Jesse James

Jesse Woodson James (* 5. Septemba 1847 in Centerville, heid Kearney, im Clay County, Missouri; † 3. Aprui 1882 in Saint Joseph, Missouri) woa a US-amerikanischa Bandit und s bekanntasde Mitgliad da James-Younger-Bandn. No seim Doud is da Jesse James a legendäre Figua im Wuidn Westn woan.

Foto vo Jesse James

Lem

Voam Biagagriag

Jesse Woodson James is 1847 in Centerville, Missouri geborn. Seine Ejdan woan Zerelda Elisabeth Cole und da Faama und Babtistnvoastäa Robert James. Jesse hod drei Gschwista kobt: de Briada Robert jun. (fria gschtoam) und Alexander Franklin (Frank), sowia de Schwesta Susan Lavenia. Sei Mam hod nom Doud vo iram easchdn Mo no zwoamoi keirat, u. a. an Oazt Reuben Samuel, und hod a nomoi Kinda griagt.

Im Biagagriag

In Missouri hod se am Ofang voum Biagagriag de Rebejnamee net hoitn kinna und hod se zrugziang miassn. De Biaga vo Missouri woan gschpoitn zwischa Unionistn und Ohenga vo de Konfödariadn, wia de James Famil.

Da aidare Bruada voum Jesse, Frank James, hod se 1863 bei de Bushwhackers gmejd, a Gerillaoaheit, de de Unionssoidadn im westlechn Missouri bekämpft hod. De Kampf san hefte gwen, a desweng wei olle Soidadn vo da sejm Gegand ostamtn und teiweis Nochban afananda gschossn hom.

Reuben Samuel, da Stiafvoda voum Jesse, is vo da ertlichn Miliz gfoitat worn, weis wissn woidn wo se da Frank afhoit. Da Frank hod se nocha a andan Gerillaoaheit, de Quantrill Raiders ogschlossn. Mid dene hoda no 1863 am bluadign Massaka vou Lawrence in Kansas teignumma, wos 170 Maana und Kinda umbrocht hom.

Da Jesse woa 16 Joa oid, oisase 1864 a de Raiders ogschlossn hod. Mid de Kommandantn Bloody Bill Anderson und Archie Clement hoda im Septemba 1864 am Centralia Massaka teignumma, wos 22 unbwaffnede Unionssoidadn aus an Zug zeat und daschossn hom.

De Straftatn hom a Foing fia de ibrige James Famil kobt, se hom 1865 af Ooadnung da Unionsbeherdn Missouri valossn miassn.

S Reibalem

1865, da Biagagriag woa vobei, de Leid woan griasgrame und zgriagt. De Radikaln Republikana, a militante Mindaheit, hod de Firung im Stoot ibanumma und de emoign Ohenga vo de Konfedariatn hod ma s Woirecht und effadliche Ämta voweigat. Da Jesse James is oan Monad nochm Griag vou an Unionssoidadn ogschossn und schwa valezt woan. Sei Basn Zerelda "Zee" Mimms hodn gsundgflegd und spada homs keirat.

Jesse und Frank James

1868 hom se da Frank und da Jesse James mid eran oidn Freind Cole Younger zamdo und hom glei de Bank in Russellville, Kentucky ibafoin. Richde berichtigt is da Jesse oba erschd nochm Ibafoi af de Daviess County Savings Association in Gallatin, Missouri woan. Do hoda nämle an Kassira daschossn, wei a gmoand hod des is da emoige Milizoffizia Samuel Cox, dea wo im Biagagriag an Bloody Bill Anderson umbrochd hod.

Da Ibafoi und de Flucht aus da Stod hom eam den erschdn Artikl in da Zeidung brochd. Nocha hoda midm John Newman Edwards, Rausgeba da Kansas City Times zamgoawat. Dea hod dafia kempft das de oide Konfedaration in Missouri wida mea Eifluß griagt. Edwards hod Briaf voum Jesse James vaeffandlichd und an Jesse ois Sümboi via a widaastoakde Rebejon dogstejt.

Ob des an Edwards sei Idää alloa woa, de Banditnkariea za bolitisian, oda ob da Jesse James do midgmochd hod, do sans se Historika und James- Biografn ned eine.

Mid Cole Youngers Briada Bob, Jim und John, Clell Miller und no andare friare Konfedariate hod se de James -Younger Bandn vagräßat. Vo Iowa bis Texas, vo Kansas no West Virginia homs Bankn, Bostkutschn und an Joamoakt in Kansas City ibafoin.

1873 homs ogfangt Ziag zan ibafoin. Am 21. Juli homs den Rock-Island-Zuag in Adair, Iowa zan Entgleisn brochd, bei spadare Ibafoi homs nua no an Sejf im Backwong ausgraubt, de Leid im Zuag homs in Rua lossn. Des hod eam nocha a Robin Hood Imetsch eibrocht.

1874, de Eisnbohgsejschaftn hom de Pinkerton-Dedektivagendur ogwiesn de James-Younger-Bandn afzlesn. Da Dedektiv Joseph Whicher häd se af da Faam vo Jesse James Mam eischleicha soin, kuaz draf woa a hie. Dano homs de Dedektiv Louis J. Lull und John Boyle af de Younger-Briada ogsezt. Am 17. März 1874 is da Louis J. Lull beia Schiassarei af da Stroß daschossn woan. Ea hod oba no foaheara an John Younger umbrochd. Da Grinda vo da Dedektei, Allan Pinkerton, hod se etz sejm eigschoit. Zam mid Unionistn de vo dera Gegand woan, homs de Faam in da Nocht zan 25. Jenna 1875 ibafoin und an Schbrengsotz ins Gebaide gschmissn. An Jesse sei Hoibbruada Archie woa doud und seina Mam homs dano an Untaoam ambutian miassn.

Noch dem bluadign Ibafoi woa da Jesse James endguite a Sümbadiefigua in da Effadlekeid. A Gsetz, wos da James-Younger-Bandn Amnestie obotn häd, hod im Balament grouße Zuastimmung griagt. Oba da Frank und da Jesse James, oi zwoa middlawei keirat, san no Nashville zong.

Da Untagang

1876, am 7.Septemba woit de James-Younger-Bandn ian gwogdastn Ibafoi afd First National Bank in Northfield, Minnesota mocha. Da Ibafoi hod oba ned hiekaut, wei se da Bankogstejde Joseph Lee Heywood gweigad hod an Sejf afzmocha. Ea hod gsogt do is a Zeidschloos drin, wos oba ned gstimmd hod. A ois a gschlong woan is, isa dabei bliem. De Leid vo da Stod hom middlawei den Ibafoi gmeagt und hom se bwaffnet ognat. De Reiba san ausse, da Frank oda da Jesse James hod no an Heywood daschossn.

Draust hods a Feiagfecht gehm, Cole, Bob und da Jim Younger san ogschossn gwen. Se homs oba gschafft vo da Stod ausse zkemma, da Clell Miller und da William Stiles san doud ling blim. Da Kassira Joseph Haywood, und a schwedischa Eiwandara, Nicholas Gustavson, woan a doud. Ois a grouß oglegde Vafoigungsjogd ogfangd hod, homse de James Briada vo de andan trennd und san no Missouri obkaut. De valeztn Youngers und da Reiba Charlie Pitts, hom se no a Schiassarei mid de Vafoiga gliefad, an Charlie Pitts homs daschossn und de Youngers festgsezt.

Jesse und Frank san zruck no Nashville und hom unta de Nama Thomas Howard und B. J. Woodson glebt. Zee James hod via Kinda griagt, zwoa san no da Gebuat gschtoam. A noamois Lem hod an Jesse oba ned daugt und no hod a 1879 a neie Bandn grind.

1879, am 8.Oktoba hoda an Zuag in Glendale, Missouri ibafoin und dano no a Fuizoi vo Vabrechn, a zwoa weidare Zuagibafej. Oba de neie Bandn woa ned so odraht wia de oidn Gerilleros voum Biagagriag.Oi homs dawischd, oan hod da Jesse sejm daschossn, a andara is obkaut. Ois se de Beherdn fia de Reiba intressiat hom, san de James Briada 1881 wida no Missouri gflon. Im Dezemba 1881 hod da Jesse a Heisl in Saint Joseph, Missouri, ned weid vo seim Gebuatsoat gmiat. Frank James is no Virginia zong wei eam des sichra woa.

Da Hintahoit

Jesse James' Haus in St. Joseph, woa daschossn woan is

De Bandn woa wida dezimiat und da Jesse hod gmoand ea ko nua no de Briada Bob und Charley Ford vodraun. Da Charley woa scho a bo moi bei Ibafej dabei, da Bob no nia. Aus Sichaheidsgrind hod da Jesse de Ford Briada in seim Haus eikwatiad. Da Bob Ford hod oba middlawei scho midm Thomas Theodore Crittenden, Gouverneur vo Missouri gred kobt, dea an Jesse James fanga woit.

Da Crittenden woit de Vohaftung da James-Briada fia sein Woikampf nuzn. Wei de konfedariadn Kräft in da Regiarung koa hous Kopfgejd af de James Briada zualossn hom, hod se da Crittenden an de Bost - und Eisnbohgsejschaftn gwend, de af jedn da Briada 10.000 $ Kopfgejd ausgsezt hom.

1882, 3.Aprui. Grod homs an neia Ibafoi plant, do steigt da Jesse James afan Stui und mecht a Buidl enschdaum. Sein Rewoifa hoda net eistecka. De Glengheit hom de Ford - Briada gnuzt und afn Jesse gschossn. Da Schuß voum Bob Ford hod an Jesse hintam Oa drofa und ea woa glei doud.

Nom Doud vo seim Bruada hod se da Frank freiwille gstejd, is oba voa Gricht ned schuldig gschbrocha woan. 1915 isa gschtoam.

Afn Grobstoa voum Jesse James städ : Umbrocht vo an Hosnbiesla, sein Nama z nenna woas ned weat.

Veaschwearungstheorina

Oiwei wida hods Mejdunga gehm, das da Jesse James no lebt. 1958 in Granbury, Texas, is mid 103 Joa, a J.Frank Dalton gschtoam dea gsogt hod ea is da Jesse James. De Theorina hod ma nia eanst gnumma und san middlawei widalegt.1995 is da Jesse James exhumiat und a DNA-Analyse gmocht woan, de oadeite sei Identität bewiesn hod.

Rezeption

Fuima

Dutzande Fuim homs drahd iban Jesse James, oba sejtn af hisdorische Gnauigkeit Weat glegt. Ogfangt in da Stummfuimzeid im Joa 1921 midm Fuim Jesse James under the black flag, wou Jesses Bua Jesse James jr. de Titlroi gspuit hod.

• 1939 – Jesse James, Mann ohne Gesetz (mit Tyrone Power)
• 1940 – Rache für Jesse James (Fortsetzung des Films von 1939 unter der Regie von Fritz Lang)
• 1949 – I Shot Jesse James (von Samuel Fuller)
• 1957 – The True Story of Jesse James (mit Robert Wagner)
• 1972 – The Great Northfield Minnesota Raid (mit Robert Duvall)
• 1980 – Long Riders (mit James Keach)
• 1986 – The Last Days of Frank and Jesse James (mit Johnny Cash)
• 1994 – The James Gang (mit Bill Paxton und Rob Lowe)
• 2001 – American Outlaws (mit Colin Farrell)
• 2007 – Die Ermordung des Jesse James durch den Feigling Robert Ford (mit Brad Pitt)

Musi

Da Foiksong Ballad of Jesse James stejd Jesse James ois Hejdn do. Bekannt is woan duach Intapretationa vo Pete Seeger, Woody Guthrie, Warren Zevon (1976), Prefab Sprout, The Pogues (1985), Bruce Springsteen (2006) oda Van Morrison, Lonnie Donegan und Chris Barber (2006). Cher bsingt den Reiba in Just Like Jesse James af ira Plattn Heart Of Stone ausm Joa 1989. Gschriem hod den Titl Desmond Child und Diane Warren. Vo 1966–1976 hods de Rockband James Gang gehm, wo da bekannte Gitarrist Joe Walsh bis 1970 gspuit hod. Afn 1992er Oibum Boom Boom vo John Lee Hooker ist emfois a Song iban Jesse James draf : I'm Bad Like Jesse James.

Musään

A Vuizoi vo Musään im middlan Westn gengan auf des Thema Jesse James ei, haubtsechle an Oatn wo a Ibafej gwen san. De wichdegstn :

• De „James Farm“ in Kearney (Missouri)
• S Jesse-James-Wohnhaus-Musäum in St. Joseph (Missouri), woa daschossn woan is.
• De First National Bank von Northfield, Schaubloz voum Ibafoi vo 1876

Beleg

Unzejge Biacha iba Frank und Jesse James gibts, oba nua a bo san so guad reschaschiad, das ma Beweise vo Miatn untaschein ko. Nochfoigand oi vo dene Biacha :

• Settle, William A., Jr.: Jesse James Was His Name, or, Fact and Fiction Concerning the Careers of the Notorious James Brothers of Missouri, University of Nebraska Press, 1977
• Yeatman, Ted P.: Frank and Jesse James: The Story Behind the Legend, Cumberland House, 2001
• Stiles, T.J.: Jesse James: Last Rebel of the Civil War, Alfred A. Knopf, 2002
• Hobsbawm, Eric J.: Bandits, Pantheon, 1981
• Slotkin, Richard: Gunfighter Nation: The Myth of the Frontier in Twentieth-Century America, Atheneum, 1985
• Stone, A.C., Starrs, J.E., Stoneking, M.: Mitochondrial DNA analysis of the presumptive remains of Jesse James, in: Journal of Forensic Sciences 46, (2001): 173–176
• Thelen, David, Paths of Resistance: Tradition and Dignity in Industrializing Missouri, Oxford University Press, 1986
• White, Richard: Outlaw Gangs of the Middle Border: American Social Bandits, in: Western Historical Quarterly 12, no. 4 (October 1981): 387–408

Lidaradua

• Joe Hembus: Die Geschichte des Wilden Westens. 1540–1894. Der Stoff aus dem die Western sind. Chronologie, Mythologie, Filmographie. Erweiterte Neuausgabe. Heyne, München 1997, ISBN 3-453-11776-X (Heyne-Bücher 19, 487).
• Dietmar Kügler: Sie starben in den Stiefeln. Motorbuch Verlag, Stuttgart 1976, ISBN 3-87943-415-8.
• Dietmar Kuegler: Der Northfield-Raid 1876. Der letzte große Bankraub der Jesse-James-Bande. Tatanka Press, Wyk auf Föhr 2005, ISBN 3-89510-098-6.
• Bill O'Neal: Gunfighter. Alle Revolvermänner des Wilden Westens. Eine Enzyklopädie. Oesch, Zürich 1997, ISBN 3-85833-200-3.

Im Netz

 Commons: Jesse James – Oibum mit Buidl, Videos und Audiodateien

• Stadt St. Joseph, Missouri, über J. James (Memento vom 29. Juli 2003 im Internet Archive)
• Jesse and Frank James Historical Society