Hernois

XVII. Weana Gmeindebeziak (Hieb)
Wappn	Koatn
Nauman:	Hernois
Flächn:	11,35 km²
Einwohna:	52.563 (1. Jan. 2007)
Bevöikarungsdichtn:	4.602,1 Einwohna je km²
Postleitzoih:	1170
De Adressn vom Beziaksaumt:	Elterleinplatz 14 1170 Wean
Offiziölle Webseitn:	www.wien.gv.at/hernals
Politik
Beziaksvorsteha	Ilse Pfeffer (SPÖ)
Beziaksvatretung (40 Beziaksrät)	SPÖ 17, ÖVP 9, Greane 8, FPÖ 6

Hernois (aumtlich: Hernals) is da 17. Hieb vo Wean. Dea Gmeindebeziak is 1892 aus de söbständign Gmeinden Hernois, Dornboch und Neiwoidegg büdt wuan.

Da Naum kummt vau de "Herrn an da Ois", de ehemolign Besitza (1135 urkundlich erwähnt) vau dem Gebiet auf dem de Siedlungen Hernois und Dornboch entstaundn san.

Eadkund

Da Beziak Hernois liegt im Nordwestn vo Wean am Ausleifa vo de Oipn zum Weana Beckn. Hernois is 11,35 km² groß und is da zehntgreßte Weana Gmeindebeziak. Des san 2,7 % vom Weana Stodtgebiet. Da Hieb gäht entlaung vo da kanalisiatn Ois zwischnan Weana Woid und an Giatl. Da hächste Berg vo Hernois is da Heiberg mit 464 m.

Beziaksteule

De ehemois söbständign Vuaoate vau Wean - Hernois, Dornboch und Neiwoidegg - san 1892 eingmeindt wuan. Draus is da 17. Hieb entstaundn. Hernois liegt im dicht bebautn Ostn, Neiwoidegg is da bewoidete Nordwestteu und Dornboch liegt im Südwestn vaum Beziak.

Woppn

S'Hernoisa Woppn is dreiteut. Dabei stäht jeda Teu fia ana vo de ehemois söbständign Gmeinden Hernois, Dornboch und Neiwoidegg.

• Da obare Teu stäht fia Hernois. De blaue Weintraubm auf rotn Grund weist drauf hi, dass Hernois amoi a Weinbauandorf woa.
• Da linke, untare Teu is Dornboch gwidmet. De zwa sübanan, kreiztn Schlissl symbolisian dees Stift Sankt Bäda in Soizburg, de amoi de Grundherrn vo Dornboch und Hernois woan.
• De rechte untare Seitn stähd fia Neiwoidegg. Des Haisl mit de zwa Bam auf da greanan Wiesn symbolisiat den ehemolign Herrnsitz.

Kuitua und Sehnswiadigkeitn

Kalvarienbergkirchn

Lacy-Grobmoi im Schwoaznbergpark

Sehnswiadigkeitn

De wichtigstn kiachlichn Sähnswiadigkeitn in Hernois san de Kalvarienbergkirchn, de Sühnekirchn und de Marienpfoa. Dazua kummt des Jörgerbod, da Spuatclub-Plotz in Dornbach und da Oiszaubabrunnen mit Statuen vaum Schramme-Quartett.

In Dornbach is de Dornbacha Pfoakirchn und de Annenkapön z'nenna, in Neiwoidegg des Schloss Neiwoideggg und da Schwoaznbergpark.

Theata

In Hernois gibts zua Zeit nua zwa wichtige und bekaunte Theata. Im Wiener Metropol kumman Musicals, Konzerte und Kabaretts zua Auffiahrung und de Kulisse Wien is dagegn a reins Kabaretttheata.

Spuat

Da Weana Spuat-Club - Foabm schwoaz/weiß - is ana vau de ötastn Spuatvareine vo Esterreich und zua bestn Zeit nua unta "da Spuatclub" bekaunt gewesn. Dea Varein is ausn Weana Cyclistenclub hervuagaunga, dea am 24. Feba 1883 gründt wuan is. De Fuaßboiobteulung gibts seit 1907 und is damit a ana vo de ötastn Fuaßboivareine vo Esterreich. De Fuaßbolla san dreimoi esterreichischa Masta, siemmoi Vizemasta und amoi Cupsiega woan. Duach zwa Pleitn is da Weana Spuat-Club in de 90er Joa diaf obgstiazt, bestäht owa no imma. De Fuaßboiobteulung ist 2002 obgspoitn woan und spüt ois eignständiga Fuaßboivarein in da drittklassign Regioneuliga Ost.

Partnabeziak

Partnabeziak vom Beziak Hernois is da 17. Beziak von Tokyo, Fuchū. De Ziakiaschn im Lidlpark san a Gschenk vom Partnabeziak.

Hernoisa Berühmtheitn

• Josef "Nockal" Bratfisch, Leibfiaka vom Kronprinz Rudolf
• Hansi Lang, Austropopper
• Josef Manner, Unternehma (Erfinda vo de Mannerschnittn)
• Josef Meinrad, Schauspüla am Burgtheata und Fümschauspüla
• Josefine Mutzenbacher, de Mutznbocharin, de berühmteste Weana Hua (aungeblich nua Litaratua)
• De Schramme Briada: Johann und Josef Schrammel (Schrammemusik)

Biacha

• Peter Diem, Michael Göbl, Eva Saibel: Die Wiener Bezirke. Ihre Geschichte – Ihre Persönlichkeiten – Ihre Wappen. Wean 2002, ISBN 978-3-85223-463-2
• Carola Leitner: Hernals: Wiens 17. Bezirk in alten Fotografien. Ueberreuter, Wean 2007, ISBN 978-3-8000-7304-7

Im Netz

Commons: Hernois – Buidl, Videos und/oda Audiodatein

• Offiziölle Netzseitn vom Beziak Hernois
• Beziaksmuseum Hernois
• Weana Spuat-Club, gründt 1883 in Dornboch, Hernois

Gemeindebeziake (Hieb) in Wean

I. Innare Stod | II. Leopoidstod | III. Laundstrossn | IV. Wieden | V. Margareten | VI. Mariahüf | VII. Neibau | VIII. Josefstod | IX. Oisagrund | X. Favoritn | XI. Simmaring | XII. Meidling | XIII. Hietzing | XIV. Penzing | XV. Rudoifsham-Fümfhaus | XVI. Ottakring | XVII. Hernois | XVIII. Wearing | XIX. Döbling | XX. Brigittenau | XXI. Floridsdoaf | XXII. Donaustod | XXIII. Liesing