God

Aus Wikipedia
(Weidagloadt vo Gott)
Wexln zua: Navigation, Suach
Der Artikl is im Dialekt Niedaboarisch gschrim worn.

Da God oda Herrgod is de zentrale Figua im Kristndum. A de moastn andan Religiona ham aa an God, de Moslems in Allah, de Judn vaeanna unterm ganz heiling Nama Jahwe. Sgibt aa Leit, de net glaam, dass ibahapts an God gibt, und de nennt ma Atheistn.

Sgibt Leit, de sogn ma wissat gar net obs an Herrgod ibahapts gibt. Ehrlich gsagt is da oba aa vui Polemik mid dabei. Wia vafeinat imma do de theoretischen Argument san, letztli stäin si aa de sognenntn Atheisten koa Wäit ohne iagadam "häxstn Wesn" vor - und grod des iss ja, was des Woat "God" oagntli hoasst. Hod ibrings aa de katholische Kirch zu am Dogma erklärt - wos in da Bibl aa ganz klor drinsteht - dass an God an und fia si a jeda erkenna ko und iba kuaz oder lang aa duat, wenna si ibahapts ernsthaft Gedankn zu dem Thema macht.

Was ganz was ondas is de Frog, wea oda wia oda wos da God oagntli is. Des iss aa, wos de Atheistn oagntli moanan; ned dass koan God gibt, sondan dass jedenfois an kristlichn God ganz gwis ned gem soiadad oda, bei a poor Atheisten ganz krass, dass da Mensch säiba God waar. Wobei ma nacha frong miassat: moanan de jedn oanzlnan, moanan de irgadwos wia in Begriff Menschheid oda moans ebba gor si säiba. Da Sartre zum Beispui moant si säiba, wei obs andane Menschn gibt, woasa gor ned, er woas bloos (bzw. moant), dass "sei Existenz seina Essenz vorausgeht" - wos de studiade Variante davo is, dassa sie säiba fias häxste Wesn oda hoid God hoit.

Vo kristlichm Standpunkt ko ma eam si am bestn voastäin ois an Heilign Geist, dea ibaroi zuaschaut, ois midkriagt und fois notwendi aa eingreifa ko, indema an Engl schickt oda glei ebban dazua bekehrt oda leicht sogor indem a de Sach häxstpersenli ind Hand nimmt. Aussa a poor Anhoitspunkte wissma do oba nix. Nedamoi de Kirch mit eana Offenbarung wissens, und sogn des aa säiba. Wos de oba aa sogn is: De poor Sachan, desa si sogn traun, de stimman aa.

Zwecks da Vaehrung, de am Herrgod zuasteht, muass ma laut Kirch anam jedn Sunnda in Godsdeanst geh und bätn. Bei de Katholischn muas des d Mess sei.

Ogeseng vom Begriff "God" gibts no den Begriff "Gedda". Des is a bissl wos andas, nämli koa häxts Wesn, sondan bloos a Art Engl, Ibamensch oder Naturgwoit. Do hom de oidn Griachn und Rema und vui andane an ganzen Haffa vaschiedane Gedda ghobt. Ois "God" in unsam Sinn homs da oba entweda gor koan ogseng oder häxstns an Jupiter, oda wia immer der häxste vo dene dann ghoassn hod, oda aa-r-a unpersenlichs Schicksal. Heit is des no aso bei de Hindus; des, wos mia God nennan, hoasst bei dene Brahman und is so a Art Wäitgeist oda oigmoans geddlichs Wiakn; de häxtn vo dene eanane Gedda hoasn Wischnu, Brahma (den wos ma ned mid Brahman vawexln deaf) und Schiwa. Schlaue Menschen wia da Euhemeros hom vamuadt, daß de ganzn Gedda moastns Menschn, zum Beispui Kenige worn, de ma nach eanam Doud vaehrt hod.

D Judn und Kristn hom mid da Vaehrung vo de Gedda aufgrammt. Laut dene is as Kennzoachn vo de guadn Engln grod dass s grod ned mit dene Ehren obätt wern woin, de am Herrgod alloa zuastengan. Aussadem hod zum Beispui da heilige Augustinus den Vadocht ghobt, dass de vaehrtn Gedda vo de Heidn in am Haffan Fäi nedamoi bloos eibuit worn, sondan schlimma no, bäse Geista, oder dass sie de Geista wenigstns in de Vaehrung eigschlicha hom, um d Menschn vom oanzign God obzumlenka.