Hoach-Insrfrauntåg

Aus Wikipedia

Dr Hoach-Insrfrauntåg isch in dr Kathólischn Kirch a hoachr Marienfeiertig, der in 15. Auguscht gfeiert wert.

Pa die feierlichn Góttesdeanschte wern Puschn (Blumen) gweicht, dé die Fraun mit in dr Kirch néhmen. Die Puschn néhmen sie drnåch wiedr hoam unt ghåltn sie a Jåhr lång auf. Die Ploamen unt Kraitr gébm in die Pewóhnr unt in Viech Schutz va Unwéttr unt Krånketn. Die Straiß wern toalweis nåch gwisse Kriterien zsåmmgsétzt: a psundre Zåhl va Stingl (7, 9, 12, ...), gwisse Heilkraitr ghearn drzua, nét ålle va dr gleichn Årt. Die gweichtn Kraitr kénnen pa Pedårf aa fir an Tee vrwéndet, ódr in Viech untrn Fuattr untrigmischt wern.

Dårstéllung va dr Maria Himmlfåhrt

In dr Hoachspråch isch dés Féscht als „Mariä Himmelfahrt“ pekånnt, die genaure va dr Kirch vrwéndete Pezeichnung isch „Mariä Aufnahme in den Himmel“, åndre Pezeichnungen sein „Fest der Vollendung Mariens“ ódr „Unser Frauen Heimgang“. In Dialekt håt man außr „Hoachinsrfrauntåg“ die Pezeichnung „Maria Himmlfåhrt“ ibrnummen.

In dr Pibl gip’s koan direktn Hinweis, dass die Maria, die Muatr van Chrischtus, in Himml aufgnummen gwórtn isch. In erschtn Priaf an die Korinthr schreip dr Apóschtl Paul, dass erschtr dr Chrischtus van Toatn auferståntn isch unt nåchr kémmen die oan, wås zu ihm ghearn. In 4. Jåhrhundrt håt dr Kirchnleahrer Ephräm dr Syrer die Ånsicht vrtrétn, dass dr Kérpr va dr Maria nét vrwést isch nåch ihrn Toat. Dr Glabm, dass die Maria mit Leib unt Seal in Himml kémmen isch, ståmmp schón ausn erschtn Jåhrtausnt; in Jåhr 1950 håt dr Påpscht dés zun Dógma gmåcht.

Viele Kirchn sein in dr „Mariä Himmlfahrt“ gweicht. Viele Pildr stélln die Himmlfåhrt dår. In dr Minchnr Fraunkirch z. B. isch friahr a Pilt fa dr Aufnåhme Mariä in Himml afn Hoachåltår gståntn.

Pa die Orthodóxn hoaßt as entsprechende Féscht „Mariä Entschlåfung“ unt wert Énde Auguscht gfeiert.

Beleg[Werkeln | Am Gwëntext werkeln]

  • Katholisches Sonntagsblatt (Diözese Bozen-Brixen); 2011 / 33-34
  • it.wikipedia [1]
  • de.wikipedia [2]

The rejection of the term Theotokos by Nestorius Constantinople more by EIRINI ARTEMI http://independent.academia.edu/EIRINIARTEMINationalandCapodistrianUniversityofAthens/Papers/1721697/The_rejection_of_the_term_Theotokos_by_Nestorius_Constantinople