Münchna Kindl

Der Artikl is im Dialekt Obaboarisch gschrim worn.

Woppm vo Minga

Münchna Kindl - Postkoatn um 1900

s Münchna Kindl steigt ausm Woppm (1847 vo Kaspar Braun)

Münchna Kindl, aa Mingara Kindl (hochdeitsch: Münchner Kindl) is da Nama vo da vaniadlichtn Woppmfigur vo Minga.

De tradionelle Woppmfigur vo Minga is a Mönch in oana goid-schwoazn Kuttn. Voiksetymologisch hod s Wort Münchn mit Mönchn ("ba dena Mönchn") zdoa, wos owa noch neian Forschungen foisch sei deafat. Woascheinlicha is, dass Minga vum vorchristlichn Wort Munica kimmt, des wo Ort af da Ufaterrassn hoasst..

De Woppm-Figua (ob 13. Joahundat) is im Laf vo da Zeit, scho seitm 16. Joahundat, imma wieda vo Kinstlan nei doagstejt und sukzessive vaändat woan. Vor oim hod de Figur imma mehra kindliche Gsichtsziag griagt und in de 1920er Joa is dann ausm Buam a Deandl woan - s moderne Münchna Kindl is damit born gwen. Wia koa andane deitsche Woppmfigua hod se de Figua imma mehra vasejbständigt. Zletzt hods sogoa s Eidbuach obglegt und zan Biakrug und zan Radi griffa.

S Münchna Kindl find ma heizdog zum Beispü af Trambowogn, Kanaldeckln, Postkoatn, Biakriagln, Biafloschna und Plakatn.

S Münchna Kindl vo da Wiesn

S Münchna Kindl wird vom „Festring München e. V.“ ausgsuacht. Da „Festring München“ organisiat an Einzug vo de Wiesnwirt sowia an Trochtnumzug vum Oktoberfest. S Münchna Kindl is weiblich, zwischn 20 und 29 Joa oid und stammt moast aus dena Reihn vo de Mingara Wiesnwirt, Schaufteja bzw. Brauarein. S Münchna Kindl wir oft aa Botschafterin vo Minga gnennt.

S Münchna Kindl fiaht an Einzug vo de Wiesnwirt zum Oktoberfest o und stähd dann nem an Obaburgamoasta vo Minga, wann d Wiesn mitm Ozapft is eräffnet wird. Am easchnt Sunntog vum Oktoberfest findt a groussa Trochtn- und Schitznumzug stott, wo s Münchna Kindl in oana gejb-schwoazn Franziskanakuttn und oan Maßkrug in da Hand, af am Ross sitzend an Umzug ofiaht.

De Münchna Kindl

Jahr	Name
1938	Ellis Kaut
1965	Lieserl Fesenmeier
1972–1978	Christl Mory
1979–1980	Hannelore Fischer
1981–1983	Helene Münchhalfen
1984–1986	Stephanie Spendler (Hagn)
1987–1994	Manuela Weitner
1995–1998	Silja Schrank-Steinberg
1999–2000	Stephanie Redl
2001–2002	Daniela Heide
2003–2004	Julia Krätz
2005-2006	Nadine Schröder
2007–2009	Stefanie Krätz

Andane Münchna Kindl

Jeda, dea wo in Minga geboan und afgwaxa is, wiad aa Münchna Kindl gnennt.

De bayerischn Spirituosn-Spezialitätn vo da Firma Riemerschmid wean aa Müncher Kindl gennnt; davo gibts drei Sortn:

• Oberbayerischer Gebirgsenzian
• Bärwurz
• Erster Altbayerischer Kartoffelschnaps

Noch da Mingara Wopppm-Figua is aa de Münchner-Kindl-Brauerei gnennt gwen, de wo 1905 vo Unionsbräu iwanumma woan is.