Wean Hauptbauhnhof

Da Weana Hauptbauhnhof (dt. Wien Hauptbahnhof, in da Planungsphasn aa ois Bahnhof Wien-Europa Mitte und Wien Zentralbahnhof bezeichnat) is da neiche Bauhnhof duatn, wo fricha da Südbauhnhof woa. An Zentroi hods in Wean scho vuaha ge'm, des woa zwoa koa Bauhnhof, owa aa de Endstatiaun. Dea Bauhnhof liegt im 10. Weana Beziak Favoritn aum Giatl.

Betrieblich gsehn reicht da Hauptbauhnhof (Wbf) vo Wean Hetzenduaf und Wean Matzleinsduaf-Wienerbergbruckn (vo da Südbauhn kummand) bzw. Wean Matzleinsdorf-Altmannsduaf (vo da Pottnduafa Linie kummand) bzw. Wean Matzleinsduaf-Oswaldgossn vo da Vabindungsbauhn kummand, iwa Wean Meidling, Wean Matzleinsduaf, Wean Matzleinsduafa Plotz, Wean Matzleinsduaf-Laxenburg, ihm Hauptbauhnhof söwa (owa nua de Bauhnsteig' 3-12; wäu de Bauhnsteig' 1 und 2 aun da Schnööbauhn-Staumstreckn ghean zan Bauhnhof Wean Südtirolerplotz), Wean Hauptbauhnhof-Autoreisezug bis Wean Hauptbauhnhof-Südosttangentn. Da Bauhnhof Wean Südtirolerplotz is des, wos ma ois „Tiafgeschoß“ kennt, oiso Wean Hauptbauhnhof-Südtiroler Plotz und Wean Quartier Belvedere.

Gschicht

Da heitige Hauptbauhnhof is scho da viate Bauhnhof aun dera Stöö. De easchtn beidn woan zwoa voranaund trennte Kopfbauhnhef', de wos aa jewäus eigane Aunlogn fia de Zugfeadarung ghobt haum: 1841 is da Gloggnitza Bauhnhof und 1845 da Raaba Bauhnhof baut wuan. 1874 is da zweite Südbauhnhof eaöffnat wuan und 1870 da Stootsbauhnhof (des woa da zweite Ostbauhnhof), de woan scho prunkvulla ausgfiaht.

Vo 1956 bis 2009 is da dritte Südbauhnhof in Betrieb gwesn, dea wos aus ana großn Kassnhoin bstaundn hod, wosd iwa a launge Ruitreppn zua de Bauhnsteig' 1-9 vo da Ostbauhn im easchtn Stock kumman bist und iwa a weitare Ruitreppn im rechtn Wingl dazua zua de Bauhnsteig' 11-19 vo da Südbauhn im zweitn Stock.

Pläne fiaran neichn Hauptbauhnhof ois Duachgaungsbauhnhof stott de zwoa Kopfbauhnhef' hods scho vü ge'm, 2003 is daun de konkrete Ohsichtseaklärung untazeichnat wuan, aa fian Wüdschweintunnöö, dass de Züg' vo da Westbauhn hifoahn kenna. A weitara Vuatäu is, dass da Hauptbauhnhof nächa zua U-Bauhn aum Südtirula Plotz gruckt is, dohea is a bessa eareichboa wuan. Während dem Umbau haums de Bauhnsteig' vo da Ostbauhn kiazt und duatn an provisorischn Ostbauhnhof baut, de Züg' vo da Südbauhn haum dawäu in Meidling g'endt. 2012 haum de easchtn Züg aum neichn Hauptbauhnhof Statiaun gmocht, 2015 is a daun in Vuibetrieb gaunga.