dinkhauser – Zitat af Boarisch

• www.datum.at - Portrait Fritz Dinkhausers im Magazin Datum
• Offizielle Intanetseitn zu da Khandidatuar bai da Laundtogswol 2008
• Offizielle Intanetseitn zu da Khandidatuar bai da Nazionalrotswol 2008