Stammtisch
| Der Artikl is im Dialekt Obaboarisch gschrim worn. |
A Ståmmdisch is a Gruppn vo Leid, de se des öfftan in na Wirtschaft treffn. Der Tisch, an dem de hocka, hoaßt natürli aa Ståmmdisch.
[drå werkln] Traditionelle Ståmmdisch
In vui Wirtschaftn is da Ståmmdisch glei zum dakenna, wei a entsprechends Tafal draufsteht oda driabahengt. Ab und diam liast ma do den Spruch "Do hogga de, de ollaweil do hogga". Dea Spruch bschreibt recht schee de Art der Zughörigkeit. A Stammtisch is a vui lockerne Gruppn wia z.B. a Verein. Dementsprechend kennt ma si a untaranånd, is mim Wirt per du und håd gewisse Freiheitn, de wo a åndana Gast ned hod; z.B. ko si a Ståmmdischbruada sei Bia åschreim lassn, wei da Wirt woaß, dåß a oiwei wieda kimmt.
Beim traditionelln Ståmmdisch guid's ois unhöflich, wenn ma si ois Fremda an an laarn genauso wia zu am bsetztn Ståmmdisch dazua hockt. De Etiquette schreibt voa, dåß ma si east dåzuahocka deaf, wånn ma vo am Mitglied dåzua eiglån woan is.
A bsundane Form vom Ståmmdisch is da Frühschoppn. Do treffan se d'Leid am Sonntag noch da Kirch zum Weißwuarschtfrühstück.
Oft werd am Ståmmdisch Kartn gspuit, meist Schåfkopf oda aa Wattn.
[drå werkln] Andane Ståmmdisch
Neba de tradtionelln Ståmmdisch kimmts a imma mehr dazua, daß se fremde Leid mit gemeinsame Intaressn treffa. Z.B. gibt's in vui Städtn an Wikipedia-Ståmmdisch. In dene Fäll han neie Leid gern gseng.
Aa in åndane Lända gibts Ståmmdisch oda zumindest wos vagleichbars. Auf de Britischn Insln zum Beispui trifft ma se reglmäßig im Pub. In Spanien und Südamerika gibts a eigene Art vo (Künstla-)Ståmmdisch, de Tertulia. Då treffan se reglmäßig eha künstlarisch vaanlagte Leit, dischkriern iba eahnane Werke und tauschn Ideen aus.
[drå werkln] Ståmmdisch in da Bolidigg
In da Bolidigg håd da Ståmmdisch a eha nägative Bedeitung. So beweg si zum Beispui a Redna auf "Ståmmdischniveau", wann a recht vui populistische Themen aufgreift. Des kimmt vom Klischee, dåß am Ståmmdisch oiwei auf am recht am niedrign Niveau dischkriert wead, vui (nägative) Stereotypn und Klischees iba åndane präsent han und fiar a Broblem oft Lösunga gfundn wean, de zwar aufn eastn Blick einfåch ausschaung, aufn zwoatn oba unmeglich beziehungsweis vui z'radikal han und desweng nua vo Leit favorisiert wern, de entweda z'deppad han oda ned iba eahnan eigna Tellarånd nausschaung kenna.
