Roland Girtler

Der Artikl is im Dialekt Owaöstareichisch gschriem worn.

Da Girtler Roland (2007)

Da Girtler Roland (* 31. Mai 1941 Wean-Ottakring) is a estareichischa Soziolog und Kuituaantropolog. Ea is bekaunt fia seine fün Biacha iwa soziale Raundgrupn und wai a oft im Feansen zan seng is, wo a ois oana fu de wenigstn Wissnschoftla öfentli im Dialekt ret.

Sai Lem

Da Girtler Roland is 1941 in Wean, im 16. Hib, auf d Wöd kema ois Bua fum schbedan Launddokda Dr. Roland Girtler und den seina Frau da Leopoldine, de a a Dokdarin woa. Sai Kindheit hod a in Schbidoi am Bian, in Owaestareich, fabrocht, wo a a in d Foikschui gaunga is. Fum 1951a Joa bis 59 is a ins Gimnasium fum Glosda Gremsminsda gaunga, wo a a d Matuara gmocht hod. 1967 hod a zan Schdudian augfaungt an da filosofischn Fakuldet in Wean, wo a Etnologi, Uagschicht, Filosofi und Soziologi gmocht hod. Ois Schdudent hod a si a Zuabrod fadeant ois Biafiara, hod am Noschmoak goawat und woa Fümkompars. 1971 hod a sein Dokda in Filosofi gmocht und 1979 is a Brofessa auf da Hauptuni in Wean woan.

Ea is in Estareich recht bekaunt weng de fün Biacha de a gschrim hod, seine dailwais recht unkonvenzioneln Foaschungsmetodn und wai a weng seine Gschicht a oft im Feanseng bai Talkshows und Dischgria-Sendungen woa. Ea hod si mid da soziologischn Eafoaschung fum Lem fu Vagabundn bscheftigt, mid n Lem fu de kloan Bauan in friana Zeid und eanara oidn Schbroch. A bsondas Foaschungsdema fum Girtler Roland san a nu de oidestareichische Foiksgrupn fu de Landla in Rumenien.

Aunleslich fu seim 65a, is eam a d Festschrift "Die Wahrheit liegt im Feld" gwidment woan. Unta aundam is a a baim Corps Symposion Wien dabai, ana schlogendn Schdudentnfabindung de wo zum Kösener Senioren-Convents-Verband (KSKV) dazua ghead.

Sai Foaschung

Am Aufaung fu de 70a Joa woar a in Indien auf Födfoaschung untawegs, iwa de "demokratische Institution des Panchayat". Iwa des hod a im Joa 1971 a a Buach aussa brocht. Dano woar a in Indien a nu in Gudscharat (Gujarat) und in de Slams fu Bombay (heit Mumbai). Schbeda hod a si owa a mim Lem fu de bessa gschdöde bscheftigt, wia Arisdogratn und Bolitika. Wida dahoam woan seine soziologischn Foaschungsobjekt Wüdara und Jaga, d Raundgrupn in da Grosschdod, wia Huan, Sandla und Ganofn.

Schbeda hod a si mid n Lem fu de Beagbauan bscheftigt und Biacha driwa gschrim, genau so wia iwa Schmugla, Bolizisdn, Launddokdan und Glosdaschila. Oane fu seine unkonvenzioneln Foaschungsmetodn woa a, das a oiwai neta mim Radl untawegs is und duachs Laund foad. So hod a fü Leit kena gleand und dabai fia sei Foaschung reschaschian kina. Oane fu seine waidan Radlduan hod eam a noch Rumenien gfiad, wo a de im 18. Joahundat ausgwaundate estareichische Foiksgrupn fu de Landla kena gleant hod und schbeda fü iwa de gschrim hod.

Sai aktuels Foaschungsgebid is d Kultuasoziologi, soziale Raundgrupn und da Bauanschdaund in Estareich und Rumenien. Seine oagineln Födfoaschungsmetodn san a in da akademischn Szene intressiad fafoigt woan. Unta aundam hod a a seine Metodn genau dokumentiad und fest gschrim, damid si Schdudentn und aundane Foascha drau hoidn kinan.

Sai Kariea

Da Girtler Roland is heit aussaoadentlicha Brofessa am Insdidut fia Soziologi an da Weana Hauptuni. Zwischn 1973 und 1975 hod ar a auf da Mingana Uni untaricht. Said n Joa 2000 lait a s Musem fia „Wilderer im Alpenraum – Rebellen der Berge“, wos in Sankt Bangraz bai Hintaschdoda is, in dea Gegend fu Owaestareich, wo a sei Kindheit fabrocht hod.

Auszaichnungen

• Estareichischs Eangraiz fia Wissnschoft und Kunst, I. Klass (2002)

Seine Publikazionen

• Der Adler und die drei Punkte. Die gescheiterte, kriminelle Karriere des ehemaligen Ganoven Pepi Taschner. Böhlau Verlag, Wean 1983, ISBN 3-205-07207-3. Neu aufgelegt 2007 als 2. Aufl., Jubiläumsausgabe, ISBN 978-3-205-77610-9.
• Verbannt und vergessen - der Untergang der Landler in Siebenbürgen, Linz 1992. ISBN 3-85329-978-4
• Der Strich, Wean (LIT Verlag) 1994 ISBN 3-82587-699-3
• Wilderer - Soziale Rebellen in den Bergen, Wean 1998 ISBN 3-20598-823-X
• Landärzte. Als Krankenbesuche noch Abenteuer waren, Böhlau Falog, Wean (1998, 2. Auflog), ISBN 3205990129
• Methoden der Feldforschung, Wean (LIT Verlag) 2001 ISBN 3-82522-257-8
• Echte Bauern. Der Zauber einer alten Kultur, Böhlau Falog, Wean (2002), ISBN 320577017X
• Die feinen Leute, Frankfurt (Campus) 1989, neu aufgelegt bei (Böhlau) 2002. ISBN 3-59334-133-6
• Die 10 Gebote der Feldforschung, Wean (LIT Verlag) 2004. ISBN 3-82587-700-0
• Vom Fahrrad aus, Wean (LIT Verlag) 2004. ISBN 3-8258-8660-3
• Irrweg Jakobsweg, Wean 2005
• Streifzüge des vagabundierenden Kulturwissenschafters, Böhlau Falog, Wean (2007), ISBN 3205776305

Beleg

• Hubert Christian Ehalt, Josef Hochgerner, Wilhelm Hopf (Hsg.), Die Wahrheit liegt im Feld, Roland Girtler zum 65. Geburtstag, LIT Verlag, Wean / Münster 2006.
• de.Wikipedia: Roland Girtler (gseng am 2. Nofemba 2007)
• Die Universität Online - Roland Girtler: Ein Original feiert seinen 65. Geburtstag
• Forum quantitative Sozialforschung - Wissenschaftlicher Beirat Roland Girtler
• Simbiaga Zeidung Minga - Intawiu min Roland Girtler
• Wüdaramuseum Sankt Bangraz (woa ea da Laita is)
• sei Homepeidsch bai da Uni Wean Ao. Univ.-Prof. Dr. Roland Girtler