Lätn

Der Artikl is im Dialekt Obaboarisch gschriem worn.

As Lätn is a Vafoahn zan Heastejn vo Vabindunga. Ma mochd zwoa Oanzlteile on da Vabindungststej woam gnua, doss as zugemne Lot flissig wead. Wenn as Lot obkuihd und fest wead hoids de zwoa Teile zamm.

Warums hoid

A wenn de Oanzlteile ned schmejzn diffundiad a bissal wos van Lot in d' Obaflächn eine. Iwa de Diffusionsvoageng läsd se aa a weng vo dem z' vabindndn Tei im Lot af. On de Obaflächn buidd se so a Legiarung zwischn om Grundmaterio und'm Lot. Doduach pappds. Wenn nua as Lot woam gmochd wead, de Oanzltei owa ned woam gnua san gibd's koa Diffusion. Des nend ma donn a koide Lätstej, de hoit ned long. Ma ko owa koane zwoa Blechal zammlätn, wenns se nua on da Kantn beriahn. A Lätstej hoid nua, wenn se de Oanzltei iwa a ausreichnd große Fläch beriahn. Ba dem Beispui mid de zwoa Blechal miassn de a Stickal weid afanonda lieng. Wenn ma's donn hoassmochd und's Lot on da Kantn van owan Blechal schmuizn lossd fliassd's Lot wega da Kapilarwiakung unta's oware Blech drunta. Domid's bessa fliassn ko, brauchd ma zan Lätn a Flussmiddl.

Flusmiddl

As Flussmidl reinigd de Obafläch vo de zu lätndn Oanzlteile. Voa oim duad as Flussmiddl iwa ätznde Bstondteile de Oxidschicht (oiso z. B. an Rost) af da Obafläch entfeana. Nua so ko's Lot se schee vatein. Sunst bleibd's ois Tropfn lieng.

Woach- und Hoatlätn

Ma untascheidd zwischn Woach- und Hoat-Lätn. De Untascheidung gehd noch da Schmejztemparatua van Lot. Bis 450 °C redd ma vo Woachlätn, driwa van Hoatlätn. Fias Woachlätn nimmd ma fost imma Zinnlote, sei gressde Bedeitung hod's in da Elektronik und Elektrotechnik. Hoatlote bstenga za om guadn Tei aus Süwa oda a aus Messing. Eihgsetzd wead's Hoatlätn haptsechli im Roahleitungsbau.

Weakzeig zan Lätn

Ban Lätn vo Hond wead fia's Woachlätn meist a elektrisch ghoazda Lätkoim bnutzd. Fia's Hoatlätn nimmd ma a Gasflomma zan Hoassmocha.

RoHS-Problematik

De bishea bestn Lote (Sn60Pb40) fia'd Elektronik hom Blei enthoidn. Wei des giftig is, miassn neiadings laut da RoHS-Richtlinie bleifreie Lote fia elektronische und elektrische Sochn heagnumma wean. Ma nimmd etzad Zinn-Kupfa- und Zinn-Kupfa-Süwa-Legiarunga ois Lot hea. De hom owa nem om hähan Preis aa on Haffa technische Nochteile