Owafoan

Der Artikl is im Dialekt Obaboarisch gschriem worn.

Owafoan (Deitsch: Herunterfahren, Englisch: Shutdown) nennt ma an Voagang wenn da Kompjuta ausgschoid wead. De Gegnanwendung is Aufefoan.

Menüauswaoi beim Owafoan unta Knoppix Linux

Voagang

Beim Owafoan wean foigende Schritte duachganga:

1. Schaun, welche Anwendungsprogramme no lafan und de beendn. De lafadn Programme wean benachrichtigt und infoamiad und füan iraseids an Befehl "Ausschoidn" aus.
2. Zuasätzliche Eistejunga zum Shutdown-Prozess prüfa.
3. Olle nu aktivn Prozesse und Protokolle aufd Festplattn speichern, Gerätetreiber entferna und de grafische Obaflächn obschoidn.
4. Nutzaeistejunga speichan.
5. Kompjuta ausschoidn.

De meisten Systeme schoidn an Kompjuta nochm erfoigreichn Owafoan vo alloa aus, des ko aba a oft ausgschoid wean.

Methodn zum Ausschoidn

• Am heifigsdn wead as oafache Obafoan überd grafische Obaflächn gnutzt.
• Bei Probleme is a möglich, an - nua no sejdn voahandnen - Reset-Knopf am Kompjuta zum drucka oda an Netzschoida a boa Sekundn long zum drucka, dobei ko aba a Datnvalust basian.
• A schlechde Methode iss an Kompjuta vo da Stromvasorgung zum trenna, manchmoi aba nötig. Ned gspeichade Datn gengan dabei valoan.
• Danebn gibts a nu de Möglichkeit, as System üba an Befehl zum Owafoan:
  • Windows: shutdown -s -t 0
  • Linux: shutdown -h 0 (shutdown -r now duad as System nei startn)
  • Mac OS X: sudo shutdown -h now
  • Solaris: shutdown -y -g0 -i0
  • HP-UX: shutdown -h -y 0

Probleme

Manchmoi kos basian, dass mas System nimma obschoidn ko. Da Grund dafüa is meistens a no aktiva Prozess. Des ko a Programm sei, wo nu Datn speichad oda aa a Virus. Während ma bei Windows mid Strg + Alt + Entf an Taskmanager aufrüafd um an Prozess zum beendn, hod ma bei Linux de Möglichkeit in da Konsole mid dem Befehl kill -9 ProzessID an Prozess sofoad zum beendn. Nu a Fählaquejn ko aa a Systemfähla sei, wei as Betriabssystem grod no mid wos andam bschäfdigd woa. As Ergebnis davo is meistens a sognannta Bluescreen.