Midtfyns Festival

Aus Wikipedia
Zur Navigation springen Zur Suche springen

As Midtfyns Festival woa a Musifestival in Ringe af da dänischn Insl Fünen. As Festival hod vo 1976 bis 2003 stottgfundn und woa longe Zeit des zwoatgreßte Festival vo Dänemark noch'm Roskilde-Festival und oans vo de greßtn vo Noadeiropa. Im Vagleich zum Roskilde-Festival is a eha traditionejs Repertoire mid beweahtn Nama präsentiat worn.

Gschicht[VE | Weakln]

Festivalsgrinda woa da dänische Gostwirt Peter Færgemann (19471991), dea's Festival ofongs noch in seina Goststätte Ryslinge Kro im Ort Ryslinge (heit in da Faaborg-Midtfyn Kommune) stottfindn hod lossn, in dem Bands und Musika aus da fünischn Folkszene aftretn san.[1] De Vaostoitung hod on Zualaf gwunna und hod in de 1980a Joarn iah Glonzzeidn ealebt, in dena's se teiweis iwa fimf Doge eastreckt hod und iwa hundad Bands aftretn san. Ois de US-amerikanische Sengarin und Songschreibarin Tracy Chapman 1989 ois Headlinerin aftretn is, woa's Festival mid 63.000 Gästn sogoa greßa ois des Roskilde-Festival.[2] Donoch san de Bsuachazoihn kontinuiali zruckgonga, obglei af dänische Greßn und bekonnte intanationoie Nama gsetzt worn is. Nochdem Færgeman im Joar 1991 zwoa Dog noch da 16. Ausgob gstoam is, hod sei Witwe Nina Færgemann s Gschäft iwanumma. Se hod'n wiatschoftlichn Niedagong ned vahindan kenna und hod de Vaostoitung 2001 on an Spoatvarein Odense BK vakafft, dea's Festival scho noch zwoa valustreichn Joarn fia oan symbolischn Betrog weitavakafft hod. 2002 und 2003 hom no uma 20.000 Zuaschaua n Weg noch Ringe gfundn und fia 2004 wäan uma 14.000 zoihnde Festivalsgäste notwendig gwesn, um de Gwinnschwej z eareichn. Doch nua wenige Wochn voa da 28. Ausgob hod da neie Eingtuima n Bankrott vom Midtfyn Festival eaklean miassn.[3][4][1] Da ehemolige Chef vom konkurriandn Roskilde-Festival, Leif Skov, hod se'n Niedagong foingdamoßn eakleat: „Da stete Weitavakaf hod's Festival mid seim Rumme und vaschiednsta Musi in olle meglichn Richtunga laffn lossn. Vui dovo hed ma on ondan Ortn im Lond ealem kenna.“ Ea hod's kloare Profij om Midtfyns Festival vamisst.[4]

Seit'm Konkuas hom lokoie Kräfte de Festivalsszene in Ringe wieda z'belem vasuacht und hom 2006 s Ringefestival vaostoit. Mid ana Mischung aus bekonntn Nama und Amateurbands sowia 1500 Bsuachan hod's owa ned on de oidn Eafoige vom Midtfyns Festival oknipfn kenna.[3]

Schau aa[VE | Weakln]

Beleg[VE | Weakln]

  1. 1,0 1,1 Ole Hoff-Lund: Det begyndte på Ryslinge Kro@1@2Vorlage:Toter Link/www.kristeligt-dagblad.dk (Seite nicht mehr abrufbar; Suche in Webarchiven). In Kristeligt Dagblad vom 10. Juni 2004, obgruafa am 30. Novemba 2010 (dänisch)
  2. Thomas Brunstrøm: 10 festivalkoncerter vi aldrig glemmer In Ekstra Bladet vom 1. Juni 2008, obgruafa om 30. Novemba 2010 (dänisch)
  3. 3,0 3,1 Den Store Danske: Midtfyns Festival, obgruafa om 30. Novemba 2010 (dänisch)
  4. 4,0 4,1 Thomas Søje Hansen: Midtfyns Festival konkurs In Berlingske Tidende vom 10. Juni 2004, obgruafa om 30. Novemba 2010 (dänisch)