Kenigssää

Aus Wikipedia
(Weidagloadt vo Keenigssää)
Zur Navigation springen Zur Suche springen
Der Artikl is im Dialekt Berchtsgoanarisch gschrim worn.
Kenigssää
Königssee
Kenigssää vom Molawinkl aus gsegn
Datn
Log: Sidostn vo Bayern
Flächn: 5,22 km²
Läng/Breit: 7,195 km/1,225 km
Umfong: 20 km
maximale Tiafn: 190 m
mittlare Tiafn: 98,1 m
Voluman: 511,79 Mio. m³
Zuafliss (Westufa): Eisbach
Schreinbach
Zuafliss (Ostufa): Kenigsboch
Kesselboch
Reitlgrobn
Fallaugrobn
Brandgrobn
Obasää
Obfluss: Kenigssäa Ochn
Häh: 603,3 m i. NN
Eizuagsgbiat: 136.48 km²
Oat am Ufa: Scheenau am Kenigssää
St. Bartholomä (Ortstei)
Saletoijm
(Oijmhittn unn Goststättn)
Kessel (Bootsonlegsteijn)
Im Reitl (Ostufa)

Da Kenigssää (dt.: Königssee) liegd in de boarischn Oipn in da Näh vo Berchtsgoan, gnaua gsogd im Sidostn vo Bayern, im Berchtsgoana Land. Ea is vui meah long ois broad und umgem vo houje Beag wiaram Watzmo, dea zua Gmoa Scheenau am Kenigssää ghead.

Gspeisd wead da Kenigssää voa oijm duach an sidestli glengna Obasää.

Buidd weahnd da letztn Eiszeid, hom da so tiafe wia scheene Sää somt seine reizvoijn Ufa (ned zletzd da Molawinkl) an Ausschlog fia'n Nationalpaak Berchtsgoan gem, dea aa on Großtei van Sää umfossd.

So zehjd da Kenigssää za de herausrongdn Segnswiadigkeitn vo dera Gengd. A beliabds Ausflugszui is St. Bartholomä, do kimmd ma nua z'Fuaß iwa de Beag hi oda mim Schiff iwan Sää.

Etymologie[VE | Weakln]

Woahscheinli kimms da Nam Kenigssää ned vo "Kenig". Da Sää hod friaha Kunigsää ghoassn und des deafad van Voanam Kuno kemma. Da Nam Kuno is in historischn Quejn meahmois belegd.[1].

Log[VE | Weakln]

Da Sää fliassd duach de Kenigssäa Ochn ob, aus dea om Berchtsgoana Bohhof mid da Ramsaua Ochn de Berchtsgoana Ochn wead, des im Estareichischn na wieda Kenigssääochn nennan unn de donn in de Soijzoch mindd. Im Westn effnd se zua Ostwond vom Watzmo des tiaf eihgschnittne Eistoi, doat is aa de briahmde Eiskapejn, a Eisgrottn (van Eisbach) in om Laan Schnääkegl. Ausm Eistoi brichd da Eisbach aussi, dea duachn midgfiahdn Schutt a Hoibinsl buidd hod – des is nochan de rund 85 Hektar große Hirschau, af dea de oide Woijfoahtskiach St. Bartholomä unn a Jogdschlessal (mid om Gosthaus im Patär) lieng. Da Sää hod massig vui Forejn unn Saibling unn wead vo om Bruafsfischa obgsamt. An scheenan Blick afn Sää hod ma vo de Aussichtspunkt: Feiapalvn, Archnkanzl unn am Molawinkl.

Uma 250 m sidli van Obfluss zua Kenigssäa Ochn unn uma 30 m va Ostufa, no im seichtan Noadtei van Sää unn direkd on da Obbruchkantn zua Tiafn, is de kloane Fejsninsl Christlieger (uma 26 moi 61 m, Fläch 1260 ). Grundeingtüma is da Freistoot Bayern. Am neadlichn End van Sää liegd estli van Obfluss in de Kenigssäa Ochn da Oatstei Kenigssää vo da Gmoa Scheenau am Kenigssää.

Nutzung[VE | Weakln]

Da Sää wead vo da Bayerischen Seenschifffahrt mid 17 große Elektroboote bfoahn, dozua kimmd no a kloanas Elektroboot, wos des Moastastickl vom Bootsbaumoasta is. De easchtn Elektroboote san 1909 in Dienst kemma, des dienstejdasde no foahnde is im Joar 1920 baud woan. Eascht 2003 san stott om iblichn Hoizrumpf zwoa Boote mid om Stoijrumpf baud worn. Nem am Ausgongspunkt Ortstei Kenigssää wean de Hoitestejn Kessel (Bedarfshoitestejn), St. Bartholomä unn Salet (Saletoijm) ogfoahn.

Zuagfroana Kenigssää mid Spoziagänga

Noch eppan da hoim Foahstreckn noch St. Bartholomä eini wead de Touristn van Bootsfiahra as beeindrucknde Meahfoch-Echo on de steijn Gebiagshäng demonstriad. Dazua blosd'a in a Trompetn – wos ma se scho seit Joarzehntn aa af a Schoijplottn ohean ko.

Wei in da Näh van Sää, aussa a weng Oijmwiatschoft, koa Landwiatschoft betriem wead unn de Osiedlunga om Sää seit de 1980a Joar on de Kanalisazion ogschlossn san, is da Sää ausgsprochn sauba unn näahstoffoam (oligotroph) und hod deszweng sogoa Trinkwossaqualitet.

Da Kenigssää im Fruajoar

Zwengs seina Gress friad da Sää nua in oag koide Winta zua, im Schnitt eppan oa-, zwoamoi pro Joarzehnt. Zletzd woa des in de Monat Jenna unn Feba 2006 da Foi. De domois bis za 40 cm dicke Eisdeckn vom Kenigssää woa on insgsomt 29 Dog offiziej zua Begehung freigem. Voaraussetzung fiara soichs Natuaspektakl san a stiammassig koids Weda sowia Windstuij. De Schifffoaht wead donn eihgstejd. Wann se a ausreichnd dicke Eisdeckn buidd hod (mind. 15 cm), wead do driwa a Wondaweg noch St. Bartholomä makiad unn fia Fuaßgänga, Radlfoahra unn Longlaifa freigem. Da makiade Weg soijt scho eihghoidn wean, wei de westliche Seitn van Sää oijwei a dinnare Eisdeckn afweisd ois de estliche. Oana hod gmoand, ea brauchd se ned dro hoidn unn is nochts om 19. Jenna 1964 ohne Ealaubnis mid seim VW-Käfa iwan Sää gfoahn unn afm Rückweg vo St. Bartholomä midsomt seim Foahzeigl in da Tiafn vasunkn. Eascht 1997 san's Auto unn de steablichn Iwarest van Foahra mid Huif vo om U-Boot in 120 Meta Tiaf gfundn worn.

Buiende Kunscht unn Litaradua[VE | Weakln]

Da Kenigssää wead ned nua hiazt tausende Moi om Dog vo de Touristn ofotografiad, sundan woa scho in da friahan Zeid a bliabds Motiv vo duachaus prominente Mola (Molawinkl!) wiar am Carl Rottmann oda am Ludwig Richter. In da Litaradua ghead da Sää ned zletzd ban Ludwig Ganghofer zan Lokoikolorit vo seine Roman.

Weidane Buidl[VE | Weakln]

Literatua[VE | Weakln]

  • Schwarz, Erica: Der Königssee. Monografie eines Bergsees. Vonderthann’sche Buch-Offset-Druckerei und Verlag, Berchtesgoan, o. J.
  • Siebeck, O.: Der Königssee. Eine limnologische Projektstudie. Forschungsbericht 5 vum Nationalpark Berchtesgoan. (do ois PDF-Dokument)
  • Sieghardt, August: Königsseer Büchl. Ein Begleiter durch Kultur und Landschaft. Minga 1949
  • Vetter, Mark: Landschaftsökologische Analysen im Königsseeeinzugsgebiet. Dissertation, vorglegt 2003 z Minga (do ois PDF-Dokument)

Im Netz[VE | Weakln]

 Commons: Kenigssää – Oibum mit Buidl, Videos und Audiodateien

Beleg[VE | Weakln]

  1. Woher kommt der Name Königssee?

Koordinaten: 47° 33′ 14" n. Br., 12° 58′ 40" ö. L.