Albuin (Heiliger)

Dr Albuin ståmmp aus Kärntn unt isch ausn Gschlecht va die Aribonen. Um 975 isch’r Pischof va Säbm unt Prixn gwórtn, in Jåhr 1006 isch’r gschtórm.

Sei Lébm

In Untrschied zu friahre Prixnr Pischéf woaß man va ihm recht konkret épes ibr sein Lébm, zun Peischpiel aa dass sei Våtr aa Mårkgråf gwésn isch unt ébmfålls Albuin ghoaßn håt. Sei Muatr (Hildegard) håt a Kapital ausgébm, damit’r in Prixn studiarn håt kénnt.

Er håt in Pischofsitz van Säbmr Perg åi in dr flåchn Ébm nåch Prixn vrlégn glåssn, håt aa die Poanr van Ingenuin va Säbm nåch Prixn pråcht. Só isch dr Hl. Kassian Patrón van Prixnr Dóm gwórtn. Dr Albuin isch loyal zu die Keisr Otto II. unt Heinrich II. gwésn, håt drfir an Haufn Lénderein kriagg unt isch só zun erschtn Firschtpischóf va dr Diözése gwórtn. Zu streitn håt’r mitn poarischn Gråf Ratpot, an Huosi, ghåp.

Van spétrn Pischóf Hartmann isch’r gemeinsåm mit’n Hl. Ingenuin zu Schutzheiling van Pischtum Prixn ernånnt gwórtn. Seine Poanr sein in Prixnr Dóm peståttet. Schón seit Énde van 11. Jåhrhundrt wert’r vrehrt. Sei Nåmenståg isch in 5. Febrar. Mitnånt mitn Ingenuin isch’r Patrón va vrschiedne Kirchn in Tiról.

Die St.-Albuins-Épfl sein nåch ihm penånnt. Er selbr håt seinrzeit drfir gsórgg, dass in Eisåcktål Épfl ånpaut wern.

Dr Vórnåmen Albuin isch in dr Nåchfólgrdiözése van Pischof (Pózn-Prixn) seltn ånzutréffn, kaum 2 af 10 000 Mandr bzw. Puabm hoaßn só. In Taitschlånt isch’r nó viel seltner.

Zu lésn

Anselm Sparber: Die Brixner Fürstbischöfe im Mittelalter; Athesia, Bozen 1968.
Heinz Wieser: Alter Diözesanpatron starb vor 1000 Jahren; Osttiroler Bote van 9. Febrar 2006.

Link