Leitzoi

Aus Wikipedia
Der Artikl is im Dialekt Obaboarisch gschriem worn.

D' Leitzoi is a Kenngreß vo Blitzgerätn fias Photographiern.

S' is as Produkt aus da Entfernung vom Blitzgerät zum Motiv und da eigstelltn Blendnzoi, bei dera as Motiv d'richtige Helligkeit kriagt.

Wenn ma zum Beispui a Blitzgerät mit na Leitzoi vo 40 hod, bracht ma bei am 10 Meta entferntn Motiv a Blendnzoi vo 4. De Leitzoi guid fia a Empfindlichkeit vo 100 ASA. Fia andane Empfindlichkeitn muaß ma umrechna.

Film Faktor
ISO 50 0,7
ISO 100 1,0
ISO 200 1,4
ISO 400 2,0
ISO 800 2,8
ISO 1600 4,0
ISO 3200 5,7

Bei Blitzgerät mit na festn Leitzoi muaß ma bei jeda Aufnahm iaban Abstand de richtige Blendzoi ausrechna, damit ma a guads Buidl kriagt. Bei moderne Blitzgeräte mit Automatik is d' Leitzoi trotzdem wichtig, wei de Automatik den Blitz zwar schwächa stejn ko, aba natirle ned stärka. Oiso funktioniert de Automatik nua, wenn ma naha dro is, ois de Leitzahlrechnung dagibt. Im obern Beispui kunnt ma mit da Blendnzoi 4 manuell bei na Entfernung vo 10 Meta a Buidl macha, oda mit Automatik bei Entfernunga vo wenige Zanimeta bis zu de 10 Meta.

De Stärkn vo am Blitzgerät gheard einglich ois Energie in Joule ogem, aba do drunta ko se kaum wer wos vorstelln und zum Umrechna in de benötigte Blendnzoi oda Entfernung daugts a ned. S' weard a oft der Fehla gmacht, dos jemand sogt, er hod a Blitzgerät mit 1000 Watt, obwois 1000 Wattsekundn (Wattsekunden han as gleiche wia Joule) hoaßn miaßt.

Moderne Aufsteckblitzgerät hom an vastellbarn Reflektor, dea eistelln ko wia groß da ausgleichte Bereich is. Fia a Weitwinkl-Aufnahma muaß a gräßana Raumwinkl ausgleicht wern ois fia a Tele-Aufnahm. Dadurch ko de Reichweitn beim Vawendn vo lange Brennweitn erhöht wern. De Leitzoi is dann fia vaschidne Reflektor-Eistellunga untaschiedlich. Ogem werd in da Werbung natirle de gräßte Leitzoi.

D' Leitzoi werd meist fia eibaute Blitzgerät und Aufsteckblitz ogem. Fia Studio-Blitzgerät gibt ma d' Energie o, wei as ogem fo a Leitzoi wega de vuifältign Lichtforma unmöglich is. Bei Studio-Blitzgerät muaß desweng d' richtige Blendnzoi mit am Blitzbelichtungsmeßgrät oda duach ausprobiern (bei digitaler Photographie is des ja möglich) bstimmt wern.