Hõagoachtnbéng

Aus Wikipedia
Zur Navigation springen Zur Suche springen
Der Artikl is im Dialekt Hausrukfiatlarisch gschrim worn.
S'Raidlhaus im Frailiachtmuseum Finstarau im Boarischn Woid, mid Hoagoachtnbeng dafoa

Hoagoachtnbeng (a "Hoagartnbank", hochdeitsch: Heimgartenbank) hod ma fria de Beng foa am Haus gnend, de diarekt an da Hauswaund im Pregoatn gschdaundn is und fu wo ma schee auf d'Schdross oda zu de Nochban gseng hod. Fria, wias nu ned so fü Autos gem hod wia heit, han do im Suma d'Hauslaid auf da Beng gsessn und haum de foabaigehadn Leit griasst und mid eana gradscht. D'Nochban und de Hausfreind han foabai kema und haum si dazua gsizt und ma is in da Sun gsessn und hod si dazöd woss neichs gibt. Domois hods a nu koan Feanseha gem und waun d'Oawad fum Dog dau woa, woa des oane fu de beliabtan Fraizeidbschefdigungen fu de Leit domois. Aus dem Grund is a d'Hoagoachtnbeng oiwai auf deara Sait fum Haus gschdaund wo d'Nochmitogssun woa.

Weata de damid zaumhenga[VE | Weakln]

hoagarchtln[VE | Weakln]

Aunalog zu da Hoagoachtnbeng hods des Woat "hoagarchtln" oda "hoagartln" gem, wos so fü hoast wia das ma d'Nochban hoam suacht und si bai eana a weng auf d'Beng dazua hukt und radscht und Gschichtln dazöd. A aundas Dialektwoat dafia is "pregartln", wos fu Pregoatn, oiso Foagoatn, kimd und genau des söwa moand.

Hoagoachtnbua[VE | Weakln]

A Hoagoachtnbua oda a Hoagoachtndiandl woan soichane Kinda, de wos oiwai bain Nochban auf Bsuach und södn dahoam baim Haisl fu de aiganen Leit woan.

Hoagoachtnbrachta[VE | Weakln]

A Hoagoachtnbrachta woa oana de wo bai da Nochmiddogszaumsizarai fu da Nochbaschoft oiwai recht wüde Gschichtn fazöd hod oda recht augem hod. Brachtn is des oide Dialektwoat fia hochdeitsch "prahlen" und den gaunzn Begrif kintad ma heit mid "Klatschtante" iwasezn.

Hoagoachtnhaus[VE | Weakln]

S'Hoagoachtnhaus woa des Haisl oda dea Bauanhof wo de Leit fu da Nochbaschoft am liawan zaumkema san, entweda wai de doating Haisllaid bsondas gostfreindli woan und a wos zan dringa und a Jausn heagschdöd haum, oda oafoch wais doat am lustigan woa und oiwai a guada Schme grend is.

Beleg[VE | Weakln]

  • Wolfgang Stöckl: Die Mundart zwischen Hausruck und Mondsee, Wörterbuch mit 31.000 Stichwörtern - Grunddialekt und Berufssprache, Edition Sommerfrische, 2008, 687 S., ISBN 978-3-902415-12-7