Wendlstoakiachal

Aus Wikipedia
Wexln zua: Navigation, Suach
As Wendlstoakiachal
As Kiachal innan

As Wendlstoakiachal (dt. Wendelsteinkircherl) is a Kira afm Wendlstoa auf ana Häh vo umara 1.740 Meta.

Es liegt am Fejsrucken hundad Meta untam Gipfe vom Wendlstoa. Es is de hächstglegane Kira vo Bayern und vo Deitschland. Da Grundstoa is scho anno 1889 glegt worn. Es gibt nua Kapejn, de wo no hächa liegn, wia beispuisweis de Zugspitzkapejn. Da Untaschied: Se is ois Kira offiziej gweicht worn. Se gheat zun Eazbistum Minga und Freising und zua Pforrei Brannaburg.

As Kiachal is as Woahrzoachn vom Wendlstoa schlachthii und da Patrona Bavariae gwidmet, da Muadageddin und Schutzheilign vo Bayern.

Entstehungsgschicht[VE | Weakln]

Des Wendlstoakiachal is auf den Initiativn om Mingna Kunstprofessor Kleiber Max baut worn, dea wo a Wendlstoa-Voda gnennt wead.

Inititialzindung worn de Klogn vo da Rosa Krimbacher, da easchtn Wiatin vom Wendlstoahaus, des wo 1882-1883 baut worn is. "Dass ma hoit do herobn des ganze Joar in koa Kiacha ned kimmt", hod de Krimbocharin imma wieda klogt.

Da Kleiber Max hod si um de Spendn kimmat. Drei Bauern ham eam en Baugrund gschenkt. De Spendn san vo ibaroi heakeman, sogor vo Amerika. Olle Gejdgeba san im Innan vom Kiachal vaewigt. Mingara Kinstla ham de neigotische Eihrichtung gschoffa. As vagoidade Tuamkreiz is a Spendn vom Mingara Hof-Posamentier Beck Ludwig. Da Kleiber Maxl soi des 85 Pfund schwaare Kreiz sejm afn Beag affezaht ham.

Dea Grundstoa is 1889 glegt worn. Am 20. August 1890 hod da Mingara Erzbischof Antonius vo Thoma as Wendlstoakiachal da Patrona Bavariae gweicht.

Galerie[VE | Weakln]

Kapejn und Kiachal[VE | Weakln]

A Kapejn gibts am Wendlstoa aa und des wead oft midn Wendlstoakiachal vawexlt.

Es is de kloane Wendelinkapejn, ganz obn am Gipfe. Se is anno 1718 vom am Boarischzella Bauan baut worn, und zwor aus Dankborkeit dofia, dass seine Ressa wiedagfundn worn san, de wo si im Nebe vairrt ghobt ham.

Beleg[VE | Weakln]

Im Netz[VE | Weakln]

 Commons: Wendlstoakiachal – Sammlung vo Buidl, Videos und Audiodateien