Maridl Innerhofer

Aus Wikipedia
Zur Navigation springen Zur Suche springen

Maridl Innerhofer, oane va die pekånntigschtn Sidtirólr Muntårtdichtrinnen, isch 1921 in Marling pa Meran gepórn. Sie isch die Tóchtr van Leahrer Franz Innerhofer, der pålt nåch ihrer Gepurt in Poazn va die Faschischtn drschóssn gwórtn isch. 2011 håt sie in 90. Gepurtståg gfeiert.

Nåch dr Pflichtschual håt sie as Technische Inschtitut unt die Håndlsschual in Meran psuacht. 1939 isch’i nåch Nórdtiról ausgwåndrt unt nåchn Kriag wiedr nåch Marling zruggkémmen. Schón in dr Innschpruggr Zeit håt sie Gedichtlen gschriem, dé åbr vrlórn gången sein. Sie isch Leahrerin gwórtn, håt Gedichtlen unt åndre Såchn gschriem unt isch éffntlich auftrétn. A Zeit lång håt sie aa In Taitschlånt glép, va wó sie 1960 zrugg kémmen isch.

Ihre Gedichtlen sein oanfåch gschriem, leicht zu lésn, tiafsinnig, óftramål irónisch. Die Schreibung isch nét durchwégs lautgetrai (z.B. Kind stått Kint), wås åbr as Vrsteahn erleichtrt. Sie peóbåchtet die Umgébung unt die geschichtlichen Entwicklungen. Ihre Thémen sein vielfältig. Wichtig isch isch ihr die Erhåltung va dr Tradizión unt a saubrer Umwelt.


Ibr dr Natur schreip sie:

I mecht -
I winsch es mir so fest,
daß du dein Staunen
nit verlearnen sollsch
ibr dr Searoas,
de die Augn zuatuat,
...


Des bißl Londschoft, des bißl Grian,
wos soll mr denn drmit no tian?
...


A Gedichtl mitn Titl „Oastrsunntig“ peschreip Tradizión unt Stimmung:

Die Luft isch woach
und Sunn scheint ibern gonzn Lond.
Die Kindr
in nuidn Sunntiggwond
hom gfärpe Oar in dr Hond
und lochn ibrn gonzn Gsicht.
Die groaßn Leit nit mindr,
weil die Saison guat unglaafn isch.
...


Herznsångelégnheitn formuliĕrt sie só:

Sog du dr Lahn,
sie soll dein Haus stiahn lossn –
sog du in Wind, wia er si drahnen soll –
sog du in Wildboch,
du mecheschn in a Brinnl fossn –
sog du in Herz,
wiaviel’s lei liabm soll!


Irónie heart man aus dé Zeiln ausr:'

Miaßat aniadr an Kraizr gebm
fir oll sein ibrflissigs Redn
fir olle Wertr, de zuviel,
nor warn die Leit bol orm,
odr - - - still!


M. Innerhofer håt Auszeichnungen unt Ånerkénnungen in In- unt Auslånt kriagg. Untr ihre Piacher sein fólgete:

  • Hennen und Nochtigolln, Bozen 1976
  • In fimf Minutn zwelfe, Bozen 1977
  • A Kraut mit tausnd Guldn, Bozen 1980
  • Muansch du mi?, Bozen 1990/92
  • Dr kluane Prinz, Grassen 2002 (Ibrsétzung)
  • Nochtkastlbiachl, Bozen 1992

Im Netz[VE | Weakln]