Towel Day

Aus Wikipedia
Der Artikl is im Dialekt Reichahòllarisch gschriem worn.

Da Towel Day (engl. fia: Handduach-Dòòg) is a Gedenkdòg fia den Schriftstella Douglas Adams, wo am 11. Mai 2001 gstormm is. Ab dò is wejdweid jeds Joar am 25. Mai da Towel Day begonga worn.

Handduach–Fahna in Innschprugg am Towel Day 2005

An dem Dòòg schleppan a Haffa vo seine Fans a Handdiache umanand. De Gestn hòd eanan Ursprung in dem Buach Per Anhalter durch die Galaxis, wo da unglaublich grouße praktische Nutzn vo am Handdiache auf Reisn im Universum foingdamassn bschriemm werd:

„ Im Reiseführa "Per Anhalter durch die Galaxis" hòds a bòòr Infos zum Thema Handdiacha. A Handduach, hoassts dò, is so ziemle des komodste, wòs ma òis interstellara Trämpa dabei ham ko. Auf da oan Seitn hòds an groußn praktischn Wert - du kònnst de zum Warma drin eiwickln, wannst auf de kòidn Monde vo Jaglan Beta umanandahupfst; du konnst de draufleng, wannst an de strahlnd heijn Marmorsandstränd vo Santraginus V de berauschndn Dämpf vum Meer eischnaufst; du konnst drunta schlaffa, wann de roud gliahadn Stern vo de Wüstn vo Kakrafoon iba da leichtn; du konnstas òis Segl an a Minifloß bindn, wannst den schee schtaad vor si hi fliassadn Fluss Moth òbafahrst; nòòs iss a gschickte Waffn fiaran Nahkampf; um an Schädl gwicklt schützts vor giftige Gase oda vorm Blick vom Vafressna Schnòdakäfa vo Traal (dò kanntst durchdraahn, so deppad is des Viech, es moant, wannst dus ned siggst, konns di aa ned seng - blääd wiara Birschtn, òba vafressn wia no wòs); du konnst dei Handduach òis Notsignal schwinga, und notiarle konnst de aa damid òòtrickan, wanns nachand no sauba gnua ausschaugt. Vui wichtiga òba is da psychologische Wert vo a so am Handduach. Aus irngdam Grund is des aso, dass a Strag (a Strag is oana, der wo koa Trämpa is), wann a dagneisst, dass a Trämpa a Handdiache dabei hòd, automatisch davo ausgäht, dass da Trämpa aa sunscht guad ausgrist is, òiso mid Zahnbirschtn, Waschlappn, Soaff, Blazaldosn, Trinkflaschn, Kompass, Landkartn, Bindfònn, Mucknspray, Rengjackn, Raumauzug etc. etc. Weidahi werd da Strag am Trämpa freiwillig an jedn vo dene Artikl ausleing, und aa no an Haffa andane Sachan, de am Trämpa gròd zuafällig "abhandn kemma" san. Da Strag werd denga, dass ebba, der greiz und quer durch d' Galaxis trämpt, an jedn Luxus hintlòsst, in de dreckadstn Eckn umanandagriacht, de gräßten Widrigkeitn trotzt, se schlussendle an sei Zui durchschlògt, und òllawei no woas wo sei Handduach is, auf jedn Fòi a ernstz'nemmada Kund is. “

Douglas Adams: Per Anhalter durch die Galaxis

Warum da 25. Mai?[Werkeln | Am Gwëntext werkeln]

Beim Festleng vo dem Termin hòd koa bsundas historischs Datum a Rojn gspuit. Eha waars a Kompromiss, wei ma oanaseits den Gedenkdòg so bòid wia mäglich nòch seim Dood abhòitn woitt, andraseits òba a gwisse Vorlaufszeid notwendig war, dass ma des wejdweid bekanntmacha hod kenna. Da 25. Mai hòd se seitdem òis Gedenkdòg etabliert. Andane Termine, de im Hiblick auf Douglas Adams a Bedeitung ham, waarn da 11. Feba (wo da 42. Dòòg vom Joar is), sei Gburtstdòg (11. März) und sei Sterbedòòg (11. Mai). Es is driaba dischkriert worn, dass ma oan vo dene fia 2002 òis neichn Termin festlegt, da 25. Mai hòd se oba schliassle durchgsetzt.

Wòs ma mid dem Datum òiss ausrechna ko[Werkeln | Am Gwëntext werkeln]

Es is da letzde Dòòg im Joar, bei dem da Dòòg genau as Quadrat vom Monat is (25.5.: ).
Aussadem is de Summ vo de Hexadezimalzòin und , òiso und aggradd , wòs umgrechnt ins Dezimalsystem gäbt, òiso de weithi bekannte Antwort 42, um de si a eingne, äha scherzhaft betriemmne, Disziplin vo da Zahlenmystik draaht.

Im Netz[Werkeln | Am Gwëntext werkeln]