Mejsuppm

A Mejsuppm oda estr. Möösuppm (dt. Mehlsuppe) is a oafoche Suppm, de wo voa oim aus Mej und Wossa bsteht. De Mehjsuppn gibts woarscheinle in iagendoana Foam praktisch ibaroi af da Wejd und se is woarscheinle tausade Joar oid. Se wor fia lange Zeid a Grundnoarungsmiddl fia de Menschheid.

A oafoche Foam vo da Mejsuppm wead aus Mej, Wossa und Milli kocht und mid Soiz gwiazt. Dozua is nacha no Broud einebrockt worn. Da Gschmo vo da Mehjsuppn ko no duach Zuadodn vabessad wean: Mid Zwiefen, Gwiaz, Graidln, Suppmgrea, Speeg oda Fleischbriah beispuisweis.

Brennsuppm

A Eihbrenn ois Grundlog vo da Brennsuppn

De Brennsuppm (dt. Brennsuppe) oda Eihbrennsuppm (dt. Einbrennsuppe) is a vabessade Variantn vo da oafochn Mehjsuppn. Do wead as Mehj im Pfandl mid Fettn, moast Schmoiz, goidbraun oogresst. Nach wead de sognennde Eihbrenn (dt. Mehlschwitze) in Wossa kocht. Duachs Restn hod de Suppm an bessan Gschmo und duachs Schmoiz weads vui noarhofta. Deswegn hod de Brennsuppn de uaspringliche, oafoche Mehjsuppn schnejj vadrengt.

Brennsuppm heit

De Brennsuppm hod in Bayern und Estreich bis heit a Tradition. Im leztn Joarhundad sogor no ois traditionejs Weihnochtsessn.

Bekannt san heit voa oim de Bayerische Brennsuppn und de Tirola Brennsuppn. Es san Feinschmeggavariantn, de wo mid da oafochn Brennsuppn nua no de Mehjschwitzn gmoasam ham.

A bsundare Tradition hod de Brennsuppn aa in da alemannischn Fosenocht.

Rednsoart

Wea af da Brennsupp, dahea schwimmt, is a oarma Schlucka oda a Depp. Des kimmt dohea, wei de Brennsuppn in da Neizeid a Oarmeleitessn wor. (A neiare Variantn vo dem Spruch is, auf da Nudlsuppn daheagschwumma sei.) Dea Spruch is za ana Zeid entstandn, wo de Brennsuppm neama so a dominante Roin gspuid hod.

Literatua

• Unser Bayerisches Kochbuch - Neu interpretierte Klassiker und feine Schmankerl der beliebtesten Spitzenköche und Konditoren, vom Bayerischen Rundfunk / Wir in Bayern, 2011. ISBN 978-3-517- 08737-5.

Im Netz

• Bauernkost am Heiligen Abend in Tirol (af sagen.at)