Tilman Riemenschneider

Tilman Riemenschneider (* um 1460 z Heiligenstadt; † 7. Juli 1531 z Wiazburg) is oana vo de berihmtastn Buidschnitza und Buidhaua. Glebt hod a am Ibagang vo da Spadgotik zua Renaissance umara 1500.

Lebm

1483 is a in sei Woihoamat Wiazburg kema. In da Firschtbischofsstod is a im sejm Joar ois Molaknecht in de Gilde vo de Mola, Buidhaua und Glosara aufgnumma worn. 1485 is a duach de Heirat vo ana Tochta vo an Goidschmiedemoasta sejm Moasta worn. Andasta warad des fia Ortsfremde fast ned megli gwen.

Bis 1500 hod as nacha zu grossm Reichtum und Osegn z Wiazburg brocht: mehrare Haisa, Weinberge und a floriarende Werkstott hom eam gheat. 1504 is a Ratsherr worn, vo 1520 bis 1525 wor a sogor Buagamoasta vo Wiazburg. Zu dea Zeit hom si de Wiazburga und aa da Stodrat imma mehr gegnan Firschtbischof und Landesherrn gstejt, dea wo iba da Stod in da Festung Marienberg residiat hod. 1525 is nacha im Zug vom Bauanaufstand zur Eskalation keman. De Wiazburga Biaga hom si mit de Bauan vabindt und hom de Festung belogat. Olle Ogriff san oba obgwehrt worn. Des Bauanheer is 1525 aussahoib vo da Stod gschlogn worn. Drauf hod da Bischof de Stod ogriffa und erobat.

Olle Ofiara vom Biagaausstand und a olle Ratsherrn san auf da Festung Marienberg eingsperrt und grausam gfoitat worn, aa da Tilmann Riemenschneider. Ob da Riemenschneider nacha je wieda orbatn hod kena, is ned bekannt. Gsichat is, dass a grossa Tei vo seim Vamegn einzogn worn is und dass a nia mehr an gressan Auftrog dahoidn hod. Da Bischof hod a dafia gsorgt, dass da Riemenschneida schnej vagessn worn is. Erscht im 19. Joarhundat san seine Weake eam wieda zuagoadnet worn.

Stui

De Figurn vom Riemenschneider hom ausdruckstorke, oft meditative, Gsichta und ganz feingschnitzte Gwanda. An Hauffa Weake san vo eam nia forbig gstoit worn, oft is de Forb eascht spoda dazuakema. Es wor da easchte berihmte Buidhaua, dea wo de Hoizsicht bevorzugt hod.

Galerie

Detail vom Creglinger Marien-Retabel (kannt a Sejbstportrait sei)
Heilige Barbara, umara 1510, Bayerisches Nationalmuseum, Minga
Hl. Magdalena vo Engln eahobm, 1490/1492, Bayerisches Nationalmuseum, Minga
"Riemenschneider-Altar" im Bamberga Dom (in Wiaklichkeit eascht im 20. Jh. aus Oanzlfigurn vom Riemenschneider zammgsetzt)
Riemenschneider Oitor "Woana um Kristus", z Maidbronn, Gmoa Rimpar, bei Wiazburg
Da Tilman Riemenschneider, Frankoniabrunn z Wiazburg