Schbrosswokale
| Der Artikl is im Dialekt Owaöstareichisch gschriem worn. |
A Fenomen fum Boarischn, wos owa heit neta mea in gauns wenig Regionen und doat a neta bai de ödastn Dialekt-Schbrecha fia kimt, san de Schbrosswokale. In da Schbrochwissnschoft wiad des intanazional a mim grichischn Woat Anaptyxe (anaptyxis = Entfoitung) oda Sanskrit: Svarabhakti (da Wokal aus da mitlan Rai) bezaichnet und kimt a in aundane Schbrochn fia. Des gaunze entschded foa oim, damid beschdimte Wokabin and n Glaung und de Schbrochmelodi aubasst wean kinan.
Schbrosswokale und d R-Wokalisiarung
[Werkeln | Am Gwëntext werkeln]Schbrosswokale gibt s im Boarischn foa oim geografisch doat, wo koa R-Wokalisiarung gmocht wiad. Dabai blaibt s R im Auslaud, oiso am End fu ana Süm oda am End fu am Woat, eahoidn, und es wiad zwischn m R und im Konsonant, dea danoch kimt, nu a Wokal aigfügt. Wöcha Wokal des is, hengt fu de Wokale dafoa ob.
Oft wiad a heit a Mischfoam gret, wo s R so hoiwads wokalisiad wiad - oiso es entschded a zusezlichs A, drozdem blaibt s R eahoidn und es wiad nu a Anaptyxe aigfügt.
| Hochdeitsch | R wokalisiad | mid Schbrosswokal | Mischfoam |
|---|---|---|---|
| Herbst | Heabst | Heribst | Hearibst (Hiaribscht) |
| Berg | Beag | Beri | Beari |
| Dorf | Doaf | Dorif | Doarif |
| Kirche | Kiacha | Kira(cha) | Kiara |
| Arbeit | Oawad | Orawacht | Oaracht* |
- Faglaich: tschechisch robota und russisch rabota (Работа) und „Roboter“
Im Weanarischn
[Werkeln | Am Gwëntext werkeln]Schbrosswokale keman in ana aundan Foam sogoa im oidn weanarischn Dialekt foa. Dabai wiad zwischn zwoa Konsonant a Schwa-Laut aigfügt, oiso a kuazs neta hoibads ausgschbrochns A. Baischbü im Weanarischn:
| Hochdeitsch | Weanarisch | Schbrosswokal |
|---|---|---|
| Verschwinde! | Faschwind! | Faschawind! |
| Verbrecher | Fabrecha | Fabarecha |
| abgebrannt | obrend | obarend |
| gerade aus! | grod aus! | garod aus! |
Leit, de Deitsch oda Boarisch leanan
[Werkeln | Am Gwëntext werkeln]Schbrossvokale keman heit a oft bai Leit foa, de a ned deitsche Muadaschbroch haum, in dea nia mearare Konsonantn hintaranaund fia keman (zum Beispüi Ungarisch, Diakisch) und Hochdeitsch ois Fremdschbroch leanan (DaF). Soiche Leit füng daun in hochdeitsche Wöata, owa a bai boarische Dialektwöata, Schbrosswokale ai, damid si si mid da Ausschbroch laichda dan.
Baischbü dafia san:
Schdurumpf fia 'Schdrumpf' (Strumpf)
Schanaps fia 'Schnops' (Schnaps)
Schbrosswokale bai ausgwaundate Wöata
[Werkeln | Am Gwëntext werkeln]Es kimt a fia, doss deitsche oda boarische Wöata mid soichane Schbrosswokale drin in aundare Schbrochn ois Fremdwöata iwanuma wean, wai s aso bessa in Schbrochritmus fu deara Schbroch basd.
Baischbü: Kuruş (diakische Wearungseinheit) aus Groschen
In da Kindaschbroch
[Werkeln | Am Gwëntext werkeln]A kloane Kinda broduzian soichane Lautfenomen maunchmoi, wauns grod zum ren aufaungan.
Baischbü dafia san: Sandara schdod Sandra
Baischbü
[Werkeln | Am Gwëntext werkeln]Baim Liad Akipenga fum Hubeat fu Goisan (Liad 12 aufn "Gombe"-Album) keman im Aufaungsgsazl glai a gaunza Haufn fu Schbrosswokal fia, aso wias im oidn Goisaradialekt gret woan han. S'Gsazl, wos um Afrika ged, hoast aso:
- Do wo de hea keman iss woitla hoas
- Owa ned an jiada duad si oans so a Roas
- Wai d’Leit san orim und s’Bia is worim
- Owa an am worim Bia is nu koana gschdoarim
Beleg
[Werkeln | Am Gwëntext werkeln]- da hochdeitsche Wikipedia-Artikl iwa s Weanarisch, am 16tn August 2007
- da hochdeitsche Wikipedia-Artikl iwa d Schbrosswokale, am 16tn August 2007
- da englische Wikipedia-Artikl iwa d Anaptyxis, am 16tn August 2007
- Hornung Maria, Roithinger Franz: Unsere Mundarten, Österreichischer Bundesverlag, Wien 1950
- Werner Abraham: Terminologie zur neueren Linguistik. 2., völlig neu bearb. u. erw. Aufl. Band 2, M–Z. Niemeyer, Tübingen 1988, ISBN 3-484-10605-0.
- Helmut Glück (Hrsg.): Metzler Lexikon Sprache. Metzler, Stuttgart 2000, ISBN 3-476-01519-X.