Vorlog:AvdW/26

D´Såizbuaga Exulantn woan efangelische Laid dé im 17dn und frian 18dn Joahundat aus'n Eazbisdum Såizbuag in mearane Wön fadrim und aus'n Lãnd gjågt woan san. Bedrofn woan foa oim protestantische Laid aus da Schdåd Såizbuag söwa, Beaglaid aus Dianbeag bai Hallein und Beachtsgådara, åwa a Bauan ausn Defereggendåi und ausn Zilladåi und klêanen Grupn aus Rådschdåd und Gastain. Dés Woat Exulant kimd aus'n Lådainischn fum Partizip Presens fu exulare (aigentli exsulare) und hoast so fü wia Ausgjågta, Fadriwana. Dés Woat lait si söwa wida fu ex (aus) und solum (Grund und Bon) å. Des modeane Woat Exil lait si a fu deara Wuazl å. In da haiding Gschichtsfoaschung fawent ma as Woat Exulant hauptsechli fia de Zaid fum 16dn bis zan 18dn Joahundat und ma mõand damid de efangelischn Laid, dé zwéngam Glaum aus eanara Hõamad dafã miassn hãm. In dém Sin is a Exulant wea gwén, dea fu da Obrigkaid aus'n Lãnd fajågt woan is. Im Untaschiad dazua håd's a Laid gém, dé néd ausn Heaschåftsberaich fu eanam Hean fadrim sondan in dém sain Lãnd in a ãndane Region umgsidlt woan san. Dé håd ma dåmåis Transmigrantn gnend. weida lesn